ରୂପ୍ସା, ୩୧।୩(ଡି.ଏନ.ଏ.)-ବାଲେଶ୍ୱର ଜିଲା ସଦର ବ୍ଲକ ଅଧୀନ ରୂପ୍ସାସ୍ଥିତ ଜୟକିଶନ ଦାସ ସହ ଝୋଟ କାରଖାନା ମଙ୍ଗଳବାରଠାରୁ ଚାଲୁ କରାଯାଇଛି। କରୋନା କଟକଣା ପରିପ୍ରେକ୍ଷୀରେ ରାଜ୍ୟ ସରକାରଙ୍କ ନିର୍ଦ୍ଦେଶାନୁଯାୟୀ ଗତ ୨୪ ତାରିଖରୁ ୨୯ ତାରିଖ ପର୍ଯ୍ୟନ୍ତ କର୍ତ୍ତୃପକ୍ଷ କାରଖାନା ବନ୍ଦ ରଖିଥିଲେ। ରାଜ୍ୟ ସରକାରଙ୍କ ହେଲ୍ଥ ଆଣ୍ଡ ଫ୍ୟାମିଲି ୱେଲଫେୟାର ଡିପାର୍ଟମେଣ୍ଟଙ୍କ ଚିଠି ନମ୍ବର ୮୮୭୦।୨୩.୩.୨୦ ମୁତାବକ କାରଖାନା ବନ୍ଦ ହେବା ନେଇ ଜେନେରାଲ ମ୍ୟାନେଜର ମୁଖ୍ୟ ଫାଟକ ସମ୍ମୁଖରେ ନୋଟିସ ଝୁଲାଇଥିଲେ। ପୁଣି ଜିଲାପାଳଙ୍କ ଅର୍ଡ଼ର (ନଂ. ୧୦୬୧/୨୭.୩.୨୦) ଅନୁଯାୟୀ ମାର୍ଚ୍ଚ ୩୧ତାରିଖରୁ କାରଖାନା ଚାଲୁ କରାଯାଇଥିବା ଜଣାପଡ଼ିଛି। କାରଖାନା ଖୋଲାଯିବା ଫଳରେ କାର୍ଯ୍ୟରତ ୮୫୦ ଜଣ ଶ୍ରମିକଙ୍କ ମଧ୍ୟରେ ଖୁସିର ଲହରୀ ଖେଳି ଯାଇଛି। ଅପରପକ୍ଷରେ କେନ୍ଦ୍ର ଓ ରାଜ୍ୟ ସରକାରଙ୍କ ପକ୍ଷରୁ ଏପ୍ରିଲ ୧୪ ତାରିଖ ପର୍ଯ୍ୟନ୍ତ ଲକ୍ଡାଉନ୍ ଘୋଷଣା କରାଯାଇଥିବା ବେଳେ କାରଖାନା ଖୋଲାଯିବା ଘଟଣା ନେଇ ବିଭିନ୍ନ ମହଲରେ ଚର୍ଚ୍ଚା ଜୋର ଧରିଛି।
