ଜଗତ୍ସିଂହପୁର ଅଫିସ୍, ୯।୧: ଭଲ କମ୍ପାନୀରେ ଚାକିରି କରାଇଦେବାକୁ କହି ଜଗତ୍ସିଂହପୁର ଥାନା ଅଳସୁଧା ଗ୍ରାମର ଦେବେନ୍ଦ୍ର ବେହେରାଙ୍କଠାରୁ ଜଣେ ବ୍ୟକ୍ତି ୫୦ ହଜାର ଟଙ୍କା, ସାର୍ଟିଫିକେଟ୍ ନେଇଯିବା ସହ ୧୪ ଦିନ କାଳ ନିର୍ଯାତନା ଦେଇଥିବା ଦେବେନ୍ଦ୍ର ଅଭିଯୋଗ କରିଛନ୍ତି। ଅଭିଯୋଗ ମୁତାବକ, ବାଲିକୁଦା ଥାନା ଅଞ୍ଚଳର ସୂର୍ଯ୍ୟ ନାରାୟଣ ଦାସ (ସୁନା) ତାଙ୍କୁ ଚାକିରି କରାଇଦେବେ ବୋଲି କହି ବରଗଡ଼ ଡାକିଥିଲେ। ସେଠାରେ ସୁନା ତାଙ୍କର ୩ ବନ୍ଧୁ ମଧୁ, କେଶବ ଓ ନବୀନଙ୍କ ସହିତ ଦେବେନ୍ଦ୍ରଙ୍କୁ କଥା କରାଇଥିଲେ। ସେମାନେ କହିଥିଲେ ଯେ, କମ୍ପାନୀରେ ଚାକିରି କଲେ ମାସିକ ଦରମା ୨୨ ହଜାର ଟଙ୍କା, ଟିଏ, ଡିଏ, ବୀମା ଆଦି ସୁବିଧା ମିଳିବ, କିନ୍ତୁ ପ୍ରଥମେ ୫୦ ହଜାର ଟଙ୍କା ଜମା ଦେବାକୁ ପଡିବ। ତେବେ ଦେବେନ୍ଦ୍ର ସେମାନଙ୍କୁ ୫୦ ହଜାର ଟଙ୍କା ଦେଇଥିଲେ। ଏହାପରେ ସେମାନେ ତାଙ୍କୁ ଗଣପତି ମାର୍କେଟ୍ରେ ଥିବା ଗଣେଶ ଭୁବନ ଓ ପରେ ଗ୍ଲେଜ୍ ନେଟ୍ୱର୍କ କମ୍ପାନୀକୁ ନେଇଥିଲେ। ସେଠାରେ ସେମାନେ ତାଙ୍କଠାରୁ ସବୁ ସାର୍ଟିଫିକେଟ୍ ଓ ମୋବାଇଲ ନେଇଯିବା ସହ ତାଙ୍କ ଫଟୋ ଉଠାଇଥିଲେ। ଏହାବାଦ୍ କିଛି କାଗଜପତ୍ରରେ ଦସ୍ତଖତ କରିବାକୁ କହିଥିଲେ। ସେଠାରୁ ଆସିବା ପରେ ତାଙ୍କୁ ୬ ଜଣ ପିଲା ଯୋଗାଡ଼ କରିବାକୁ କୁହାଯାଇଥିଲା। ହେଲେ ମନା କରିବାରୁ ତାଙ୍କୁ ଏକ ଘରେ ୧୪ ଦିନ କାଳ ରଖାଯାଇ ନିର୍ଯାତନା ଦିଆଯାଇଥିଲା। ତେବେ ଦେବେନ୍ଦ୍ର ପିଲା ଯୋଗାଡ଼ କରିଦେବାକୁ କହିବାରୁ ସେମାନେ ତାଙ୍କୁ ବନ୍ଧୁକ ଦେଖାଇ କେତେକ କାଗଜରେ ଦସ୍ତଖତ ନେଇଯାଇଥିଲେ ବୋଲି ଦେବେନ୍ଦ୍ର ଅଭିଯୋଗପତ୍ରରେ ଦର୍ଶାଇଛନ୍ତି। ଏଥିସହ ଏ ସମ୍ପର୍କରେ କାହାକୁ କହିଲେ ବା ଥାନାରେ ଅଭିଯୋଗ କଲେ ଜୀବନରୁ ମାରିଦେବେ ବୋଲି ସୁନା ଧମକ ଦେଇଥିବା ଏତଲାରେ ଉଲ୍ଲେଖ ରହିଛି। ଅଭିଯୋଗପତ୍ରର ନକଲ ଜଗତ୍ସିଂହପୁର ଏସ୍ପି, ଜିଲାପାଳ, ରାଜ୍ୟ ପୋଲିସ ମହାନିର୍ଦ୍ଦେଶକ, କ୍ରାଇମବ୍ରାଞ୍ଚ ଓ ମୁଖ୍ୟମନ୍ତ୍ରୀଙ୍କ ନିକଟକୁ ପଠାଯାଇଛି। ଏ ନେଇ ପୋଲିସ ୧୫/୨୦ ନଂ.ରେ ମାମଲା ରୁଜୁ କରି ଘଟଣାର ତଦନ୍ତ ଚଳାଇଛି।
