ବେଜିଂ, ୧୩ା୮(ପି.ଟି.): ଭାରତ ଓ ଚାଇନା ମଧ୍ୟରେ ସମ୍ପର୍କର ନିବିଡ଼ତା ରହିଛି। ଦୁଇଦେଶ କୌଣସି ଭିନ୍ନତାକୁ ଗ୍ରହଣ କରି ଭବିଷ୍ୟତରେ ଦ୍ୱିପାକ୍ଷିକ ସମ୍ପର୍କକୁ ଅନ୍ଧକାର ମଧ୍ୟକୁ ଠେଲିଦେବା ଅନୁଚିତ ବୋଲ ଦୁଇିଦିନିଆ ବେଜିଂ ଗସ୍ତରେ ଯାଇଥିବା ଭାରତର ବହିର୍ବ୍ୟାପାର ମନ୍ତ୍ରୀ ଏସ୍. ଜୟଶଙ୍କର କହିଛନ୍ତି। ଚାଇନା ପ୍ରତିପକ୍ଷ ଓ୍ବାଙ୍ଗ୍ ୟିଙ୍କ ସହ ଆଲୋଚନା କରି ଯେକୌଣସି ଉତ୍ତେଜନାର ଆପୋସ ଆଲୋଚନା ମାଧ୍ୟମରେ ସମାଧାନ କରାଯିବା ଉପରେ ସେ ଗୁରୁତ୍ୱ ଦେଇଥିଲେ। ଦୁଇଦେଶ ବିଶ୍ୱ ରାଜନୀତି ଓ ସ୍ଥିରତାରେ ପ୍ରମୁଖ ଭୂମିକା ଗ୍ରହଣ କରିଆସିଛନ୍ତି। କୌଣସି ପ୍ରସଙ୍ଗରେ ମତ ପାର୍ଥକ୍ୟ ରହିଥିଲେ ହେଁ ଏହା ବିବାଦରେ ପରିଣତ ହେବା ଅନୁଚିତ ବୋଲି ଜୟଶଙ୍କର ପ୍ରକାଶ କରିଛନ୍ତି। ୟୁହାନା ସମ୍ମିଳନୀ ସମ୍ପର୍କରେ କହିବା ସହ ଦୁଇଦେଶ ଦ୍ୱିପାକ୍ଷିକ ସମ୍ପର୍କ ଅତୁଟ ରଖିବା ଓ ବିଭିନ୍ନ ମତ ପାର୍ଥକ୍ୟର ଉଚିତ୍ ମାର୍ଗରେ ସମାଧାନ କରାଯିବା ଜରୁରୀ ବୋଲି ସେ ପ୍ରକାଶ କରିିଥିଲେ।
ଭାରତ ଓ ଚାଇନା ପ୍ରତିନିଧିମଣ୍ଡଳୀର ସଦସ୍ୟଙ୍କୁ ସେ ଉଦ୍ବୋଧନ ଦେଇ ପାରସ୍ପରିକ ସହଯୋଗର ଆବଶ୍ୟକତାକୁ ଦୋହରାଇଥିଲେ। ଚାଇନା ଉପରାଷ୍ଟ୍ରପତି ଓ୍ବାଙ୍ଗ୍ କିସ୍ହାନ୍ଙ୍କ ସହ ଜୟଶଙ୍କର ବିଶ୍ୱର ସାମ୍ପ୍ରତିକ ରାଜନୈତିକ ସ୍ଥିତି, ଦ୍ୱିପାକ୍ଷିକ ସମ୍ପର୍କ ବୃଦ୍ଧି ବିଷୟରେ ଆଲୋଚନା କରିଥିଲେ। ଏଥିସହ ରାଷ୍ଟ୍ରପତି ଜି. ଜିନ୍ପିଙ୍ଗଙ୍କ ଭାରତ ଗସ୍ତ ସମ୍ପର୍କରେ ମଧ୍ୟ ଆଲୋଚନା କରାଯାଇଥିଲା।
କଶ୍ମୀର ପ୍ରସଙ୍ଗକୁ ନେଇ ପାକିସ୍ତାନ ଚାଇନାର ସହଯୋଗ ଲୋଡ଼ିଥିବାବେଳେ ଜାତିସଂଘ ନିରାପତ୍ତା ପରିଷଦରେ ଏହାକୁ ଉଠାଇବ ବୋଲି ଧମକ ଦେଇଛି। ସେପଟେ ଲଦାଖକୁ ଭାରତ କେନ୍ଦ୍ରଶାସିତ ଅଞ୍ଚଳର ମାନ୍ୟତା ଦେବା ପରେ ଚାଇନା ଏହାକୁ ବିରୋଧ କରିଥିଲା। ଏହା ଭାରତର ଆଭ୍ୟନ୍ତରୀଣ ମାମଲା ବୋଲି ଭାରତ କହିବାର ଦିନକ ପରେ ଜୟଶଙ୍କର ଚାଇନା ଗସ୍ତ କରିଛନ୍ତି।
