ଦାରିଙ୍ଗବାଡ଼ି,୨୪।୧୦(ଡି.ଏନ୍.ଏ.): କନ୍ଧମାଳ ଜିଲା ଦାରିଙ୍ଗବାଡ଼ି ଥାନା ଡୁଲୁରୀ ଅଞ୍ଚଳରେ ଗୁରୁବାର ଏକ ଅଘଟଣ ଘଟିଛି। ଗଛ ପଡ଼ିଯିବାରୁ ଅଟୋରେ ଯାଉଥିବା ମହିଳାଙ୍କର ମୃତ୍ୟୁ ଘଟିଥିବା ବେଳେ ଅନ୍ୟ ଜଣେ ଯୁବକ ଗୁରୁତର ଆହତ ହୋଇଛନ୍ତି। ମୃତ ମହିଳା ହେଲେ ଉକ୍ତ ବ୍ଲକ ପ୍ଳିହେରୀ ପଞ୍ଚାୟତର ୩ ନମ୍ବର ୱାର୍ଡ ସଭ୍ୟା ସାବନ୍ତୀ ପ୍ରଧାନ। ଗୁରୁତର ହେଲେ ପ୍ରଦୀପ ପ୍ରଧାନ। ପ୍ରଦୀପଙ୍କୁ ସ୍ଥାନୀୟ ଲୋକେ ଉଦ୍ଧାର କରି ଦାରିଙ୍ଗବାଡ଼ି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଆଣିଥିଲେ। ସେଠାରେ ତାଙ୍କ ସ୍ବାସ୍ଥ୍ୟାବସ୍ଥା ଗୁରୁତର ହେବାରୁ ଅନ୍ୟତ୍ର ଚିକିତ୍ସା ପାଇଁ ନିଆଯାଇଥିବା ଜଣାପଡ଼ିଛି ା
ପ୍ରକାଶ ଯେ, ସାବନ୍ତୀ ଦାରିଙ୍ଗବାଡ଼ି ବହୁମୁଖୀ ସମବାୟ ସମିତିରୁ ସାଧାରଣ ବଣ୍ଟନ ଟଙ୍କିକିଆ ଚାଉଳ ନେଇ ଗ୍ରାମକୁ ଅଟୋ (ଓଡି୧୨ସି-୧୧୯୬)ରେ ଘରକୁ ଫେରୁଥିଲେ। ଉକ୍ତ ଅଟୋରେ ପ୍ରଦୀପଙ୍କ ସହ ଅନ୍ୟ କେତେଜଣ ଲୋକ ବସିଥିଲେ। ତେବେ ପୂର୍ତ୍ତ ବିଭାଗର ଡୁଲୁରୀ ପାଇନ୍ ବଣ ନିକଟରେ ବିପଦସଙ୍କୁଳ ଅବସ୍ଥାରେ ଥିବା ଏକ ପାଇନ୍ ଗଛ ଭାଙ୍ଗି ଅଟୋ ଉପରେ ପଡ଼ିଯାଇଥିଲା। ଫଳରେ ସେଥିରେ ଚାପି ହୋଇ ସାବନ୍ତୀଙ୍କର ଘଟଣାସ୍ଥଳରେ ମୃତ୍ୟୁ ଘଟିଛି। ଫଳରେ ଘଟଣାସ୍ଥଳରେ ଉତ୍ତେଜନା ଦେଖାଦେଇଛି। ଖବର ପାଇ ଦାରିଙ୍ଗବାଡ଼ି ପୋଲିସ ଘଟଣା ସ୍ଥଳରେ ପହଞ୍ଚି ମୃତଦେହକୁ ଜବତ କରିବା ସହ ଉତ୍ତ୍ୟକ୍ତ ଲୋକଙ୍କୁ ବୁଝାଶୁଝା କରିଛି।
ଦାରିଙ୍ଗବାଡ଼ିରୁ ପ୍ଳିହେରି ଏବଂ ଦାରିଙ୍ଗବାଡ଼ିରୁ ଶ୍ରାନିକେତା ମଧ୍ୟରେ ବହୁ ଗଛ ବିପଦସଙ୍କୁଳ ଅବସ୍ଥାରେ ରହିଛି। ତେଣୁ ଏହାକୁ ହଟାଯିବା କିମ୍ବା ଗାର୍ଡ ୱାଲକରି ଗଛକୁ ସୁରକ୍ଷିତ ରଖାଯିବା ପାଇଁ ଅଞ୍ଚଳବାସୀ ଦାବି କରିଛନ୍ତି।
