ଇସ୍ଲାମାବାଦ,୭।୯: ପାକିସ୍ତାନ ପୁଣିଥରେ ଭାରତ ପ୍ରତି ଥିବା ତା’ର ନକରାତ୍ମକ ଭାବର ପ୍ରକାଶ କରିଛି। ଭାରତର ମହତ୍ତ୍ୱାକାଂକ୍ଷୀ ଚନ୍ଦ୍ରୟାନ-୨ର ବିଫଳତା ପରେ ପାକିସ୍ତାନ ଏହାକୁ ନେଇ ଭାରତକୁ ଅଟ୍ଟହାସ୍ୟ କରିଛି। ପାକିସ୍ତାନର ମନ୍ତ୍ରୀ ଫୟାଦ ଚୌଧୁରୀ ଟୁଇଟ୍ କରି କହିଛନ୍ତି,‘ଯେଉଁକାମ ଆସୁନାହିଁ ସେଥିରେ ହାତ ମାରିବା ଉଚିତ୍ ନୁହେଁ ବନ୍ଧୁ ଭାରତ’। ଏଠାରେ ସେ ଭାରତକୁ ବନ୍ଧୁ ବୋଲି ମଧ୍ୟ ସମ୍ବୋଧନ କରିଛନ୍ତି ଆଉ କଟାକ୍ଷ ମଧ୍ୟ କରିଛନ୍ତି। ସୂଚନାଯୋଗ୍ୟ, ଭାରତର ଦ୍ୱିତୀୟ ଚନ୍ଦ୍ର ମିଶନ ଚନ୍ଦ୍ରୟାନ-୨ର ଲ୍ୟାଣ୍ଡର ‘ବିକ୍ରମ’ ଶୁକ୍ରବାର ରାତି ୨ଟା ୧୫ ମିନିଟ ସୁଦ୍ଧା ଚନ୍ଦ୍ରପୃଷ୍ଠରେ ପାଦ ଥାପିବାରେ ଅସଫଳ ହୋଇଛି। ପୂର୍ବରୁ ଜମ୍ମୁ-କଶ୍ମୀରରୁ ଅନୁଚ୍ଛେଦ ୩୭୦ ଉଚ୍ଛେଦ ପରେ ପାକିସ୍ତାନ ଏହାକୁ ନେଇ ଭାରତକୁ ଅନେକ ସମାଲୋଚନା କରିବା ସହ ଏ ଦିଗରେ ଅନ୍ୟ ଦେଶଙ୍କ ସହଯୋଗ ଲୋଡିଥିଲା ସତ। ହେଲେ ତାକୁ କୌଣସି ଦେଶରୁ ସହାୟତା ମିଳି ନ ଥିଲା। ଆଉ ଏହି ଘଟଣା ମନରୁ ନ ଲିଭୁଣୁ ଏବେ ଚନ୍ଦ୍ରୟାନ-୨କୁ ନେଇ ପୁଣି ଥରେ ପାକିସ୍ତାନ ଯାହା କହିଛି ତା’ର ମଧ୍ୟ ଉତ୍ତର ରଖିଛନ୍ତି ସୋସିଆଲ ମିଡିଆ ୟୁଜର୍ସ। କିଏ କହିଛି ଭାରତ ପୂର୍ବରୁ ପାକିସ୍ତାନ ପ୍ରଥମେ ମହାକାଶ ଯାତ୍ରା ଆରମ୍ଭ କରିଥିଲା। ହେଲେ ଆଜି ସେ କେତେ ପଛରେ ତାହା ବୋଧହୁଏ ତାକୁ ଜଣାନାହିଁ। ଆଉ ଏବେ ଭାରତ ମଙ୍ଗଳ ମିଶନରେ ସଫଳତା ପାଇଥିବା ବେଳେ ପାକିସ୍ତାନ ମଙ୍ଗଳ କଥା ସ୍ବପ୍ନରେ ବି ଭାବି ପାରିବ ନାହିଁ ବୋଲି ସୋସିଆଲ ମିଡିଆ ୟୁଜର୍ସ କହିଛନ୍ତି।
