ବାରଙ୍ଗ,୫।୧(ଡି.ଏନ୍.ଏ): ପ୍ରାଣୀ ଉଦ୍ୟାନ ନନ୍ଦନକାନନରେ ଚିତ୍ରାହରିଣମାନଙ୍କ ସଂଖ୍ୟା ଗତ କିଛିଦିନ ମଧ୍ୟରେ ବଢ଼ିବାରେ ଲାଗିଛି। ଏହାକୁ ଦୃଷ୍ଟିରେ ରଖି ନନ୍ଦନକାନନ କର୍ତ୍ତୃପକ୍ଷ ଚିତ୍ରାହରିଣଙ୍କୁ ଚନ୍ଦକା ଜଙ୍ଗଲରେ ଛାଡିବାର ଅଭିଯାନ ଆରମ୍ଭ କରିଛନ୍ତି। ଏ ନେଇ ଶନିବାର ଚତୁର୍ଥ ପର୍ଯ୍ୟାୟରେ ୭ଟି ଚିତ୍ରାହରିଣକୁ ନେଇ ଚନ୍ଦକାରେ ଛଡ଼ାଯାଇଥିବାବେଳେ ମୋଟ ୨୬ଟି ହରିଣ ଚନ୍ଦକାକୁ ଯାଇଥିବାର ଜଣାପଡିଛି। ସେହିଭଳି ବଟାନିକାଲ ଗାର୍ଡେନର ଶାଗୁଣା ପ୍ରଜନନ କେନ୍ଦ୍ରରେ ଥିବା ଗ୍ବାଲିଅରରୁ ଆସିଥିବା ଭାରତୀୟ ଲମ୍ବାଥଣ୍ଟିଆ ଶାଗୁଣା ଡିସେମ୍ବର ୨୪ତାରିଖରେ ପ୍ରଥମଥର ପାଇଁ ଦେଇଥିବା ଅଣ୍ଡାକୁ ଶୁକ୍ରବାର ନନ୍ଦନକାନନ କର୍ତ୍ତୃପକ୍ଷ ଡାକ୍ତରଖାନାକୁ ଆଣିଛନ୍ତି। ଏହି ଅଣ୍ଡାକୁ ଡାକ୍ତରଖାନାରେ ଥିବା ଅଣ୍ଡାଉଷୁମା ଯନ୍ତ୍ରରେ ରଖାଯାଇଛି। ଏହାସହ ୩୭ଏଫ ଏନକ୍ଲୋଜରରେ ରହୁଥିବା କଟାସ ଶନିବାର ସକାଳେ ୩ଟି ଛୁଆ ଦେଇଥିବାର କର୍ମଚାରୀମାନେ ଦେଖିଥିଲେ। ପୂର୍ବରୁ ୨ଥର ଜନ୍ମିତ ଛୁଆକୁ ମାରି ଚର୍ଚ୍ଚାରେ ରହିଥିବା ମା’ କଟାସଠାରୁ ଛୁଆ ୩ଟିକୁ ନନ୍ଦନକାନନ କର୍ତ୍ତୃପକ୍ଷ ଉଦ୍ଧାର କରିଛନ୍ତି। ଏହି ଛୁଆ ତିନିଟିକୁ ଡାକ୍ତରଖାନାର ଲାଳନପାଳନ କେନ୍ଦ୍ର ଦାୟିତ୍ୱରେ ଥିବା କର୍ମଚାରୀଙ୍କୁ ହସ୍ତାନ୍ତର କରିଛନ୍ତି। ଫଳରେ କଟାସ ସଂଖ୍ୟା ବୃଦ୍ଧିପାଇ ୭ରେ ପହଞ୍ଚତ୍ଛି।
