ଭୁବନେଶ୍ୱର, ୬।୪(ବ୍ୟୁରୋ): ରାଜଧାନୀ ଭୁବନେଶ୍ୱରରେ କରୋନା ଆକ୍ରାନ୍ତଙ୍କ ସଂଖ୍ୟା ବଢ଼ିବାରେ ଲାଗିଛି। ରବିବାର ଗୋଟିଏ ଦିନରେ ଭୁବନେଶ୍ୱରରେ ୧୮ ଜଣ କରୋନା ପଜିଟିଭ୍ ଚିହ୍ନଟ ହୋଇଛନ୍ତି। କେବଳ ରାଜଧାନୀରେ କରୋନା ପଜିଟିଭ ସଂଖ୍ୟା ୩୦ରୁ ଊର୍ଦ୍ଧ୍ୱ ହୋଇଛି। ତେଣୁ ବିଏମ୍ସି ପକ୍ଷରୁ ଲୋକଙ୍କ ସୁରକ୍ଷା ପାଇଁ ନିୟମକୁ କଡ଼ାକଡ଼ି କରାଯାଉଛି। ଅତ୍ୟାବଶ୍ୟକ ସାମଗ୍ରୀ ବିଏମ୍ସି ମୋବାଇଲ ଭ୍ୟାନ୍ ମାଧ୍ୟମରେ ଘରେ ପହଞ୍ଚାଯିବ। ଏଥିପାଇଁ ୨ଶହ ମୋବାଇଲ ଭ୍ୟାନ ହୋମ ଡେଲିଭରି କରିବ ବୋଲି ବିଏମସି କମିଶନର ପ୍ରେମଚନ୍ଦ୍ର ଚୌଧାରୀ କହିଛନ୍ତି। ଏ ନେଇ ୨ଟି ହେଲ୍ପ ଲାଇନ୍ ନମ୍ବର ଜାରି କରାଯାଇଛି। ବିଏମ୍ସି ହେଲ୍ପ ଲାଇନ୍ ନମ୍ବର ୧୯୨୯ ଏବଂ ପୋଲିସ ହେଲ୍ପ ଲାଇନ୍ ନମ୍ବର ୧୦୦। କୌଣସି ଅସୁବିଧା ହେଲେ ଫୋନ୍ କରିବାକୁ ଅନୁରୋଧ କରାଯାଇଛି।
ସୋମବାର କେତେକ ସ୍ଥାନରେ ଗ୍ରୋସରୀ ପାଇଁ ଲୋକଙ୍କୁ ଅସୁବିଧା ହେଉଥିବା ଦେଖିବାକୁ ମିଳୁଛି। ସହରର ବିଭିନ୍ନ ସ୍ଥାନରେ ବସୁଥିବା ହାଟରେ ମଧ୍ୟ ଲୋକଙ୍କ ଭିଡ ଜମୁଛି। ଏହାକୁ ଦୃଷ୍ଟିରେ ରଖି ନୂଆ ଜାଗାରେ ଡେଲି ମାର୍କେଟ ବସିବ ବୋଲି ବିଏମ୍ସି ପକ୍ଷରୁ କୁହାଯାଇଛି। ଏଥିପାଇଁ ୬୮ଟି ନୂଆ ସ୍ଥାନ ଚିହ୍ନଟ ହୋଇଛି। ଚିହ୍ନଟ ସ୍ଥାନ ବ୍ୟତୀତ ବ୍ୟବସାୟୀମାନେ ଅନ୍ୟ କୌଣସି ସ୍ଥାନରେ ବସିପାରିବେ ନାହିଁ। ଏହାସହିତ ଦୋକାନ ସାମ୍ନାରେ ଯେପରି ସାମାଜିକ ଦୂରତ୍ୱକୁ ଲୋକେ ମାନିବେ ସେଥିପ୍ରତି ଉପରେ ଦୃଷ୍ଟି ଦିଆଯିବ ବୋଲି ବିଏମ୍ସି ପକ୍ଷରୁ କୁହାଯାଇଛି।
