ବେଙ୍ଗାଲୁରୁ, ୩।୧: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ୨ ଦିନିଆ କର୍ନାଟକ ଗସ୍ତରେ ଯାଇଛନ୍ତି। ଏହି ଅବସରରେ ସେ ଭାରତୀୟ ବିଜ୍ଞାନ କଂଗ୍ରେସର ୧୦୭ତମ ସମ୍ମିଳନୀରେ ଯୋଗଦେଇ ଗ୍ରାମୀଣ ବିକାଶରେ ଜ୍ଞାନକୌଶଳର ଉପଯୋଗ ଉପରେ ଗୁରୁତ୍ୱାରୋପ କରିଛନ୍ତି। ଜ୍ଞାନକୌଶଳ ଉପଯୋଗକୁ ବ୍ୟାପକ କରିବା ନେଇ ଯୁବ ବୈଜ୍ଞାନିକଙ୍କୁ ପ୍ରଧାନମନ୍ତ୍ରୀ ଆହ୍ବାନ ଜଣାଇଛନ୍ତି। ଭାରତ ମହାକାଶ ଗବେଷଣାରେ ବେଶ୍ ଅଗ୍ରଗତି କରିଥିବାବେଳେ ସମୁଦ୍ର ତଳର ରହସ୍ୟ ଉନ୍ମୋଚନ ପାଇଁ ଲଗାତାର ପ୍ରୟାସ ଜାରି ରଖିଥିବା ସେ କହିଛନ୍ତି। ସାମୁଦ୍ରିକ ଶକ୍ତିର ବିକାଶ ସହିତ ଏହି ସମ୍ପଦର ବହୁଳ ବ୍ୟବହାର ଭବିଷ୍ୟତର ବହୁବିଧ ଚାହିଦାକୁ ପୂରଣ କରିବାକୁ ସକ୍ଷମ ହେବ ବୋଲି ସେ କହିଛନ୍ତି। ତେବେ କୃଷି କ୍ଷେତ୍ରରେ ଜ୍ଞାନକୌଶଳ ଉପଯୋଗ ଦ୍ୱାରା ଏକ ନୂତନ କ୍ରାନ୍ତି ଅଣାଯିବାର ଆବଶ୍ୟକତା ଥିବା ପ୍ରଧାନମନ୍ତ୍ରୀ କହିଛନ୍ତି।
