ଗୋଆରେ ଓଡ଼ିଆ ମହିଳା ଶ୍ରମିକଙ୍କୁ ହତ୍ୟା
8:11 amFebruary 21, 2020February 21, 2020 / 21

ପାଟପୁର,୨୧ା୨- ଗଞ୍ଜାମ ଜିଲା ସାନଖେମୁଣ୍ଡି ବ୍ଲକ ଟି.ଗୋବିନ୍ଦପୁର ପଞ୍ଚାୟତ ବୁରେଇପାହାଡ଼ ଗ୍ରାମର ଜଣେ ମହିଳା ଶ୍ରମିକଙ୍କୁ ଗତ ୭ ତାରିଖରେ ଗୋଆରେ ହତ୍ୟା କରାଯାଇଛି। ସେ ହେଲେ ସାବିତ୍ରୀ ଶବର। ସାବିତ୍ରୀଙ୍କ ଭାଇ ମୃତଦେହ ଫେରାଇ ଆଣିବାକୁ ପାଟପୁର ଥାନା ଅଧିକାରୀଙ୍କୁ ଗୁରୁବାର ନିବେଦନ କରିବା ପରେ ଘଟଣା ଜଣାପଡିଥିଲା। ପ୍ରକାଶ ଯେ, ଗୋଆ ପୋଲିସ ଗତ ୧୨ ତାରିଖରେ ସାବିତ୍ରୀଙ୍କ ପରିବାର ଲୋକଙ୍କୁ ଫୋନ କରି ତାଙ୍କ ମୃତଦେହ ନେଇଯିବାକୁ କହିଥିଲେ। କିପରି ମୃତଦେହ ଆଣିବେ ସେ ନେଇ ପରିବାର ଚିନ୍ତାରେ ଥିଲେ। ବୁଧବାର ପୁଣି ଗୋଆ ପୋଲିସ ସାବିତ୍ରୀଙ୍କ ଭାଇ ତମାସଙ୍କୁ ଫୋନ କରି ମୃତଦେହ କେବେ ଆସି ନେବେବୋଲି ପଚାରିଥିଲେ। ଶେଷରେ ତମାସ ପାଟପୁର ଥାନା ଅଧିକାରୀ ଅଜୟ କୁମାର ବାରିକଙ୍କୁ ମୃତଦେହ ଫେରାଇ ଆଣିବାକୁ ନିବେଦନ କରିଛନ୍ତି। ଜିଲା ପ୍ରଶାସନ ସହାୟତାରେ ସାବିତ୍ରୀଙ୍କ ମୃତଦେହ ଆଣିବାକୁ ପଦକ୍ଷେପ ନିଆଯିବ ବୋଲି ଥାନା ଅଧିକାରୀ କହିଛନ୍ତି। ଏନେଇ ଗୋଆରୁ ଆସିଥିବା ଫୋନ୍‌ ନମ୍ବରରେ ଯୋଗାଯୋଗ କରିବାରୁ ଉକ୍ତ ନମ୍ବରଟି ପୋର୍‌ଭୋରିମ ଥାନାର ବୋଲି ଜଣାପଡିଥିଲା। ସାବିତ୍ରୀଙ୍କୁ ଗତ ୭ ତାରିଖରେ ହତ୍ୟା କରାଯାଇଥିଲା, ୧୦ ତାରିଖରେ ତାଙ୍କ ମୃତଦେହ ଜବତ କରିଥିଲୁ। ହତ୍ୟା ଅଭିଯୋଗରେ ଗଞ୍ଜାମ ଅଞ୍ଚଳର ଜଣେ ଓଡ଼ିଆ ଯୁବକଙ୍କୁ ମଧ୍ୟ ଅଟକ ରଖିଛୁ ବୋଲି ସମ୍ପୃକ୍ତ ଥାନାର ପୋଲିସ ଅଧିକାରୀ କହିଛନ୍ତି। ସୂଚନାଯୋଗ୍ୟ, ୫ ବର୍ଷ ତଳେ ସାବିତ୍ରୀଙ୍କ ସ୍ବାମୀ କାଳିକା ବଡରଇତ କେଉଁଆଡେ ଚାଲିଯିବାପରେ ସେ ରୋଜଗାର ପାଇଁ ଗୋଆ ଚାଲିଯାଇଥିଲେ।