ବଡ଼ବିଲ/ଯୋଡ଼ା,୧୯।୬(ଡି.ଏନ୍.ଏ/ସ୍ବ.ପ୍ର)-କେନ୍ଦୁଝର ଜିଲା ଚମ୍ପୁଆ ଫରେଷ୍ଟ ରେଞ୍ଜର ଗୁରୁବେଡା ବୈତରଣୀ(ଖ)ସଂରକ୍ଷିତ ଜଙ୍ଗଲରେ୨ ହାତୀଙ୍କ ମୃତ୍ୟୁ ଘଟଣାରେ ଶୁକ୍ରବାର ୩ ଅଭିଯୁକ୍ତ ବନବିଭାଗ ନିକଟରେ ଆତ୍ମସମର୍ପଣ କରିଛନ୍ତି। ଏହାପରେ ବିନବିଭାଗ ସେମାନଙ୍କୁ ଗିରଫ କରିଛି। ଗିରଫ ଅଭିଯୁକ୍ତମାନେ ହେଲେ ଗୁରୁବେଡା ଭୋଳବେ ଗ୍ରାମର ଶ୍ରୀଧର ମୁଣ୍ଡା, ବିନ୍ଦରାଇ ମୁଣ୍ଡା ଓ ମାତଲୁ ମୁଣ୍ଡା। ଅନ୍ୟପଟେ ଅଭିଯୁକ୍ତଙ୍କ ନିକଟରୁ ହାତୀ ଦାନ୍ତ ଉଦ୍ଧାର କରିପାରିନି ବନବିଭାଗ। ଯାହାକି ବନବିଭାଗର ମୁଣ୍ଡ ବିନ୍ଧାର କାରଣ ପାଲଟିଛି।
ଅଭିଯୁକ୍ତମାନେ କହିଛନ୍ତି, ଗତ ଶନିବାର ରାତିରେ ସେମାନେ ବାର୍ହା ଶିକାର ପାଇଁ ଜଙ୍ଗଲରେ ବିଦ୍ୟୁତ୍ ତାର ବିଛାଇଥିଲେ। ରବିବାର ଭୋର ସମୟରେ ଜଙ୍ଗଲକୁ ତାର ଫିଟାଇବାକୁ ଯାଇ ଦେଖିଲାବେଳକୁ ଉକ୍ତ ତାର ସଂସ୍ପର୍ଶରେ ଆସି ୨ଟି ହାତୀ ମୃତ୍ୟୁବରଣ କରିଥିଲେ। ପରେ ମୃତ ହାତୀ ଦ୍ୱୟଙ୍କୁ ଦେଖି ଭୟଭୀତ ହୋଇ ସେଠାରୁ ଚାଲିଯାଇଥିଲେ। ହାତୀ ଦାନ୍ତ ବିଷୟରେ ଆମକୁ କିଛି ଜଣା ନାହିଁ ବୋଲି ଅଭିଯୁକ୍ତମାନେ ପ୍ରକାଶ କରିଛନ୍ତି। ଏ ନେଇ କେନ୍ଦୁଝର ଡିଏଫଓ ସନ୍ତୋଷ ଯୋଶୀ କହିଛନ୍ତି, ତଦନ୍ତ ଚାଲିଛି। ଦାନ୍ତ ଉଦ୍ଧାର ପାଇଁ ଚେଷ୍ଟା କରାଯାଉଛି।
