ଗାୟିକା ଜାନକୀ ସାମଲ। ସେ କେବଳ ଗୀତ ଗାଆନ୍ତିନି, ଗୀତକୁ ପ୍ରାଣଭରି ଭଲ ପାଆନ୍ତି। ଗୀତକୁ ଏତେ ଭଲ ପାଆନ୍ତି ଯେ, ଗୀତ ପାଇଁ ଦୁଇ ଦୁଇଥର ଘର ଛାଡ଼ି ପଳେଇ ଯାଇଛନ୍ତି। ଶେଷକୁ ସେ ନିଜର ଏକ ଠିକଣା ତିଆରି କରିପାରିଛନ୍ତି। ଏବେ ଓଡ଼ିଆ ଯାତ୍ରାଜଗତରେ ଜାନକୀ ଜଣେ ବେଶ୍ ଜଣାଶୁଣା ଗାୟିକା। ମୁଖ୍ୟତଃ ରୋମାଣ୍ଟିକ୍ ଡୁଏଟ୍ ବା ଲଭ୍ସଙ୍ଗ ଗାଇବାରେ ରୁଚି ରଖୁଥିବା ଜାନକୀଙ୍କ ଘର ଭଦ୍ରକ ଜିଲା ଧାମନଗର ଅନ୍ତର୍ଗତ ଭଣ୍ଡାରିପଦୀ ଗ୍ରାମରେ। ବାପା ଆନନ୍ଦ ସାମଲ ଜଣେ ବଂଶୀବାଦକ। ତାଙ୍କଠାରୁ ଜାନକୀ ଗୀତ ଶିଖିବା ଆରମ୍ଭ କରିଥିଲେ। ଯେଉଁଠି ମେଳା ହେଉଥିଲା ସେଠାକୁ ଯାଉଥିଲେ ଆଉ ଗୀତ ଗାଉଥିଲେ। ସେତେବେଳକୁ ସେ ସପ୍ତମ ଶ୍ରେଣୀରେ ପଢୁଥାନ୍ତି। ସେହିବର୍ଷ ଗଁାକୁ ‘ଉତ୍ତରବାହିନୀ ଅପେରା’ ଆସିଥିଲା। ଅପେରାର ଶିଶୁ କଳାକାରମାନେ ତାଙ୍କରି ଘରେ ରହୁଥିଲେ। ସେମାନଙ୍କ ସହିତ ଜାନକୀଙ୍କର ଭାବଦୋସ୍ତି ହୋଇଗଲା। ସେମାନଙ୍କ ସହିତ ସେ ଘରୁ ଲୁଚି ପଳେଇଗଲେ। ଘରେ ତାଙ୍କୁ ନ ପାଇ ଚାରିଆଡ଼େ ଖୋଜାଖୋଜି କଲେ। ଶେଷକୁ ଖବର ପାଇ ବାପା ଯାଇ ଯାତ୍ରାପାର୍ଟିରୁ ଜାନକୀଙ୍କୁ ନେଇ ଆସିଲେ ଘରକୁ। ପୁଣି ପାଠ ପଢ଼ିଲେ ଜାନକୀ। କିଛିଦିନ ଗଲା। ଏଥର ତାଙ୍କ ଗଁାକୁ ଆସିଲା ‘ବିଶ୍ୱମାତା ଅପେରା’। ପୁଣି ସେହି ଘଟଣା ଘଟିଲା। ସେ ଘରେ କାହାକୁ କିଛି ନ ଜଣେଇ ‘ବିଶ୍ୱମାତା ଅପେରା’ରେ ପଳେଇଗଲେ। ଏଥର ଆଉ ବାପା ଆଣିବାକୁ ଗଲେନି। ଏମିତି ଭାବରେ ଆରମ୍ଭ ହେଲା ଜାନକୀଙ୍କ ଯାତ୍ରା ଜୀବନ। ଅବଶ୍ୟ ପ୍ରଥମେ ତାଙ୍କୁ ଗୀତ ଗାଇବାକୁ ମିଳିଲା ନାହିଁ। ସେ ରାଧା, କୃଷ୍ଣ ଆଦି ଶିଶୁ କଳାକାର ଭୂମିକାରେ ଅଭିନୟ କଲେ। ଦିନେ ‘ବିଶ୍ୱମାତା ଅପେରା’ର ଗାୟିକା ପାର୍ଟି ଛାଡ଼ି ଚାଲିଗଲେ। ଆଉ ଦ୍ୱିତୀୟ ଗାୟିକା ନ ଥିଲେ ପାର୍ଟିରେ। ତେଣୁ ପାର୍ଟି ପକ୍ଷରୁ ଜାନକୀଙ୍କୁ ଗୀତ ଗାଇବାକୁ କୁହାଗଲା। ସେଇଠୁ ଆରମ୍ଭ ହେଲା ତାଙ୍କର ଗାୟିକା ଜୀବନ। ସେହି ପାର୍ଟିରୁ ସେ ପାଇଲେ ତାଙ୍କର ଜୀବନସାଥୀ ବୀରେନ ସାମଲଙ୍କୁ। ବୀରେନ୍ ଜଣେ ଷ୍ଟଣ୍ଟ ଡ୍ୟାନ୍ସର। ପରସ୍ପର ସିନା ଭଲ ପାଇଲେ। ହେଲେ କାହାରି ପରିବାର ଏ ବାହାଘରରେ ରାଜି ହେଲେନାହିଁ। ସେଥିଲାଗି ଉଭୟ ବୀରେନ ଓ ଜାନକୀ ସମ୍ବଲପୁର ଚାଲିଗଲେ ଓ ସେଠାକାର ‘ଭାରତୀ ଗଣନାଟ୍ୟ’ରେ କାମକଲେ। ଇତିମଧ୍ୟରେ ଜାନକୀ ଗର୍ଭବତୀ ହେଲେ। ଏ ଖବର ପାଇବା ପରେ ବୀରେନ୍ଙ୍କ ବାପା ଯାଇ ବୋହୂ ଜାନକୀଙ୍କୁ ଘରକୁ ନେଇ ଆସିଲେ। ଜାନକୀ କହନ୍ତି, ତାଙ୍କ ଗୀତ ଗାଇବା ପଛରେ ରହିଛି ଶ୍ୱଶୁରଙ୍କ ପ୍ରେରଣା। ‘କଳିଙ୍ଗକନ୍ୟା’, ‘ରଙ୍ଗମହଲ’ ଆଦି ଯାତ୍ରାନୁଷ୍ଠାନରେ ଜଣେ ସଫଳ ଗାୟିକା ଭାବରେ ଭୂମିକା ନିର୍ବାହ କରି ଜାନକୀ ଏବେ ଆସି ପହଞ୍ଚତ୍ଛନ୍ତି ‘ଶିବାନୀ ଗଣନାଟ୍ୟ’ରେ। ମୁଖ୍ୟତଃ ଲତା ମଙ୍ଗେସକରଙ୍କ ଗୀତ ଗାଉଥିବା ଜାନକୀ ଚଳିତବର୍ଷ ‘ଶିବାନୀ ଗଣନାଟ୍ୟ’ର ନାଟକ ‘ବଉଲୋ ମୁଁ ବୋହୂ ହେବିନି’, ‘ସବୁ ଅଧା ଅଧା ନଁାଟି ରାଧା’, ‘ରଙ୍ଗ ଲଗେଇଛି ରଙ୍ଗନାଗରୀ’ ଏବଂ ‘ବାହାଘର ନୁହେଁ ବାହା ବଜାର’ ଆଦି ନାଟକର ଲଭ୍ ଟ୍ରାକ୍ ସବୁରେ କଣ୍ଠଦାନ କରିଛନ୍ତି।
