ନୂଆଦିଲ୍ଲୀ,୨୩।୫: ସଭାପତି ସୌରଭ ଗାଙ୍ଗୁଲି ଓ ସମ୍ପାଦକ ଜୟ ଶାହାଙ୍କ କାର୍ଯ୍ୟକାଳକୁ ପୂରା ୩ ବର୍ଷକୁ ବୃଦ୍ଧି କରିବା ପାଇଁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ପ୍ରୟାସ ଆରମ୍ଭ କରିଛି। ଜଷ୍ଟିସ୍ ଆର୍.ଏମ୍. ଲୋଧା ପ୍ୟାନେଲର ସଂସ୍କାରମୂଳକ ପ୍ରସ୍ତାବ ଅନୁସାରେ ଗାଙ୍ଗୁଲି ଓ ଶାହାଙ୍କୁ ଏବେ ୩ ବର୍ଷୀୟ କୁଲିଂ ଅଫ୍ ପିରିୟଡ ଦେଇ ଗତିକରିବାକୁ ହେବ। ବିସିସିଆଇର ପରିବର୍ତ୍ତିତ ସଂସ୍କାରମୂଳକ ସମ୍ବିଧାନ ଅନୁସାରେ ଗାଙ୍ଗୁଲିଙ୍କୁ ଜୁଲାଇ ଓ ଶାହାଙ୍କୁ ଜୁନ୍ରେ ଏହି ପିରିୟଡକୁ ଯିବାର କାର୍ଯ୍ୟକ୍ରମ ରହିଛି। ତେବେ ସମ୍ବିଧାନ ପରିବର୍ତ୍ତନ କରିବାକୁ ଓ ଏହି ଦୁଇଜଣ କ୍ରିକେଟ ପ୍ରଶାସକଙ୍କ କାର୍ଯ୍ୟକାଳ ପୂରା ୩ ବର୍ଷକୁ ବଢାଇବାକୁ ବିସିସିଆଇ ଏବେ ସୁପ୍ରିମକୋର୍ଟ ଯାଇଛି।
ବିସିସିଆଇ କୋଷାଧ୍ୟକ୍ଷ ଅରୁଣ ସିଂ ଧୂମାଲ ଗତବର୍ଷ ଡିସେମ୍ବର ୧ ତାରିଖରେ କୁଲିଂ ଅଫ୍ ପିରିୟଡ ନେଇ ବୋର୍ଡ ସମ୍ବିଧାନରେ ପରିବର୍ତ୍ତନ କରାଯାଇଛି ବୋଲି ଦର୍ଶାଇଛନ୍ତି ଓ ସେ ଏ ନେଇ ସୁପ୍ରିମକୋର୍ଟରେ ଆବେଦନ କରିଛନ୍ତି। ସମ୍ବିଧାନ ଅନୁସାରେ ଯେଉଁ ପ୍ରଶାସକମାନେ ବିସିସିଆଇ କିମ୍ବା ରାଜ୍ୟ ଆସୋସିଏଶନଗୁଡିକରେ ଦୁଇଥର କାର୍ଯ୍ୟକାଳ ପୂରଣ କରିଛନ୍ତି, ସେମାନେ ବାଧ୍ୟତାମୂଳକ ଭାବେ ୩ ବର୍ଷିଆ କୁଲିଂ ଅଫ୍ ପିରିୟଡ୍ରେ ଯିବେ। ତେଣୁ ଏହି ଦୃଷ୍ଟିକୋଣରୁ ଦେଖିବାକୁ ଗଲେ ଗାଙ୍ଗୁଲି ଓ ଶାହାଙ୍କୁ କ୍ରିକେଟ ପ୍ରଶାସନରୁ ୩ ବର୍ଷ ଦୂରେଇ ରହିବାକୁ ପଡିବ। ଏହି ଦୁଇଜଣ ଗତବର୍ଷ ବିନା ପ୍ରତିଦ୍ୱନ୍ଦ୍ୱିତାରେ ନିର୍ବାଚିତ ହୋଇଥିଲେ। ପୂର୍ବରୁ ଗାଙ୍ଗୁଲି କ୍ରିକେଟ ଆସୋସିଏଶନ ଅଫ ବେଙ୍ଗଲ୍ (ସିଏବି) ଅଧ୍ୟକ୍ଷ ରୂପେ ୫ ବର୍ଷ କାର୍ଯ୍ୟ କରିଥିଲେ। ଫଳରେ ସେ ବୋର୍ଡ ଅଧ୍ୟକ୍ଷ ଭାବେ ମାତ୍ର ୯ ମାସ କାର୍ଯ୍ୟ କରିବାର ସୁଯୋଗ ରହିଛି। ସେହିପରି ଶାହା ମଧ୍ୟ ଗୁଜରାଟ କ୍ରିକେଟ ଆସୋସିଏଶନର ସମ୍ପାଦକ ରୂପେ କାର୍ଯ୍ୟ କରିଥିଲେ। ସମ୍ବିଧାନ ସଂଶୋଧନ ଅନୁଯାୟୀ ଗାଙ୍ଗୁଲି ଓ ଶାହାଙ୍କୁ ପୂରା ୩ ବର୍ଷିଆ କାର୍ଯ୍ୟକାଳ ପୂରା କରିବାରେ କୌଣସି ସମସ୍ୟା ରହିବ ନାହିଁ। ଏବେ ସୁପ୍ରିମକୋର୍ଟଙ୍କ ନିଷ୍ପତ୍ତି ଉପରେ ସବୁକିଛି ନିର୍ଭର କରୁଛି।
