ଶ୍ରୀନଗର,୩୧ା୧୦(ପି.ଟି./ଆଇଏଏନ୍ଏସ୍): ଯୁଦ୍ଧ ପ୍ରଭାବିତ ସିରିଆ କିମ୍ବା ଆଫଗାନିସ୍ତାନ ଭଳି ସ୍ଥିତି ଜମ୍ମୁ-କଶ୍ମୀରରେ ସୃଷ୍ଟି ନ ହେଉ। କଶ୍ମୀର ଆଉ ଏକ ସିରିଆ କି ଆଫଗାନିସ୍ତାନ ନ ପାଲଟୁ। ଉପତ୍ୟକାରେ ଅରାଜକତା ଓ ହିଂସା ଲାଗି ନ ରହୁ। ଦୁଇଦିନିଆ କଶ୍ମୀର ଗସ୍ତରେ ଆସିଥିବା ୟୁରୋପୀୟ ପାର୍ଲାମେଣ୍ଟ ସଦସ୍ୟ(ଇଏମ୍ପି)ମାନେ ବୁଧବାର ଏଭଳି ଆଶା କରିଛନ୍ତି। ଏହାସହ କଶ୍ମୀର ସ୍ଥିତି ଖରାପ ହେବା ପାଇଁ ସେମାନେ ଆତଙ୍କବାଦକୁ ଦାୟୀ କରିବା ସହ ଶାନ୍ତି ଫେରାଇ ଆଣିବା ପାଇଁ କେନ୍ଦ୍ର ସରକାରଙ୍କ ଉଦ୍ୟମକୁ ପ୍ରଶଂସା କରିଛନ୍ତି। ୨୩ଜଣିଆ ପ୍ରତିନିଧି ଦଳ କଶ୍ମୀର ଗସ୍ତ ଶେଷ କରିବା ପରେ ଶ୍ରୀନଗରସ୍ଥିତ ଏକ ହୋଟେଲରେ ଖବରଦାତା ସମ୍ମିଳନୀକୁ ସମ୍ବୋଧିତ କରିଛନ୍ତି। ପ୍ରତିନିଧି ଦଳ ସଦସ୍ୟମାନେ କହିଛନ୍ତି, ଭାରତୀୟ ରାଜନୀତିରେ ହସ୍ତକ୍ଷେପ ପାଇଁ ନୁହେଁ, ବରଂ କଶ୍ମୀର ସମସ୍ୟାର ସମାଧାନ ପାଇଁ ସହଯୋଗର ଉପାୟ ବାହାର କରିବାକୁ ଏଠାକୁ ଆସିଛୁ। ଉତ୍ତେଜନା ହ୍ରାସ ଲାଗି ଭାରତ-ପାକିସ୍ତାନ ଲଢ଼େଇ ନ କରି ଆଲୋଚନା କରିବା ଉଚିତ ବୋଲି ସେମାନେ ମତବ୍ୟକ୍ତ କରିଛନ୍ତି। ଫ୍ରାନ୍ସର ହେନରି ମାଲୁସେ କହିଛନ୍ତି, ପ୍ରତିନିଧି ଦଳକୁ ଇସ୍ଲାମୋଫୋବିକ୍ (ଇସ୍ଲାମ ପ୍ରତି ଭୟ ସୃଷ୍ଟିକାରୀ), ଫାସିବାଦୀ ଏବଂ ଜାତିବାଦୀ ଭାବେ ଅଭିହିତ କରାଯିବା ଅନୁଚିତ। କଶ୍ମୀରର ବାସ୍ତବ ସ୍ଥିତି ପରଖିବା ପାଇଁ ସୁଯୋଗ ଦେଇଥିବାରୁ ସେ ଏହି ଅବସରରେ ଭାରତ ସରକାରଙ୍କୁ ଧନ୍ୟବାଦ ଦେଇଛନ୍ତି। ଅନ୍ତର୍ଜାତୀୟ ଗଣମାଧ୍ୟମରେ ପ୍ରକାଶ ପାଉଥିବା କଶ୍ମୀର ସମ୍ପର୍କିତ ରିପୋର୍ଟକୁ ନେଇ ପୋଲାଣ୍ଡ୍ର ରିସ୍ଜାର୍ଡ କାର୍ନେସ୍କି ଅସନ୍ତୋଷ ବ୍ୟକ୍ତ କରିଛନ୍ତି। ଆମେ ଏଠାରେ କ’ଣ ଦେଖିଲୁ ନିଜ ନିଜ ଦେଶକୁ ଫେରିଯିବା ପରେ ସେମାନଙ୍କୁ ଜଣାଇବୁ ବୋଲି ପ୍ରାଓ୍ବୋ ଆଇ ସ୍ପ୍ରାଓ୍ବିଡ୍ଲିଓ୍ବୋସ୍କ ପାର୍ଟି ନେତା ରିସ୍ଜାର୍ଡ କହିଛନ୍ତି। ଫ୍ରାନ୍ସର ରାସେମ୍ବଲମେଣ୍ଟ ନ୍ୟାଶନାଲ ପାର୍ଟି ନେତା ଥିଏରି ମାରିଆନି କହିଛନ୍ତି, ଫାସିବାଦୀ କହି ଆମର ଛବିକୁ ମଳିନ କରାଯାଇଛି। ଏପରି କରିବା ପୂର୍ବରୁ ଆମ ବିଷୟରେ ଭଲଭାବେ ଜାଣିବା ଦରକାର ଥିଲା।
ୟୁରୋପୀୟ ସଂଘର ସଦସ୍ୟମାନେ ଉପତ୍ୟକାର ବିଭିନ୍ନ ଅଞ୍ଚଳ ପରିଦର୍ଶନ କରି ସେନା, ପୋଲିସ, ପ୍ରଶାସନ, ନାଗରିକ ସମାଜ, ବ୍ୟବସାୟୀ, ଆଇନଜୀବୀ, କଳାକାର, ଟୁର୍ ଓ ଟ୍ରାଭେଲ ଅପରେଟର୍ସ ଏବଂ କେତେଜଣ ରାଜନେତାଙ୍କ ସହ ଆଲୋଚନା କରିଛନ୍ତି। ଏହି ଟିମ୍ରେ ପ୍ରଥମେ ୨୭ ସଦସ୍ୟ ରହିଥିଲେ। କିନ୍ତୁ ସେମାନଙ୍କ ମଧ୍ୟରୁ ୪ ଜଣଙ୍କୁ କଶ୍ମୀର ଆସିବାକୁ ଅନୁମତି ଦିଆଯାଇନାହିଁ।
ଗସ୍ତକୁ ନେଇ ଝଡ଼
ଇୟୁ ପ୍ରତିନିଧି ଦଳର କଶ୍ମୀର ଗସ୍ତକୁ ନେଇ ଝଡ଼ ସୃଷ୍ଟି ହୋଇଛି। କଂଗ୍ରେସ ସମେତ ବିରୋଧୀ ଦଳଗୁଡ଼ିକ ଏହାକୁ ‘କୂଟନୈତିକ ବିଫଳତା’ ଭାବେ ଅଭିହିତ କରି କେନ୍ଦ୍ର ସରକାରଙ୍କୁ ଟାର୍ଗେଟ କରିଛନ୍ତି। ସେହିପରି ଏହି ବିଦେଶୀ ପ୍ରତିନିଧି ଦଳକୁ ସରକାର କଶ୍ମୀର ଆସିବା ପାଇଁ କିପରି ଅନୁମତି ଦେଲେ ବୋଲି ଏନ୍ଡିଏର ଦୁଇ ସହଯୋଗୀ ସଂଯୁକ୍ତ ଜନତା ଦଳ (ଜେଡିୟୁ) ଓ ଶିବସେନା ମଧ୍ୟ ପ୍ରଶ୍ନ କରିଛନ୍ତି।
ମୁଖପାତ୍ର ରଣଦୀପ ସୁର୍ଜଓ୍ବୋଲା କହିଛନ୍ତି, ବିଗତ ୩ ଦିନ ଧରି ଭାଜପା ସରକାରର ଅପରିପକ୍ୱ, ମନ୍ଦ ପରାମର୍ଶ ଓ ଭୁଲ୍ ପରିକଳ୍ପନାର ପିଆର୍ କସରତର ଶିକାର ହୋଇଛି ଭାରତ। ଏହି ଗସ୍ତକୁ ଜଣେ ‘ଅନ୍ତର୍ଜାତୀୟ ବ୍ୟବସାୟ ବ୍ରୋକର’ ଆୟୋଜନ କରିଛନ୍ତି। ଜମ୍ମୁ-କଶ୍ମୀର ଭାରତର ଅବିଚ୍ଛେଦ୍ୟ ଅଙ୍ଗ ହୋଇଥିବାବେଳେ କେନ୍ଦ୍ର ସରକାର ଏହାର ଆନ୍ତର୍ଜାତିକୀକରଣ କାହିଁକି କରୁଛନ୍ତି ବୋଲି ସୁର୍ଜଓ୍ବୋଲା ପ୍ରଶ୍ନ କରିଛନ୍ତି। ଇୟୁ ପ୍ରତିନିଧି ଦଳର କଶ୍ମୀର ଗସ୍ତ ଆୟୋଜନ କରିଥିବା ମାଦି ଶର୍ମା କିଏ ତାହା ସରକାର ସ୍ପଷ୍ଟ କରନ୍ତୁ ବୋଲି କଂଗ୍ରେସ ପକ୍ଷରୁ ଦାବି କରାଯାଇଛି। କଶ୍ମୀରକୁ ଭାରତୀୟ ଏମ୍ପିମାନଙ୍କୁ ଯିବାକୁ ଅନୁମତି ମିଳୁ ନ ଥିବାବେଳେ ଇୟୁ ପ୍ରତିନିଧି ଦଳକୁ କାହିଁକି ଗସ୍ତ କରିବାକୁ ଦିଆଗଲା ବୋଲି ଜେଡିୟୁ ମୁଖପାତ୍ର ପବନ ବର୍ମା ପ୍ରଶ୍ନ କରିଛନ୍ତି। ଶିବସେନା ମୁଖପତ୍ର ‘ସାମ୍ନା’ର ସମ୍ପାଦକୀୟରେ ମଧ୍ୟ ଏହାକୁ ନିନ୍ଦା କରାଯାଇଛି। ଏହି ଗସ୍ତ ଭାରତର ସ୍ବାଧୀନତା ଓ ସାର୍ବଭୌମତ୍ୱ ଉପରେ ବାହ୍ୟ ଆକ୍ରମଣ ନୁହେଁ କି ବୋଲି ଏଥିରେ ପ୍ରଶ୍ନ କରାଯାଇଛି।
