ନୂଆଦିଲ୍ଲୀ,୨୫।୨: ବିଶ୍ୱର ଶକ୍ତିଶାଳୀ ଦେଶର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ସପରିବାର ୨ ଦିନିଆ ଭାରତ ଗସ୍ତରେ ଆସିଥିଲେ। ଏହି ସମୟରେ ତାଙ୍କ ସହ ଥିଲେ ତାଙ୍କ ସହଧର୍ମିଣୀ ମେଲାନିଆ ଟ୍ରମ୍ପ, ଝିଅ ଇଭାଙ୍କା ଓ ଜ୍ୱାଇଁ ଜେରେଡ। ଏହି ସମୟରେ ଟ୍ରମ୍ପ ୨୨ କିଲୋମିଟର ରୋଡ ଶୋ’ ସହ ବିଶ୍ୱର ସର୍ବବୃହତ କ୍ରିକେଟ ଷ୍ଟାଡିୟମରେ ଲକ୍ଷ ଲକ୍ଷ ଲୋକଙ୍କୁ ଉଦ୍ବୋଧନ ଦେଇଥିଲେ। ଏହାସହ ଭିଭିନ୍ନ କାର୍ଯ୍ୟକ୍ରମରେ ଯୋଗ ମଧ୍ୟ ଦେଇଥିଲେ। ଟ୍ରମ୍ପଙ୍କ ପରେ ଏବେ କିନ୍ତୁ ଚର୍ଚ୍ଚାରେ ରହିଛନ୍ତି ତାଙ୍କ ଝିଅ ଇଭାଙ୍କା ଟ୍ରମ୍ପ। ଗୋଟିଏ ପଟେ ଏହା ତାଙ୍କର ବ୍ୟକ୍ତିତ୍ୱ ଯୋଗୁ ହୋଇଥିବା ବେଳେ ଅନ୍ୟପଟେ ଟ୍ରମ୍ପଙ୍କ ପରମର୍ଶଦାତା ତାଲିକାରେ ଉଭୟ ଇଭାଙ୍କା ଓ ତାଙ୍କ ସ୍ବାମୀ ଜେରେଡ ରହିଛନ୍ତି ଆଗରେ। ହ୍ବାଇଟ ହାଉସରେ ତାଙ୍କର ଏକ କାର୍ଯ୍ୟାଳୟ ରହିଛି।
କୁହାଯାଏ ଇଭାଙ୍କା ଓ ଜେରେଡଙ୍କ ପରାମର୍ଶ ପରେ ହିଁ ଇସ୍ରାଏଲ ଓ ପାଲେଷ୍ଟାଇନ ମଧ୍ୟରେ ବିବାଦ ହୋଇ ଜେରୁଜେଲମକୁ ଇସ୍ରାଏଲର ଅଂଶ ବୋଲି ଘୋଷଣା କରାଯାଇଥିଲା। ଉତ୍ତର କୋରିଆ ଓ ଦକ୍ଷିଣ କୋରିଆର ବିବାଦ ମଧ୍ୟ ଏମାନଙ୍କ ପରାମର୍ଶ କ୍ରମେ କମ୍ ହୋଇଥିଲା। ଏହା ଇଭାଙ୍କାଙ୍କ ଦ୍ୱିତୀୟ ଭାରତ ଗସ୍ତ। ଏହା ପୂର୍ବରୁ ସେ ୨୦୧୮ରେ ହାଇଦ୍ରାବାଦରେ ଆୟୋଜିତ ଇଣ୍ଟରପ୍ରିନେୟୋରଶିପ ସମିଟରେ ଅଂଶ ଗ୍ରହଣ କରିବାକୁ ଭାରତ ଆସିଥିଲେ। ଏଥର କିନ୍ତୁ ଇଭାଙ୍କାଙ୍କ ସିମ୍ପଲ ଷ୍ଟାଇଲ ସାଧାରଣ ଜନତାଙ୍କ ଦୃଷ୍ଟି ଆକର୍ଷଣ କରିଥିଲା।
