ସିଂହପୁର,୧।୧୨(ଡି.ଏନ୍.ଏ.) : ଯାଜପୁର ଜିଲା ବିଞ୍ଝାରପୁର ଥାନା ଅନ୍ତର୍ଗତ ଜରି ପଞ୍ଚାୟତ ଜରି ଗ୍ରାମର ଜଣେ ମହିଳାଙ୍କୁ ଶାଶୁଘର ଲୋକେ ହତ୍ୟା କରିଥିବା ବାପଘର ପକ୍ଷରୁ ଥାନାରେ ଲିଖିତ ଅଭିଯୋଗ ହୋଇଛି। ଅଭିଯୋଗକୁ ଭିତ୍ତିକରି ପୋଲିସ ଘଟଣାସ୍ଥଳରେ ପହଞ୍ଚି ମହିଳାଙ୍କ ମୃତଦେହ ଜବତ କରିବା ସହିତ ଏହି ଘଟଣାରେ ଶାଶୁ, ଶ୍ୱଶୁର, ସ୍ବାମୀଙ୍କୁ ଥାନାରେ ଅଟକ ରଖି ପଚରା ଉଚରା କରୁଥିବା ଜଣାପଡ଼ିଛି।
ସୂଚନା ଅନୁଯାୟୀ, ମଙ୍ଗଳପୁର ଥାନା ଅନ୍ତର୍ଗତ କଣ୍ଟାପଡ଼ା ଅଞ୍ଚଳର ମନୁ ମଲ୍ଲିକଙ୍କ ଝିଅ ରିଲି ମଲ୍ଲିକ(୨୩)ଙ୍କୁ ଗତବର୍ଷ ବିଞ୍ଝାରପୁର ଥାନା ଅନ୍ତର୍ଗତ ଜରି ଗ୍ରାମର ବସନ୍ତ ମଲ୍ଲିକଙ୍କ ପୁଅ ପରମେଶ୍ୱର ମଲ୍ଲିକ(୨୫)ଙ୍କୁ ପ୍ରେମ ବିବାହ କରିଥିଲେ। ବିବାହ ପରେ ରିଲିଙ୍କୁ ଶାଶୁଘର ଲୋକେ ବାପଘରୁ ଯୌତୁକ ବାବଦରେ ଟଙ୍କା ଆଣିବାକୁ ଶାରୀରିକ ନିର୍ଯାତନା ଦେଇଆସୁଥିଲେ। ତେବେ ରିଲି ଗର୍ଭବତୀ ଥିବା ବେଳେ ଶନିବାର ତାଙ୍କ ଶାଶୁ, ଶ୍ୱଶୁର,ସ୍ବାମୀ, ନଣନ୍ଦ, ସମ୍ପର୍କୀୟ ଖୁଡି ତାଙ୍କୁ ପ୍ରବଳ ମାଡ଼ ମାରିଥିଲେ। ଏଥିରେ ସେ ଗୁରୁତର ହୋଇପଡ଼ବାରୁ ତାଙ୍କୁ ସ୍ଥାନୀୟ ଡାକ୍ତରଖାନା ନିଆଯାଇଥିଲା। ଡାକ୍ତର କଟକ ସ୍ଥାନାନ୍ତର କରିବାକୁ ପରାମର୍ଶ ଦେଇଥିଲେ। ମାତ୍ର ରିଲିଙ୍କ ଶାଶୁଘର ଲୋକେ କଟକ ନ ନେଇ ଘରକୁ ନେଇ ଆସିଥିଲେ। ତେବେ ରବିବାର ଅପରାହ୍ନରେ ତାଙ୍କର ମୃତ୍ୟୁ ଘଟିଥିବା ସ୍ଥାନୀୟ ଲୋକଙ୍କ ଠାରୁ ରିଲିଙ୍କ ମା’ ଜିତା ମଲ୍ଲିକ ଖବର ପାଇବା ପରେ ଏନେଇ ଥାନାରେ ଅଭିଯୋଗ କରିଛନ୍ତି।
