ତାଳଚେର,୧୭ା୧(ନି.ପ୍ର.) – ଅନୁଗୋଳ ଜିଲା ତାଳଚେର ପୌରାଞ୍ଚଳ ୧୮ ନଂ. ଓ୍ବାର୍ଡ ଦେଉଳବେଡ଼ା ତେଲିସାହି ଗ୍ରାମର ଅକ୍ଷୟ କୁମାର ସାହୁଙ୍କ ଧାନ ବିଲଠାରେ ବୁଧବାର ମାଟି ଦବି ହୋଇଥିବା ଗର୍ତ୍ତ ଗୁରୁବାର ଆହୁରି ବଡ଼ ହୋଇଯାଇଛି। ତେବେ ଉକ୍ତ ସ୍ଥାନକୁ ବ୍ୟାରିକେଡ୍ କରାଯାଇ ନିଷିଦ୍ଧାଞ୍ଚଳ ଘୋଷଣା କରାଯାଇଛି। ଏମ୍ସିଏଲ୍ର ତାଳଚେର ଏରିଆ ମହାପ୍ରବନ୍ଧକ ବି. କୁମାର ଏବଂ ଅନ୍ୟ ପଦାଧିକାରୀ ଘଟଣାସ୍ଥଳ ପରିଦର୍ଶନ କରି ସୁରକ୍ଷା ବ୍ୟବସ୍ଥା ଓ ଗର୍ତ୍ତରେ ବାଲି ଭର୍ତ୍ତି କରାଯିବା ନେଇ ଗ୍ରାମବାସୀଙ୍କ ସହ ଆଲୋଚନା କରିଛନ୍ତି। ଏଥିସହ ସମସ୍ତଙ୍କ ସହଯୋଗ କାମନା କରିଛନ୍ତି।
ପ୍ରକାଶ ଯେ, ଉକ୍ତ ଅଞ୍ଚଳରେ ପୂର୍ବରୁ ହାଣ୍ଡିଧୂଅଁା କୋଲ୍ମାଇନ୍ସ ଏବଂ ବିଏନ୍ଆର୍ କମ୍ପାନୀ ଦ୍ୱାରା କୋଇଲା ଖନନ କରାଯାଇଥିଲା। ଗର୍ତ୍ତ ସୃଷ୍ଟି ହୋଇଥିବା ଜମିର ମାଲିକ ଅକ୍ଷୟ କୁମାରଙ୍କ ସହ କ୍ଷତିଗ୍ରସ୍ତ ଗ୍ରାମବାସୀଙ୍କୁ କିଭଳି ଯଥାଶୀଘ୍ର ଉପଯୁକ୍ତ କ୍ଷତିପୂରଣ ରାଶି ମିଳିବ ଏବଂ ସେମାନଙ୍କୁ ଠିକାଭିତ୍ତିରେ ନିଯୁକ୍ତି ପ୍ରଦାନ କରାଯିବ ସେ ନେଇ ଏମ୍ସିଏଲ୍ ସିଏମ୍ଡି ଓ ଗ୍ରାମବାସୀଙ୍କ ମଧ୍ୟରେ ଆଲୋଚନା ହୋଇଛି। ବୈଠକର ନିଷ୍ପତ୍ତି ଅନୁଯାୟୀ, ତାଳଚେର କ୍ଷେତ୍ର ମହାପ୍ରବନ୍ଧକ ବି.କୁମାର ପତ୍ର ମାଧ୍ୟମରେ ତହସିଲଦାରଙ୍କୁ ଘଟଣା ସମ୍ପର୍କରେ ଜଣାଇବା ପରେ ରାଜ୍ୟ ସରକାର ଓ ଏମ୍ସିଏଲ୍ ପକ୍ଷରୁ ସେଠାରେ ମିଳିତ ଯାଞ୍ଚ କରାଯାଇ ରିପୋର୍ଟ ପ୍ରସ୍ତୁତ କରାଯିବ। କ୍ଷୟକ୍ଷତି ସମ୍ପର୍କରେ ମୂଲ୍ୟାୟନ ପରେ କ୍ଷତିପୂରଣ ରାଶି ସ୍ଥିର କରାଯିବ। କ୍ଷତିଗ୍ରସ୍ତ ହୋଇଥିବା ୨ କିମ୍ବା ୩ ପରିବାରର ଜଣେ ଲେଖାଏ ସଦସ୍ୟଙ୍କୁ ଏମ୍ସିଏଲ୍ରେ ଘରୋଇ ସୁରକ୍ଷା କର୍ମୀ ଭାବେ ନିୟୋଜିତ କରାଯିବ। ପାଇପ୍ ଦ୍ୱାରା ବିଶୁଦ୍ଧ ପାନୀୟଜଳ ଯୋଗାଣ ପାଇଁ ବ୍ୟବସ୍ଥା କରାଯିବା ସହ ଅନ୍ୟାନ୍ୟ ଦାବିକୁ ମଧ୍ୟ ଗୁରୁତ୍ୱ ଦିଆଯିବ। ଉକ୍ତ ବୈଠକରେ ଏମ୍ସିଏଲ୍ର ସିଏମ୍ଡି ବି.ଏନ୍. ଶୁକ୍ଲା, ଡାଇରେକ୍ଟର ପର୍ସୋନେଲ କେଶବ ରାଓ, ତାଳଚେର କୋଇଲାକ୍ଷେତ୍ରର ସମସ୍ତ ମହାପ୍ରବନ୍ଧକ, ତହସିଲଦାର, ଏସ୍ଡିପିଓ ଏବଂ ଗ୍ରାମ କମିଟି ସଭାପତି ରାହାସ କୁମାର ସାହୁ, ସମ୍ପାଦକ କାର୍ତ୍ତିକେଶ୍ୱର ସାହୁ, କୋଷାଧ୍ୟକ୍ଷ ବାବୁଲା କୁମାର ପୃଷ୍ଟି, ତାଳଚେର ସୁରକ୍ଷା ମଞ୍ଚର ମୁରଲୀଧର ସାହୁ, ପର୍ଶୁରାମ ବାରିକ ଏବଂ ଅନ୍ୟ ଗ୍ରାମବାସୀ ଉପସ୍ଥିତ ଥିଲେ।
