କେନ୍ଦୁଝର,୫।୩(ସ୍ବ.ପ୍ର.): କେନ୍ଦୁଝର ଜିଲା ଯୋଡ଼ା ଖଣି ମଣ୍ଡଳର ପୂର୍ବତନ ଉପନିର୍ଦ୍ଦେଶକ ତଥା ବର୍ତ୍ତମାନ ଖଣି ନିର୍ଦ୍ଦେଶାଳୟର ଅତିରିକ୍ତ ନିର୍ଦ୍ଦେଶକ ଉମେଶ ଚନ୍ଦ୍ର ଜେନାଙ୍କ ଘର, ଅଫିସ୍ ସମେତ ବିଭିନ୍ନ ସ୍ଥାନରେ ଭିଜିଲାନ୍ସ ପକ୍ଷରୁ ଚଢ଼ାଉ କରାଯାଇ ବିପୁଳ ଆୟ ବହିର୍ଭୂତ ସମ୍ପତ୍ତି ଠାବ କରାଯାଇଛି। ଏଥିସହ ବିଭିନ୍ନ କାଗଜପତ୍ର ଓ ଫାଇଲ୍ ଜବତ କରାଯାଇ ଯାଞ୍ଚ କରାଯାଉଛି। ଶନିବାର ତାଙ୍କୁ ଭିଜିଲାନ୍ସ ଗିରଫ କରିଥିବାବେଳେ ଏହି ଘଟଣାକୁ ନେଇ ବିଶେଷକରି କେନ୍ଦୁଝର ଜିଲାରେ ନାନା ଗୁଞ୍ଜରଣ ଆରମ୍ଭ ହୋଇଛି। ତାଙ୍କ କାର୍ଯ୍ୟକାଳ ସମୟରେ ଛପି ରହିଥିବା ଖଣି ଦୁର୍ନୀତିର ଖୋଳତାଡ଼ ହେବା ନେଇ ଚର୍ଚ୍ଚା ଜୋର୍ ଧରିଛି। ଏଥି ମଧ୍ୟରେ ଯୋଡ଼ା ହିସାବୁର ସାଇଡିଂ ଖଣି ଦୁର୍ନୀତି ଫାଇଲ ରହିଥିବା ଶୁଣିବାକୁ ମିଳୁଛି।
ସୂଚନା ଅନୁଯାୟୀ, କେନ୍ଦୁଝର ଜିଲା ଯୋଡ଼ା ବ୍ଲକ୍ ଅନ୍ତର୍ଗତ ଉଲିବୁର ଖଣି ମହାଦୁର୍ନୀତିର ଅନ୍ୟଏକ ଅଧ୍ୟାୟ ହିସାବୁର ସାଇଡିଂରେ ହୋଇଥିବା ଦୁର୍ନୀତିର ତଦନ୍ତ ସେ ସମୟରେ ହୋଇ ନ ଥିଲା। ଉକ୍ତ ସାଇଡିଂରୁ ବହୁ ପରିମାଣରେ ଖଣିଜ ପଥର ଚାଲାଣ ହୋଇଥିଲେ ହେଁ ତାହା ଭିଜିଲାନ୍ସ ତଦନ୍ତ ପରିସରଭୁକ୍ତ କରାଯାଇ ନ ଥିଲା। ବିପୁଳ ଖଣିଜ ପଥର ଚୋରା ଚାଲାଣ କରିଥିବା କୋଲକାତାସ୍ଥିତ ପରିବହନ ସଂସ୍ଥା ଏହି ଘଟଣାକୁ ଚପାଇବାକୁ ସେ ସମୟରେ ସଫଳ ହୋଇଥିଲା ବୋଲି କୁହାଯାଉଛି। ତେବେ ଉକ୍ତ ସଂସ୍ଥା ଘରୋଇ ବ୍ୟବହାର ପାଇଁ ଲୁହାପଥର ନେଇଥିବା ଦର୍ଶାଇ ବାହାରକୁ ପଠାଉଥିଲା। ଫଳରେ ରେଳ ମନ୍ତ୍ରଣାଳୟ ଭଡ଼ା ବାବଦକୁ ବହୁ ରାଜସ୍ବ କ୍ଷତି ସହିଥିଲା। ଏହା ଜଣାପଡ଼ିବା ପରେ ରେଳ ମନ୍ତ୍ରଣାଳୟ ମଧ୍ୟ ନୋଟିସ୍ କରିଥିଲା। ଉକ୍ତ ସାଇଡିଂରୁ ଚାଲାଣ ହୋଇଥିବା ବହୁ ପରିମାଣର ଲୁହାପଥର ଚୋରାରେ ରେଳ ଯୋଗେ ଯାଇଥିବା ନେଇ ପୂର୍ବରୁ ଅଭିଯୋଗ ହୋଇଥିଲା। ଘଟଣାକୁ ନେଇ ୫ବର୍ଷ ପୂର୍ବେ ଜଣେ ପୂର୍ବତନ ବିଧାୟକ ଓ କେତେଜଣ ସାମାଜିକ କର୍ମୀ ସମ୍ପୃକ୍ତ ଖଣି ଅଧିକାରୀଙ୍କ କାର୍ଯ୍ୟଧାରାକୁ ନେଇ ଭିଜିଲାନ୍ସ ବିଭାଗ ନିକଟରେ ଅଭିଯୋଗ ମଧ୍ୟ କରିଥିଲେ। ପରବର୍ତ୍ତୀ ସମୟରେ ଉକ୍ତ ସଂସ୍ଥା ନିଜର ନାମ ବଦଳାଇ କେନ୍ଦୁଝର ଜିଲାରୁ ଖଣିଜ ପଥର ଚାଲାଣ କରିଥିଲା ବୋଲି ଖଣି ବିଭାଗ ସବୁ ଜାଣି ବି ଚୁପ୍ ରହିବା ସମସ୍ତଙ୍କୁ ଚକିତ କରିଥିଲା।
ସେହି ସମୟରେ ଖଣି ମହାଦୁର୍ନୀତିକୁ ନେଇ ଖଣି ବିଭାଗର ବହୁ ଅଧିକାରୀ ଧରାପଡ଼ି ଜେଲ ଯାଇଥିଲେ ହେଁ ଭିଜିଲାନ୍ସ ଆଖିରୁ ଯୋଡ଼ା ଖଣି ମଣ୍ଡଳର ତତ୍କାଳୀନ ଉପନିର୍ଦ୍ଦେଶକ ଉମେଶ ଚନ୍ଦ୍ର ଜେନା ଖସିଯାଇଥିଲେ। କାର୍ଯ୍ୟାନୁଷ୍ଠାନ ବଦଳରେ ତାଙ୍କୁ ଭୁବନେଶ୍ୱରସ୍ଥିତ ଖଣି ନିର୍ଦ୍ଦେଶାଳୟକୁ ବଦଳି କରାଯାଇଥିଲା। ପୁଣି ପରବର୍ତ୍ତୀ ସମୟରେ ସେ ଖଣି ନିର୍ଦ୍ଦେଶାଳୟର ଅତିରିକ୍ତ ନିର୍ଦ୍ଦେଶକ ଭାବେ ଅବସ୍ଥାପିତ ହୋଇଥିଲେ। ସବୁଠାରୁ ଆଶ୍ଚର୍ଯ୍ୟର କଥା ହେଲା, ସେହି ସମୟରେ ଖଣି ମହାଦୁର୍ନୀତିର ତଦନ୍ତ ଜଷ୍ଟିସ ଶାହା କମିଶନ କରୁଥିଲେ। ଶାହା କମିଶନ ତଦନ୍ତ ପାଇଁ କେନ୍ଦୁଝର ଖଣି ଅଞ୍ଚଳ ଗସ୍ତବେଳେ ଉମେଶ ଉକ୍ତ ଟିମ୍ରେ ଆସିଥିବା ଦେଖି ସ୍ଥାନୀୟ ଲୋକ ଆଶ୍ଚର୍ଯ୍ୟ ପ୍ରକାଶ କରିଥିଲେ ବୋଲି ପୂର୍ବତନ ବିଧାୟକ ସୁବର୍ଣ୍ଣ ନାୟକ କହିଛନ୍ତି। ତେବେ ତାଙ୍କର ଅନେକ ଘର, ଜମି, ସୁନା ତଥା ଅର୍ଥ ଏବଂ ତାଙ୍କ ପରିବାର ନାମରେ ଫାର୍ମ ବିଭିନ୍ନ ଜିଲା ଓ ରାଜ୍ୟ ବାହାରେ ରହିଛି। ଏସବୁର ତଦନ୍ତ କରାଗଲେ ବହୁ ଦୁର୍ନୀତି ପଦାକୁ ଆସିପାରିବ। ତାଙ୍କ ସହିତ ଜଡ଼ିତ ଅନ୍ୟ ଖଣି ଓ ପରିବହନ ସଂସ୍ଥାଙ୍କ ମୁଖା ଖୋଲିବ ବୋଲି ସାମାଜିକ କର୍ମୀ ଗୁଲାବ ମୁଖତାର ରାଇନ କହିଛନ୍ତି ା
