ଭୋଗରାଇ, ୧୬।୧୨(ଡି.ଏନ.ଏ.)-ବାଲେଶ୍ୱର ଜିଲା ଭୋଗରାଇ ବ୍ଲକ ଅଧୀନ ମନ୍ଦାରସାହି ପଞ୍ଚାୟତ ହରିପୁର ଗ୍ରାମ ଅଙ୍ଗନୱାଡ଼ି କେନ୍ଦ୍ରରେ ଶିଶୁମାନଙ୍କୁ ଦିଆଯାଉଥିବା ଭାତରେ ମଲା ବିଛା ବାହାରିଥିବା ଅଭିଯୋଗ ହୋଇଥିଲା। ରବିବାର ଉକ୍ତ କେନ୍ଦ୍ରକୁ ଭୋଗରାଇ ଶିଶୁ ବିକାଶ ପ୍ରକଳ୍ପ ଅଧିକାରୀ ଭାରତୀ ସାହୁ ଓ ସେକ୍ଟର ସୁପରଭାଇଜର ଶାନ୍ତି ହାଁସଦା ଘଟଣାସ୍ଥଳକୁ ଯାଇ ତଦନ୍ତ ଆରମ୍ଭ କରିଛନ୍ତି। କାର୍ଯ୍ୟରେ ଅନିୟମିତତା କରିଥିବା ଉକ୍ତ କେନ୍ଦ୍ରର କର୍ମୀ ଓ ସହାୟିକାଙ୍କ ପତ୍ର ସଂଖ୍ୟା ୬୫୪ରେ ଗତ ତା୧୩।୧୨।୧୯ ରିଖରେ ସେଦିନର ଭତ୍ତାକୁ କଟାଯିବା ସହିତ କାରଣ ଦର୍ଶାଅ ନୋଟିସ ଜାରି କରାଯାଇଛି।
ଉକ୍ତ ଅଙ୍ଗନୱାଡ଼ି କେନ୍ଦ୍ରରେ ଗତ ୧୩ତାରିଖରେ ଶିଶୁମାନଙ୍କୁ ରନ୍ଧା ଭାତ ଖାଇବାକୁ ଦିଆଯାଇଥିଲା। ଗ୍ରାମର ଜଣେ ଶିଶୁ ଉକ୍ତ ରନ୍ଧାଖାଦ୍ୟକୁ ଘରକୁ ନେବା ପାଇଁ ଜିଦ୍ କରିବାରୁ ସହାୟିକା ଏକ ଟିଫିନ୍ ବାକ୍ସରେ ତାଙ୍କୁ ଭାତ ଦେଇଥିଲେ। ଶିଶୁର ମା’ ଏହି ଭାତରେ ମଲା ବିଛା ପଡ଼ିଥିବା ଅପରାହ୍ନ ୪ଟାରେ ସହାୟିକାଙ୍କୁ ଗ୍ରାମ ରାସ୍ତାରେ ଦେଖାଇଥିଲେ। ଏହି ଅଭିଯୋଗ ପରେ ଗ୍ରାମରେ ଦୁଇଦିନ ଧରି ଜଟିଳ ସ୍ଥିତି ଲାଗି ରହିଥିଲା। ରନ୍ଧା ଭାତ ଖାଇଥିବା କୌଣସି ଶିଶୁ ଅସୁସ୍ଥ ନ ଥିବାରୁ ଘଟଣା ଏକ ରହସ୍ୟାବୃତ୍ତ ବୋଲି ଗ୍ରାମବାସୀ କହିଛନ୍ତି। ଶିଶୁ ବିକାଶ ପ୍ରକଳ୍ପ ଅଧିକାରୀ ଅଙ୍ଗନୱାଡ଼ି କେନ୍ଦ୍ରର କର୍ମୀ ଓ ସହାୟିକାଙ୍କୁ ଖାଦ୍ୟର ସୁରକ୍ଷା ଓ ସୁଷମ ବଣ୍ଟନ କରିବା ସହିତ କେନ୍ଦ୍ର ବାହାରକୁ ରନ୍ଧା ଖାଦ୍ୟ ନ ଦେବାକୁ ନିର୍ଦ୍ଦେଶ ଦେଇଛନ୍ତି। ଘଟଣା ସମ୍ପର୍କରେ କର୍ମୀ-ସହାୟିକା, ଯାଞ୍ଚ କମିଟିର ସଦସ୍ୟ ଓ ଗ୍ରାମବାସୀଙ୍କଠାରୁ ଅବଗତ ହୋଇଛନ୍ତି।
