ନୂଆଦିଲ୍ଲୀ, ୧୪।୫-ସାମ୍ପ୍ରତିକ କ୍ରିକେଟରଙ୍କ ମଧ୍ୟରେ କିଏ ଶ୍ରେଷ୍ଠ ଏହାକୁ ନେଇ କିମ୍ବଦନ୍ତୀ କ୍ରିକେଟରମାନେ ଭିନ୍ନ ମତ ପୋଷଣ କରି ଆସୁଛନ୍ତି । ବିରାଟ କୋହଲି, ରୋହିତ ଶର୍ମା, ଜୋ ରୁଟ୍, ଷ୍ଟିଭ୍ ସ୍ମିଥ, କେନ୍ ୱିଲିୟମସନ ଆଦି ଖେଳାଳି ବ୍ୟାଟ୍ସମ୍ୟାନ ତାଲିକାର ଆଗରେ ରହିଛନ୍ତି। ଏ ସମ୍ପର୍କରେ ପାକିସ୍ତାନ କିମ୍ବଦନ୍ତୀ ବ୍ୟାଟ୍ସମ୍ୟାନ ମହମ୍ମଦ ୟୁସୁଫ ନିଜ ମତ ରଖିଛନ୍ତି । ତାଙ୍କ ମତରେ ରୋହିତ, ରୁଟ୍, ସ୍ମିଥ ଓ ୱିଲିୟମସନ ସମସ୍ତେ ଭଲ, ମାତ୍ର ବର୍ତ୍ତମାନ କୋହଲି ବିଶ୍ୱର ଶ୍ରେଷ୍ଠ ବ୍ୟାଟ୍ସମ୍ୟାନ। ”ବର୍ତ୍ତମାନ ସକ୍ରିୟ ଥିବା ଖେଳାଳିଙ୍କ ମଧ୍ୟରେ ଅନେକ ଭଲ ଖେଳୁଛନ୍ତି। ତେବେ ସମସ୍ତ ଫର୍ମାଟକୁ ବିଚାରକୁ ନେଲେ କୋହଲିଙ୍କ ତୁଳନୀୟ କେହି ନୁହନ୍ତି। କୋହଲି ଯେପରି ପ୍ରତି ଇନିଂସରେ ଚାପ ପରିସ୍ଥିତିକୁ ହାତଉଛନ୍ତି ଏବଂ ଶତକ ପରେ ଶତକ ହାସଲ କରି ଚାଲିଛନ୍ତି ତାହା ଅବିଶ୍ୱସନୀୟ“ ବୋଲି ୟୁସୁଫ କହିଛନ୍ତି ।
କୋହଲି ୮୬ ଟେଷ୍ଟ, ୨୪୮ ଦିନିକିଆ ଓ ୮୨ଟି ଟି୨୦ ଅନ୍ତର୍ଜାତୀୟ ମ୍ୟାଚ ଖେଳି ଯଥାକ୍ରମେ ୭,୨୮୦, ୧୧,୮୬୭ ଓ ୨,୭୯୪ ରନ ସଂଗ୍ରହ କରିଛନ୍ତି । କୋହଲି, ସ୍ମିଥ ଓ ୱିଲିୟମସନ ଏବେ ପ୍ରାୟତଃ ଚର୍ଚ୍ଚାରେ ରହୁଛନ୍ତି । ଆଉ ଜଣେ ଯୁବ ବ୍ୟାଟ୍ସମ୍ୟାନ ଦ୍ରୁତ ଉନ୍ନତି କରି ସଫଳତାର ଶିଡ଼ି ଚଢ଼ି ଚାଲିଛନ୍ତି । ସେ ହେଲେ ପାକିସ୍ତାନର ବାବର ଆଜମ। ୪ ବର୍ଷ ଧରି ଅନ୍ତର୍ଜାତୀୟ କ୍ରିକେଟରେ ସେ ପ୍ରଭାବୀ ପ୍ରଦର୍ଶନ କରି ଆସିଛନ୍ତି ଏବଂ ପାକିସ୍ତାନର ମୁଖ୍ୟ ବ୍ୟାଟ୍ସମ୍ୟାନ ପାଲଟି ଯାଇଛନ୍ତି। ଅନେକେ କୋହଲିଙ୍କ ସହ ବାବରଙ୍କୁ ତୁଳନା କରୁଛନ୍ତି। ମାତ୍ର ତାହା ଠିକ୍ ନୁହେଁ। କାରଣ ବାବର ଜଣେ ଯୁବ ଖେଳାଳି ହୋଇଥିବାବେଳେ କୋହଲି ଅଧିକ ମ୍ୟାଚ ଖେଳିଛନ୍ତି ଏବଂ ଅଭିଜ୍ଞ ହୋଇଛନ୍ତି। ବିଶ୍ୱରେ ତାଙ୍କର ଅନେକ ପ୍ରଶଂସକ ଅଛନ୍ତି । କୋହଲି ବ୍ୟାଟିଂ କରିବାକୁ ପଡ଼ିଆକୁ ଓହ୍ଲାଇଲେ ଦର୍ଶକଙ୍କ କୋଳାହଳରେ ଷ୍ଟାଡିୟମ କମ୍ପିିଉଠେ। ତେବେ ଉଭୟ ଚମତ୍କାର ଖେଳାଳି ବୋଲି ୟୁସୁଫ କହିଛନ୍ତି।
