କରାଚୀ, ୩୦।୩(ପି.ଟି.):ପାକିସ୍ତାନର କିମ୍ବଦନ୍ତୀ ସ୍କ୍ବାଶ୍ ଖେଳାଳି ଆଜମ ଖାନ୍ କରୋନା ଭାଇରସ ସଂକ୍ରମଣରେ ମୃତ୍ୟୁବରଣ କରିଛନ୍ତି। ଲଣ୍ଡନ୍ରେ ତାଙ୍କର ଦେହାନ୍ତ ହୋଇଛି। ଏ ନେଇ ତାଙ୍କ ପରିବାର ସୂଚନା ଦେଇଛି। ଆଜମ ୧୯୫୯ରୁ ୧୯୬୧ ପର୍ଯ୍ୟନ୍ତ କ୍ରମାଗତ ଭାବେ ବ୍ରିଟିଶ ଓପନ ଟାଇଟଲ ହାସଲ କରିଥିଲେ। ଗତ ସପ୍ତାହରେ ସେ କୋଭିଡ-୧୯ ପାଇଁ ହୋଇଥିବା ପରୀକ୍ଷାରେ ପଜିଟିଭ ଥିଲେ ବୋଲି ଜଣାପଡିଥିଲା। ୯୫ ବର୍ଷ ବୟସରେ ସେ ଲଣ୍ଡନର ଏଲିଙ୍ଗ୍ ହସ୍ପିଟାଲରେ ଶନିବାର ପ୍ରାଣତ୍ୟାଗ କରିଥିଲେ।
କିମ୍ବଦନ୍ତୀ ଖେଳାଳି ହାଶିମ ଖାନଙ୍କ ସାନଭାଇ ଆଜମ ବିଶ୍ୱର ଅନ୍ୟତମ ଶ୍ରେଷ୍ଠ ସ୍କ୍ବାଶ ଖେଳାଳି ରୂପେ ବିବେଚିତ ହୁଅନ୍ତି। ଇଞ୍ଜୁରି ଓ ୧୯୬୨ରେ ତାଙ୍କର ୧୪ ବର୍ଷୀୟ ପୁଅର ଦୁଃଖଦ ମୃତ୍ୟୁ ପରେ ସେ ଖେଳ ଛାଡିଦେଇଥିଲେ। ୨ ବର୍ଷପରେ ଇଞ୍ଜୁରିରୁ ମୁକ୍ତ ହୋଇଥିଲେ ମଧ୍ୟ ସେ ପୁଅର ମୃତ୍ୟୁ ଜନିତ ମାନସିକ ଆଘାତରୁ ମୁକୁଳି ପାରି ନ ଥିଲେ। ପେଶାଓ୍ବାର ଉପକଣ୍ଠରେ ଥିବା ଏକ ଛୋଟିଆ ଗାଁ ନଓ୍ବାକିଲେରେ ସେ ଜନ୍ମ ଗ୍ରହଣ କରିଥିଲେ। ଏହି ଗାଁରୁ ଜାହାଙ୍ଗୀର ଓ ଜାନଶେର ଖାନଙ୍କ ଭଳି ବିଶ୍ୱସ୍ତରୀୟ ସ୍କ୍ବାଶ୍ ଖେଳାଳି ସୃଷ୍ଟି ହୋଇଥିଲେ। ୧୯୫୬ରେ ଆଜମ ୟୁନାଟେଡ କିଙ୍ଗ୍ଡମ୍ରେ ସ୍ଥାୟୀ ଭାବେ ରହି ଆସୁଥିଲେ। ସେ ୧୯୬୨ରେ ସବୁଠାରୁ ଗୁରୁତ୍ୱପୂର୍ଣ୍ଣ ହାର୍ଡବଲ୍ ଟୁର୍ନାମେଣ୍ଟ ୟୁଏସ୍ ଓପନ୍ ପ୍ରଥମଥର ପାଇଁ ଜିତିଥିଲେ। ଏହାପରେ ସେ ଇଞ୍ଜୁରିର ଶିକାର ହୋଇଥିଲେ ଓ ତାଙ୍କ ପୁଅର ଅକାଳ ମୃତ୍ୟୁ ହୋଇଥିଲା।
