ଝାରସୁଗୁଡା ଅଫିସ,୩୦ା୩: କରୋନା ମୁକାବିଲା ପାଇଁ ଜିଲା ପ୍ରଶାସନ ପକ୍ଷରୁ ବିଭିନ୍ନ ସ୍ଥାନରେ ଅସ୍ଥାୟୀ ହସ୍ପିଟାଲମାନ ପ୍ରତିଷ୍ଠା କରାଯାଉଛି। ଝାରସୁଗୁଡା ଜିଲା ପ୍ରଶାସନ ପକ୍ଷରୁ ସୋମବାର ଆରମ୍ଭ କରାଯାଇଥିବା ଏହି ପ୍ରୟାସକୁ ବିରୋଧ କରି ଦୁଇ ଜଣ ବ୍ୟକ୍ତି ଗିରଫ ହୋଇଛନ୍ତି। ଏନେଇ ଝାରସୁଗୁଡା ଥାନା ଅଧିକାରୀ ସାବିତ୍ରୀ ବଳ ସୂଚନା ଦେଇଛନ୍ତି। ସୁଚନା ମୁତାବକ ଝରସୁଗୁଡା ସହରସ୍ଥିତ ଏକ କଲେଜରେ କୋଭିଡ ହସ୍ପିଟାଲ ପ୍ରତିଷ୍ଠା ପାଇଁ ସୋମବାର ସିଡିଏମଓ ଡା.ଜଗଦୀଶ ଚନ୍ଦ୍ର ବାରିକ ଓ ଅନ୍ୟ ପ୍ରଶାସନିକ ଅଧିକାରୀମାନେ ଯାଇଥିଲେ। ହେଲେ ସେଠାରେ କଲେଜ ପ୍ରିନ୍ସିପାଲ ସମୀର ପାଣିଗ୍ରାହୀ ଓ ଆକାଉଣ୍ଟାଣ୍ଟ ରାମା ଶଙ୍କର ଏହାର ବିରୋଧ କରିଥିଲେ। ଏ ନେଇ ସିଡିଏମଓ ଡା.ବାରିକ ଜିଲାପାଳ ସରୋଜ କୁମାର ସାମଲଙ୍କୁ ଅବଗତ କରିବା ପରେ ସେ ମାମଲା ରୁଜୁ କରିବାକୁ ପୋଲିସକୁ ନିର୍ଦ୍ଦେଶ ଦେଇଥିଲେ। ପରେ ପୋଲିସ ଏକ ମାମଲା (ନଂ.୨୩୩/୨୦) ରୁଜୁ କରି ଉପରୋକ୍ତ ଦୁଇଜଣଙ୍କୁ ଗିରଫ କରିଛି।
