କେସିଙ୍ଗା,୯।୮(ଡି.ଏନ.ଏ.): କଳାହାଣ୍ଡି ଜିଲା କେସିଙ୍ଗା ଏନଏସି କଲ୍ୟାଣ ମଣ୍ଡପ ପରିସର ମଧ୍ୟରେ ବିଜୁ ଜନତା ପକ୍ଷରୁ ବିରାଟ କାର୍ଯ୍ୟକର୍ତ୍ତା ସମ୍ମିଳନୀ ଶୁକ୍ରବାର ଅନୁଷ୍ଠିତ ହୋଇଯାଇଛି । ଜିଲା ସଭାପତି ପୁଷ୍ପେନ୍ଦ୍ର ସିଂହଦେଓଙ୍କ ନେତୃତ୍ୱରେ ଏହି ସମ୍ମିଳନୀରେ ଶକ୍ତମନ୍ତ୍ରୀ ଦିବ୍ୟଶଙ୍କର ମିଶ୍ର, ନର୍ଲା ବିଧାୟକ ଭୂପିନ୍ଦର ସିଂହ, ପୂର୍ବତନ ବିଧାୟକ ଅନାମ ନାଏକ, ଦୁଷ୍ମନ୍ତ ନାଏକ, ଜିଲା ମହିଳା ସଭାନେତ୍ରୀ କଲ୍ୟାଣ ନାଏକ, ଜିଲା ଯୁବ ସଭାପତି ଆଦିତ୍ୟ ନନ୍ଦ ପ୍ରମୁଖ ବରିଷ୍ଠ କର୍ମକର୍ତ୍ତା ଯୋଗଦେଇଥିଲେ। ଏହି ବିରାଟ କାର୍ଯ୍ୟକର୍ତ୍ତା ସମ୍ମିଳନୀରେ ଜିଲା ସଭାପତି ସିଂହଦେଓ ପ୍ରଥମେ ପତାକା ଉତ୍ତୋଳନ କରିଥିଲେ। ପ୍ରବାଦ ପୁରୁଷ ସ୍ବର୍ଗତ ବିଜୁ ପଟ୍ଟନାୟକଙ୍କ ଫଟୋ ଚିତ୍ରରେ ପୁଷ୍ପମାଲ୍ୟାର୍ପଣ ପରେ ସଭା ଆରମ୍ଭ ହୋଇଥିଲା। ପ୍ରଥମେ ବିଜେଡିର ଜିଲା ସାଧାରଣ ସମ୍ପାଦକ ଭବାନୀଶଙ୍କର ନିଆଲ ସ୍ବାଗତ ଭାଷଣ ପ୍ରଦାନ କରିଥିଲେ। ସମ୍ମିଳନୀରେ ସଚିନ ଜୈନ ଓ ରାନୁବାଲା ବେନିଆ ନୂତନ ଭାବେ ବିଜେଡିରେ ସାମିଲ ହୋଇଥିଲେ। ପୂର୍ବତନ ବ୍ଲକ ଅଧ୍ୟକ୍ଷ ରୋହିତ କୁମାର ଭୋଇ କେସିଙ୍ଗାର ପେପର ମିଲ୍ ଦୀର୍ଘ ୪ ବର୍ଷ ହେଲା ଅକାମୀ ହୋଇ ପଡିରହିଛି । କେସିଙ୍ଗାରୁ ଭୁବନେଶ୍ୱରକୁ ଗମନାଗମନ ପାଇଁ ଟ୍ରେନ ଚଳାଇବାକୁ ଦାବି କରିଥିଲେ । କେସିଙ୍ଗାଠାରେ ନିର୍ମାଣାଧୀନ ୨୨୦ କେଭିର ଟ୍ରାନ୍ସଫର୍ମ ଦୀର୍ଘ ୨ ବର୍ଷ ହେଲା ପଡି ରହିଛି । କେସିଙ୍ଗା ଅଣ୍ଡରବ୍ରିଜ, ଶିଳ୍ପାଞ୍ଚଳ ବିକାଶ, ଭୂମିହୀନମାନଙ୍କୁ ପଟ୍ଟା ପ୍ରଦାନ, ଧାନ ମଣ୍ଡିରେ ଗୃହ ନିର୍ମାଣ, ଆଡିବନ୍ଧ ନିର୍ମାଣ ଆଦି ବିଷୟରେ ମନ୍ତ୍ରୀଙ୍କ ନିକଟରେ ଦାବି ଜଣାଇଥବଲେ । ସମଗ୍ର କଳାହାଣ୍ଡି ଜିଲାରେ ଶିକ୍ଷା ଓ କୃଷି ବିକାଶ ଏବଂ କ୍ଷୁଦ୍ରଶିଳ୍ପ କେନ୍ଦ୍ର ସ୍ଥାପନ କରିବା ପାଇଁ ମନ୍ତ୍ରୀ ମିଶ୍ର ପ୍ରକାଶ କରିଥିଲେ। ସମ୍ମିଳନୀକୁ ବିଜେଡିର କାର୍ଯ୍ୟକାରୀ ସଭାପତି ପ୍ରଭାତ ରଥ ପରିଚାଳନା କରିଥିଲେ। କେସିଙ୍ଗା ନଗର ଯୁବ ସଭାପତି ସିଲୁ ପରିଡା, ଟାଉନ ସଭାପତି ରମାକାନ୍ତ ଗଉଡ ପ୍ରମୁଖ ସହଯୋଗ କରିଥିଲେ ।
