ରଘୁନାଥପୁର,୨୬ା୭(ଡି.ଏନ୍.ଏ.): ଶ୍ରାବଣ ମାସରେ ମଧ୍ୟ ଆଶାନୁରୂପ ବର୍ଷା ନାହିଁ। ଫଳରେ ଚଳିତ ଖରିଫ ଋତୁରେ ଧାନଚାଷ ସମ୍ପୂର୍ଣ୍ଣ ବାଧାପ୍ରାପ୍ତ ହୋଇଛି। ବିଶେଷ କରି ଜଗତ୍ସିଂହପୁର ଜିଲା ରଘୁନାଥପୁର ବ୍ଲକ ଅଞ୍ଚଳରେ ମାଛଗଁା କେନାଲ ନଂ.୬, ୭ ଓ ୮ରେ ପାଣି ଆସୁ ନ ଥିବାରୁ ଚାଷୀ ଚିନ୍ତାରେ ପଡିଛନ୍ତି। ଏହି ଅଞ୍ଚଳରେ ଅଳ୍ପ କେତେକ ଜମିକୁ ଛାଡ଼ିଦେଲେ ପ୍ରାୟ ୭୦ ପ୍ରତିଶତ ତଳି ଘେରା ଜଳ ଅଭାବରୁ ସମ୍ପୂର୍ଣ୍ଣ ନଷ୍ଟ ହୋଇଗଲାଣି।
ଧାର୍ଯ୍ୟ ସମୟରେ ଧାନ ଚାଷ ନ ହୋଇପାରିଲେ ବର୍ଷକ ଆହ। ର କିପରି ଯୋଗାଡ଼ କରିବେ ତାହା ଚାଷୀଙ୍କୁ ଚିନ୍ତାରେ ପକାଇଛି। ଏଥିପାଇଁ ଜଳସମ୍ପଦ ବିଭାଗର କାର୍ଯ୍ୟଦକ୍ଷତା ଓ ଅପାରଗତାକୁ ଦାୟୀ କରିଛି ନବନିର୍ମାଣ କୃଷକ ସଙ୍ଗଠନ। ସଙ୍ଗଠନର ରାଜ୍ୟ କର୍ମକର୍ତ୍ତା ରଶ୍ମିରଞ୍ଜନ ସ୍ବାଇଁ କହିଛନ୍ତି ଯେ, ଖରିଫ ଋତୁରେ କେନାଲରେ ପାଣି ସମସ୍ୟାକୁ ଆଖି ଆଗରେ ରଖି ଯଥେଷ୍ଟ ପୂର୍ବରୁ ଏହାର ପ୍ରତିକାର ପାଇଁ ଜଳସମ୍ପଦ ଓ ଡ୍ରେନେଜ୍ ବିଭାଗକୁ ସତର୍କ କରାଯାଇଥିଲା। କିନ୍ତୁ ବିଭାଗୀୟ ଯନ୍ତ୍ରୀ ଏଥିପ୍ରତି ଗୁରୁତ୍ୱ ଦେଇ ନ ଥିଲେ। ପରିଣାମ ସ୍ବରୂପ ଜଳସେଚନ ସୁବିଧା ଥାଇ ମଧ୍ୟ ୬, ୭ ଓ ୮ ନଂ. କେନାଲ ତଥା ଏହାର ଶାଖା ଓ ଉପଶାଖା କେନାଲରେ ପାଣି ଆସୁନାହିଁ। ସଙ୍ଗଠନର କର୍ମକର୍ତ୍ତା ଦେବୀପ୍ରସାଦ ମହାରଣା କହିଛନ୍ତି ଯେ, କେନାଲ ଠିକ୍ ସମୟରେ ସଫେଇ କରାଯାଇନାହିଁ। ବିଭିନ୍ନ ସ୍ଥାନରେ ନିର୍ମିତ ପୋଲ ପାଇଁ କେନାଲ ମଧ୍ୟରେ ମାଟି ପକାଇ ରଖାଯାଇଛି। ସାତପୁରାରୁ ବାହାରିଥିବା ୬ନଂ. ମାଇନର କେନାଲର ୧୨ଟି ରାଜସ୍ବ ଗ୍ରାମ, ନୂଆଦାରୁ ବାହାରିଥିବା ୭ ନଂ. କେନାଲର ୨୦ଟି ରାଜସ୍ବ ଗ୍ରାମ ଓ ଶେଖପାଟଣାରୁ ବାହାରିଥିବା ୮ ନଂ. କେନାଲର ୩୦ରୁ ଊର୍ଦ୍ଧ୍ୱ ଗ୍ରାମରେ ମାତ୍ର ୧୦ ପ୍ରତିଶତ ଚାଷ କାର୍ଯ୍ୟ ହୋଇପାରିଛି। ଏ ସମ୍ପର୍କରେ ୬ ଓ ୭ ନଂ. କେନାଲ ଦାୟିତ୍ୱରେ ଥିବା ଏସ୍ଡିଓ ଦଳପତି ମଣ୍ଡଳ ଉଭୟ ଚାଷୀ ଓ ବିଭାଗୀୟ ଯନ୍ତ୍ରୀଙ୍କ ଅବହେଳାକୁ ଦାୟୀ କରିଛନ୍ତି। ଚାଷୀମାନଙ୍କୁ ନେଇ ପାଣି ପଞ୍ଚାୟତ ଗଠନ କରାଯାଇଛି। କେନାଲ ସଫେଇ କାର୍ଯ୍ୟ ପାଣି ପଞ୍ଚାୟତ ଦାୟିତ୍ୱରେ ଥିଲା। ସେମାନେ ସଫେଇ କରିବାରେ ବିଳମ୍ବ କରିବାରୁ ପାଣି ଛାଡ଼ିବାରେ ଡେରି ହେଲା। ସେହିପରି ଦାୟିତ୍ୱରେ ଥିବା ଯନ୍ତ୍ରୀ ସମସ୍ତ କାର୍ଯ୍ୟ ସୁଚାରୁ ରୂପେ ସମ୍ପାଦନ କରି ନ ଥିବା ଏସ୍ଡିଓ ମଣ୍ଡଳ ସ୍ବୀକାର କରିଛନ୍ତି। ଜଳସମ୍ପଦ ବିଭାଗ ଏକଜିକ୍ୟୁଟିଭ ଇଞ୍ଜିନିୟର ଉମାକାନ୍ତ ମହାନ୍ତି ବ୍ୟାରେଜ୍ରୁ ଆବଶ୍ୟକ ମୁତାବକ ପାଣି ଆସୁ ନ ଥିବା ଏବଂ ଏପରି ଅବସ୍ଥା ଲାଗି ରହିଲେ ଆଗାମୀ ଦିନରେ ଉତ୍କଟ ଜଳ ସମସ୍ୟା ଦେଖାଦେବ ବୋଲି ପ୍ରକାଶ କରିଛନ୍ତି। ତେବେ କେନାଲରେ ଛଡ଼ା ଯାଉଥିବା ପାଣିକୁ ଠିକ୍ ଭାବେ ବିନିଯୋଗ କରିବାକୁ ମହାନ୍ତି ପାଣି ପଞ୍ଚାୟତଗୁଡ଼ିକୁ ପରାମର୍ଶ ଦେଇଛନ୍ତି। ଅନ୍ୟପକ୍ଷରେ ଏ ସମ୍ପର୍କରେ କୃଷକ ସଙ୍ଗଠନ ଜିଲାପାଳଙ୍କ ଦୃଷ୍ଟି ଆକର୍ଷଣ କରିଛି।
