ରାଇକିଆ,୧୩।୬(ଡ଼ି.ଏନ.ଏ)-ରାଇକିଆ ବ୍ଲକର ବିଭିନ୍ନ ଅଞ୍ଚଳରେ ବୁଧବାର ରାତ୍ରରେ ପ୍ରବଳ ବର୍ଷା ସହ କୁଆପଥର ପଡିଥିଲା। ଏଥିରେ ଅନେକ ସ୍ଥାନରେ ବ୍ୟାପକ କ୍ଷୟକ୍ଷତି ହୋଇଛି। ମାଣିକେଶ୍ୱର ପଞ୍ଚାୟତରେ ଅଧିକ କ୍ଷତି ହୋଇଛି। ବାଡ଼ାମାହା ଓ କଡ଼ିଙ୍ଗିଆ ଗ୍ରାମରେ ବଡ଼ ବଡ଼ କୁଆପଥର ପଡ଼ିବା ଯୋଗୁ ୨୦୦ରୁ ଉର୍ଦ୍ଧ୍ୱ ଲୋକଙ୍କ ଘର ଆଜବେଷ୍ଟ ଭାଙ୍ଗିଯାଇଛି। ଚାଷ ଜମି ମଧ୍ୟ କ୍ଷୟକ୍ଷତି ହୋଇଛି। ବିନସ, ଫୁଲକୋବି ଆଦି ଚାଷ ପାଇଁ ପ୍ରସ୍ତୁତ କରାଯାଇଥିବା ଚାରା ନଷ୍ଟ ହୋଇଛି। ବାଡ଼ାମାହା ଗ୍ରାମର ମୋତି ପ୍ରଧାନଙ୍କ ଘର କାନ୍ଥ ସଂପୂର୍ଣ୍ଣ ଭାଙ୍ଗି ଯାଇଛି। ମାଣିକେଶ୍ୱର ସରପଞ୍ଚ ଭୂଷଣ ପ୍ରଧାନ କ୍ଷତିଗ୍ରସ୍ତ ପରିବାରକୁ ଭେଟିଛନ୍ତି। ରାଇକିଆ ଆରଆଇ ଦୀପା ପ୍ରଧାନ ଗ୍ରାମରେ ପହଞ୍ଚି କ୍ଷୟକ୍ଷତି ଆକଳନ କରିଛନ୍ତି।
