ଯାଜପୁର ଅଫିସ,୨୩ା୮:ବୈତରଣୀ ନଦୀର ଆଖୁଆପଦାଠାରେ ବନ୍ୟା ଜଳ ସାମାନ୍ୟ ହ୍ରାସ ପାଇଥିଲେ ସୁଦ୍ଧା ଏହାର ତଳମୁଣ୍ଡରେ ଥିବା କାଣୀ ନଦୀରେ ବିପତ୍ାତ ଦେଖାଦେଇଛି। ସୋମବାର ସନ୍ଧ୍ୟା ସୁଦ୍ଧା ଆଖୁଆପଦାରେ ବିପଦସଙ୍କେତ ୧୭.୮୩ ମିଟର ସ୍ଥଳେ ୧୭.୮୧ ମିଟର ରହିଛି। କାଣୀ ନଦୀର ବ୍ରହ୍ମଚାରୀପାଟଣାରେ ଗତ ୧୫ ତାରିଖରେ ସୃଷ୍ଟି ହୋଇଥିବା ଘାଇ ମରାମତି ପରେ ବି ଭାଙ୍ଗି ଯିବାରୁ ଯାଜପୁର ଜିଲା ଦଶରଥପୁର ବ୍ଲକର ୧୩ରୁ ଉର୍ଦ୍ଧ୍ୱ ପଞ୍ଚାୟତର ବାସିନ୍ଦା ପାଣିଘେରରେ ରହିଛନ୍ତି। କସପା ପଞ୍ଚାୟତର ବ୍ରହ୍ମଚାରୀପାଟଣା, ପଛପଡ଼ା, ନୂଆଶାସନ, ପଲ୍ଲାସାହୀ, କମାଳପୁର ଆଦି ଗ୍ରାମରେ ବନ୍ୟାଜଳ ପଶି ବ୍ୟାପକ କ୍ଷୟକ୍ଷତି ଘଟାଇଛି। ଏହି ପଞ୍ଚାୟତରେ ଥିବା କମାଳପୁର ନେହେରୁ ହାଇସ୍କୁଲ, ପଲ୍ଲାସାହି ପଞ୍ଚାନନ ହାଇସ୍କୁଲ, ବ୍ରହ୍ମଚାରୀପାଟଣା ନୋଡାଲ ସ୍କୁଲ, ପଞ୍ଚପଡ଼ା ପ୍ରାଥମିକ ବିଦ୍ୟାଳୟ, ନୂଆଶାସନ ବିଦ୍ୟାଳୟ ପ୍ରମୁଖରେ ବନ୍ୟାଜଳ ପ୍ରବେଶ କରିବା ଯୋଗୁ ଶିକ୍ଷାଦାନ ବନ୍ଦ ରହିଛି। ଏହାସହ ବନ୍ୟା ଦୁର୍ଗତମାନେ ଆଶ୍ରୟ ନ ପାଇ ରାସ୍ତା ଉପରେ ବସା ବାନ୍ଧିଛନ୍ତି। ସେହିପରି ଦୁଦୁରାଅଣ୍ଟା ପଞ୍ଚାୟତର ଦୁଦୁରାଅଣ୍ଟା ଓ ନରଣଗୋଚ୍ଛା ଗ୍ରାମର ୧୬ଟି ୱାର୍ଡରେ ବ୍ୟାପକ କ୍ଷତି ଘଟିଛି। ବ୍ଲକ ପ୍ରଶାସନ ତରଫରୁ କସପା ପଞ୍ଚାୟତର ୧୦ଟି ୱାର୍ଡର ୪୬୦୦ ଜନସାଧାରଣଙ୍କୁ ୨ ଦିନର ରନ୍ଧାଖାଦ୍ୟ ଓ ଦୁଦୁରାଅଣ୍ଟା ପଞ୍ଚାୟତର ୩ଟି ୱାର୍ଡର ୧୦୦୦ ଜନସାଧାରଣଙ୍କୁ ୧ ଦିନ ପାଇଁ ରନ୍ଧାଖାଦ୍ୟ ବ୍ୟବସ୍ଥା କରାଯାଇଛି। ମାତ୍ର ଆବଶ୍ୟକ ପରିମାଣର ଗୋଖାଦ୍ୟ ପ୍ରଦାନ କରାଯାଇ ନଥିବାରୁ ଗତ ୮ ଦିନଧରି ଗୃହପାଳିତ ପ୍ରାଣୀମାନେ ଅର୍ଦ୍ଧାହାରରେ ରହୁଛନ୍ତି ବୋଲି ଗୋଲଖ ସାମଲ, ପ୍ରଶାନ୍ତ ନାୟକ, ପ୍ରଦୀପ ନାୟକ ପ୍ରମୁଖ ବନ୍ୟା ଅଞ୍ଚଳବାସୀ ଅଭିଯୋଗ କରିଛନ୍ତି।
କାଣୀ ନଦୀର ବନ୍ୟା ଦ୍ୱାରା ମଲ୍ଲିକାପୁର, ଶୁଶୁଆ, ନିଜାମପୁର, ଦତ୍ତପୁର, କୟାଁ, କମାରଡିହ, ଖାନନଗର, ଜାଫରପୁର ଓ ବିରିପଟା ଆଦି ପଞ୍ଚାୟତ ପ୍ରଭାବିତ ହୋଇଛି। ପ୍ରଶାସନ ତରଫରୁ ୧୩ ପଞ୍ଚାୟତର ୧୩ ହଜାର ଜନସାଧାରଣ ପ୍ରଭାବିତ ହୋଇଥିବାର କୁହାଯାଉଥିବାବେଳେ ବାସ୍ତବରେ ଏହା ୨୦ ହଜାରରୁ ଊର୍ଦ୍ଧ୍ୱ ହେବ। ଆସନ୍ନ ବିପଦକୁ ଦୃଷ୍ଟିରେ ରଖି ପ୍ରସାସନ ତରଫରୁ ୨ ଏନଡିଆର୍ଏଫ୍ ଟିମ ମୁତୟନ କରାଯାଇଛି।
