ବୋଲଗଡ଼,୩।୯(ଡି.ଏନ୍.ଏ): ରାସ୍ତାଘାଟରେ ଆଉ ପଡ଼ିବନି ଅଳିଆ ଆବର୍ଜନା। ଏସବୁ କାମରେ ଲାଗିବ। ଏହା ପ୍ରମାଣିତ କରିଛନ୍ତି ଖୋର୍ଦ୍ଧା ଜିଲା ବୋଲଗଡ଼ ବ୍ଲକ ସାଗରଗୁଆଁ ପଞ୍ଚାୟତ ହଳଦିପଦା ଗ୍ରାମର ପ୍ରଦୀପ କୁମାର ସାହୁଙ୍କର ପୁଅ ସ୍ନେହାଶିଷ ସାହୁ। ଅଦରକାରୀ ଦ୍ରବ୍ୟରୁ ଅନେକ ଆକର୍ଷଣୀୟ ମୂର୍ତ୍ତି ଏବଂ ସୁନ୍ଦର ସୁନ୍ଦର ସାଜସଜ୍ଜା ଉପକରଣ ସବୁ ତିଆରି କରୁଛନ୍ତି। ସାବୁନରେ ଗଣେଶ, ଖବର କାଗଜ ଏବଂ ପେଟିରେ ଜଗନ୍ନାଥ ମୂର୍ତ୍ତି, ଆଇସ୍କ୍ରିମ କାଠିରେ ଫୁଲତୋଡ଼ା ସହ ମୃଦୁ ପାନୀୟ ଠିପିରେ କୁକୁଡ଼ା। ଏମିତି ଅନେକ ପ୍ରକାର ଆକର୍ଷଣୀୟ ଜିନିଷ ତିଆରି କରିଛନ୍ତି ସ୍ନେହାଶିଷ। ବେଗୁନିଆ ଆଦର୍ଶ ବିଦ୍ୟାଳୟରେ ନବମ ଶ୍ରେଣୀରେ ପଢୁଥିବା ସ୍ନେହାଶିଷ ଏଭଳି ବିଭିନ୍ନ ଜିନିଷ ଗଢିବା ସହ ବିନା ପ୍ରଶିକ୍ଷଣରେ ଉଚ୍ଚକୋଟୀର ପଟ୍ଟଚିତ୍ର ମଧ୍ୟ ଆଙ୍କିପାରୁଛନ୍ତି। ପାଠ ପଢି ସାରି ବାହାରେ ଖେଳକୁଦ ନ କରି ଘରେ ବସି ସେ ଏଭଳି କାମରେ ସମୟ ଦେଉଛନ୍ତି। ଏହା କରିବାରେ ତାଙ୍କୁ ଆନନ୍ଦ ମିଳୁଥିବାବେଳେ ଏହା ଯୋଗୁ ପରିବେଶ ମଧ୍ୟ ପ୍ରଦୂଷଣରୁ ରକ୍ଷା ପାଉଛି ବୋଲି ସେ କହିଛନ୍ତି।
