ବିଜେପୁର,୨୯।୩(ଡି.ଏନ୍.ଏ.): କରୋନା ବିଶ୍ବବାସୀଙ୍କ ନିଦ ହଜାଇ ଦେଇଛି। ଏହାର ମୁକାବିଲା ଲାଗି ସରକାର ଲକ୍ଡାଉନ୍ ଘୋଷଣା କରିଛନ୍ତି। ଏ ନେଇ ବରଗଡ଼ ଜିଲା ବିଜେପୁର ବ୍ଲକ ଅନ୍ତର୍ଗତ ବୈରଖପାଲି ଗାଁ ରାସ୍ତାକୁ ଓ୍ବାର୍ଡସଭ୍ୟଗଣ ରବିବାର ସିଲ୍ କରି ଦେଇଛନ୍ତି। ଉକ୍ତ ଗ୍ରାମର ଜଣେ ଯୁବକ ସମ୍ପର୍କୀୟଙ୍କ ଚିକିତ୍ସା ପାଇଁ ବିଶାଖାପାଟଣା ଯାଇଥିଲେ। ଶନିବାର ସେ ଘରକୁ ଫେରିବା ପରେ ବାହାରେ ବୁଲାବୁଲି କରୁଥିବା ଦେଖିବାକୁ ମିଳିଥିଲା। ଯୁବକ ଜଣଙ୍କୁ ଏକୁଟିଆ ଘରେ ରଖିବାକୁ ତାଙ୍କ ବାପାଙ୍କ ନିକଟରେ ଓ୍ବାର୍ଡ ସଭ୍ୟଗଣ ଅନୁରୋଧ କରିଥିଲେ। ତାଙ୍କ ବାପା ସମ୍ପୃକ୍ତ ଯୁବକଙ୍କୁ ଅନ୍ୟ ଗ୍ରାମରେ ରହୁଥିବା ସମ୍ପକୀୟଙ୍କ ନିକଟକୁ ପଠାଇ ଦେଇଥିବା ଜଣାପଡ଼ିଛି। ଗ୍ରାମର ସୁରକ୍ଷା ଦିଗରୁ ଓ୍ବାର୍ଡ ସଭ୍ୟଗଣ ଗାଁକୁ ସଂଯୋଗ କରୁଥିବା ବିଭିନ୍ନ ରାସ୍ତାକୁ ରବିବାର ସକାଳୁ ବାଉଁଶ ପକାଇ ସିଲ କରିଦେଇଛନ୍ତି। ଜରୁରୀ କାମ ନ ଥିଲେ ବାହାରକୁ ନ ଯିବାକୁ କହିଛନ୍ତି।
