ସୋନପୁର,୨୮।୫(ନି.ପ୍ର.)-ସୁବର୍ଣ୍ଣପୁର ଜିଲାରେ କରୋନା ରୋଗୀଙ୍କ ସଂଖ୍ୟା ବଢି ଚାଲିଛି। ବୁଧବାର ଜିଲାରେ ପୁଣି ୪ଜଣ କରୋନା ଆକ୍ରାନ୍ତ ଚିହ୍ନଟ ହେବା ପରେ ମୋଟ ସଂଖ୍ୟା ୫ରେ ପହଞ୍ଚତ୍ଛି। ୪ ଜଣ କରୋନା ଆକ୍ରାନ୍ତ ପ୍ରବାସୀ ଶ୍ରମିକ ହୋଇଥିବା ବେଳେ ଟିଏମସି (ଅସ୍ଥାୟୀ ସ୍ବାସ୍ଥ୍ୟ କେନ୍ଦ୍ର)ରେ ଥିଲେ। ସୋନପୁର ବ୍ଲକ ବାଲିଜୁରୀ ଗ୍ରାମର ତାମିଲନାଡୁ ଫେରନ୍ତା ୨୩ ବର୍ଷର ଯୁବକ ଓ କୁଲିପାଲି ଗ୍ରାମର ମହାରାଷ୍ଟ୍ର ଫେରନ୍ତା ୨୬ ବର୍ଷର ଯୁବକ ହରଡଖୋଲ ହାଇସ୍କୁଲ ଟିଏମ୍ସିରେ ଥିଲେ। ଉଭୟ ୧୮ ତାରିଖରେ ପହଞ୍ଚତ୍ ଥିଲେ। ୨୫ ତାରିଖରେ ଉଭୟଙ୍କ ସ୍ବାବ୍ ନମୁନା ସଂଗ୍ରହ ହୋଇ ପରୀକ୍ଷା ପାଇଁ ପଠାଯାଇଥିଲା। ସେହିପରି ଡୁଙ୍ଗୁରିପାଲି ବ୍ଲକ ସରଗୁଲ ଟିଏମ୍ସିରେ ମହାରାଷ୍ଟ୍ର ଫେରନ୍ତା ଓ ତରଭା ବ୍ଲକ ରଙ୍ଗପୁର ଟିଏମ୍ସିରେ ତାମିଲନାଡୁ ଫେରନ୍ତା ଯୁବକଙ୍କର ରିପୋର୍ଟ ପଜିଟିଭ୍ ଆସିଛି। ଆକ୍ରାନ୍ତଙ୍କୁ ସୁବର୍ଣ୍ଣପୁର କୋଭିଡ ସ୍ବାସ୍ଥ୍ୟକେନ୍ଦ୍ରକୁ ଅଣାଯାଇ ଚିକିତ୍ସା କରାଯାଉଛି । ସମ୍ପୃକ୍ତ ଟିଏମ୍ସିଗୁଡିକୁ ସିଲ୍ କରାଯାଇଛି। ପ୍ରବାସୀ ଶ୍ରମିକଙ୍କୁ ଅନ୍ୟତ୍ର ସ୍ଥାନାନ୍ତର କରାଯିବା ସହିତ ହରଡଖୋଲ, ସରଗୁଲ ଓ ରଙ୍ଗପୁର ଟିଏମ୍ସିକୁ ଗୁରୁବାର ସାନିଟାଇଜ୍ କରାଯାଇଛି। ଆକ୍ରାନ୍ତ ଯୁବକଙ୍କ ସହିତ ସିଧାସଳଖ ସଂସ୍ପର୍ଶରେ ଆସିଥିବା ଅନ୍ୟ ପ୍ରବାସୀ ଶ୍ରମିକ ଓ ଆଖପାଖ ଅଞ୍ଚଳର ସନ୍ଦିଗ୍ଧଙ୍କ ସ୍ବାବ୍ ସଂଗ୍ରହ ହୋଇଛି ବୋଲି ଜିଲାପାଳ ମୋନିଷା ବାନାର୍ଜୀ ସୂଚନା ଦେଇଛନ୍ତି ।
ଅନ୍ୟପକ୍ଷରେ ସୋନପୁର ବ୍ଲକ ହରଡଖୋଲ ପଞ୍ଚାୟତର ସରପଞ୍ଚ ତୃପ୍ତି କୁଅଁର ମୁଖ୍ୟମନ୍ତ୍ରୀ ପ୍ରଦାନ କରିଥିବା ଜିଲାପାଳଙ୍କ କ୍ଷମତାର ବ୍ୟବହାର କରିଛନ୍ତି । ଗୁରୁବାର ସେ ହରଡଖୋଲ ବଜାରକୁ ୪୮ ଘଣ୍ଟା ପାଇଁ ସଟ୍ଡାଉନ୍ କରିଛନ୍ତି। ଏହି ବଜାରରେ ୧୦୦ରୁ ଊର୍ଦ୍ଧ୍ୱ ଦୋକାନ ରହିଛି । ଫଳରେ ବଜାର ଓ ରାସ୍ତାଘାଟ୍ ଶୁନଶାନ ରହିଛି । ସଟ୍ଡାଉନ୍ ସମ୍ପର୍କିତ ନିର୍ଦ୍ଦେଶନାମା ଜାରି କରିବା ସହ ଏହାର ଅବମାନନା କଲେ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ହେବ ବୋଲି ସରପଞ୍ଚ କୁଅଁର ଜଣାଇଛନ୍ତି।
