କେନ୍ଦୁଝର, ୨୨।୪(ସ୍ବ.ପ୍ର.): କରୋନା ସଂକ୍ରମଣ ରୋକିବା ପାଇଁ ଲକ୍ଡାଉନ୍ ଜାରି ହୋଇଛି। ଏହା ସତ୍ତ୍ୱେ କେନ୍ଦୁଝର ସହରରେ ଲୋକଙ୍କ ଯାତାୟତ ବଢୁଛି। ଏ ନେଇ ପ୍ରଶାସନ ପକ୍ଷରୁ ଜନ ସଚେତନତା ପାଇଁ ବ୍ୟାପକ ପଦକ୍ଷେପ ଗ୍ରହଣ କରାଯାଉଛି। କେନ୍ଦୁଝର ପୌରପାଳିକା ପକ୍ଷରୁ ଭ୍ରାମ୍ୟମାଣ ଗାଡ଼ିରେ ବୁଲି ମାଇକ ଯୋଗେ ଘରୁ ନ ବାହାରିବା, ଜରୁରୀ ସମୟରେ ବାହାରିଲେ ମାସ୍କ ପିନ୍ଧିବା ଆଦି ଉପରେ ସଚେତନ କରାଯାଉଛି। ଲୋକେ ବାହାରେ ବୁଲୁଥିବାରୁ ପ୍ରମୁଖ ରାସ୍ତା, ଛକ ଆଦିରେ କୋଭିଡ-୧୯ ଉପରେ ସଚେତନତା ପେଣ୍ଟିଂ କରାଯାଇଛି। ଘରୁ ବାହାରିବା ସମୟରେ ମାସ୍କ ପିନ୍ଧିବା, ଘରେ ସବୁବେଳେ ହାତ ଧୋଇବା, ଜରୁରୀ ନ ଥିଲେ ଘରେ ରହିବା ଆଦି ପେଣ୍ଟିଂ ମାଧ୍ୟମରେ ଲୋକଙ୍କୁ ସଚେତନ କରାଯାଉଛି।
