ଲଣ୍ଡନ, ୧୮।୩ (ପି.ଟି.)- କରୋନା ଭାଇରସ୍ ସାରା ବିଶ୍ୱରେ ଏବେ ମହାମାରୀ ରୂପ ନେଇଥିବା ବେଳେ କ୍ରୀଡ଼ା ଏଥିରେ ସାଂଘାତିକ ଭାବେ ପ୍ରଭାବିତ ହୋଇଛି। ଖାସ୍ କରି ବିଶ୍ୱ ଫୁଟବଲର ଏକ ପ୍ରକାର ବିପର୍ଯ୍ୟୟ ସୃଷ୍ଟି ହୋଇଛି। ୟୁରୋପ୍ରେ ଜଣାଶୁଣା ଫୁଟବଲ ଲିଗ୍ଗୁଡିକ ବାତିଲ ହୋଇଛି। ଫଳରେ କ୍ଲବଗୁଡିକର ଭବିଷ୍ୟତ ନେଇ ଅନିଶ୍ଚିତତା ସୃଷ୍ଟି ହୋଇଛି। ପୁଣି କେବେ ଖେଳ ବା ଲିଗ୍ ଆରମ୍ଭ ହେବ ସେ ନେଇ କହିବା ଅସମ୍ଭବ ହୋଇପଡିଛି।
୫୫ଟି ମେମ୍ବର ଆସୋସିଏଶନ ମଙ୍ଗଳବାର ୟୁନିୟନ ଅଫ୍ ୟୁରୋପିଆନ ଫୁଟବଲ ଆସୋସିଏଶନ (ୟୁଇଏଫ୍ଏ)ର ଏକ ବୈଠକରେ ମିଳିତ ହୋଇଥିଲେ। ଆଗାମୀ ଜୁନରେ ଆରମ୍ଭ ହେବାକୁ ଥିବା ୟୁରୋ କପ୍ ୨୦୨୦କୁ ଘୁଞ୍ଚଇବା ପାଇଁ ଏହି ବୈଠକରେ ସହମତି ପ୍ରକାଶ ପାଇଥିଲା। ଆଗାମୀ ଗ୍ରୀଷ୍ମରେ ଜାତୀୟ ଲିଗ୍ ଓ ୟୁରୋପିଆନ୍ କ୍ଲବ କମ୍ପିଟିସନ ପାଇଁ ଏହା ଦ୍ୱାରା କ୍ୟାଲେଣ୍ଡର ବର୍ଷରେ କିଛି ସ୍ଥାନ ଛଡାଯାଇପାରେ।
ଯେତେବେଳେ ପରିସ୍ଥିତିରେ ସୁଧାର ହେବ ଓ ଫୁଟବଲ ପାଇଁ ନିରାପଦ ମନେ କରାଯିବ ସେତେବେଳେ ଲିଗ୍ ସେସନ ଶେଷ କରାଯିବ। ଏନେଇ ଅଫିସିଆଲ, ଖେଳାଳି ଓ ଫୁଟବଲ ବିଶେଷଜ୍ଞମାନେ ସହମତି ପ୍ରକାଶ କରିଛନ୍ତି। ୟୁରୋପିଆନ ଲିଗ୍ ପାଇଁ ଘରୋଇ ପ୍ରତିଯୋଗିତାଗୁଡିକ ଚଳିତ ସେସନରେ ଶେଷ ହେବା ନିହାତି ଆବଶ୍ୟକ। ୟୁରୋପିଆନ ଲିଗ୍ରେ ୨୯ଟି ଦେଶରେ ୯୫୦ଟି କ୍ଲବ ସାମିଲ ରହିଛନ୍ତି। କିନ୍ତୁ ଯଦି ଘରୋଇ ପ୍ରତିଯୋଗିତାଗୁଡିକୁ ସୀମିତ କାରଯାଏ ତାହାଲେ ପୂରା ଫୁଟବଲ ତନ୍ତ୍ର ନିଶ୍ଚିତ ଭାବେ ବିଗିଡି ଯିବ।
ଦେଶରେ ଜରୁରିକାଳୀନ ପରିସ୍ଥିତି ଘୋଷଣା କରାଯାଇଥିଲେ ମଧ୍ୟ ସ୍ପାନିଶ ଘରୋଇ ଲିଗ୍ ସେସନକୁ ଶେଷ କରିବାର ନିହାତି ଜରୁରୀ ବୋଲି ଜାଭିଏର ଟେବାସ କହିଛନ୍ତି। ପାରମ୍ପରିକ ଭାବେ ମେ’ରେ ଶେଷ ହେଉଥିଲେ ମଧ୍ୟ ପ୍ରତିଯୋଗିତାର ଅବଧିକୁ ବୃଦ୍ଧି କରାଯାଇପାରେ ବୋଲି କୁହାଯାଇଛି।
ଏଭଳି ପରିସ୍ଥିତିରେ ଯଦି ସେସନକୁ ସ୍ଥଗିତ ରଖାଯାଏ କିମ୍ବା ଜୁଲାଇ ଓ ଆଗକୁ ଆହୁରି ଘୁଞ୍ଚାଯାଏ ତାହେଲେ ଖେଳାଳିଙ୍କ ଚୁକ୍ତି ଓ ଲୋନ ଡିଲ୍ ମଧ୍ୟ ପ୍ରଭାବିତ ହେବା ନିଶ୍ଚିତ। କାରଣ ଏହି ଚୁକ୍ତିଗୁଡିକ ମେ ଓ ଜୁନରେ ଶେଷ ହେବାକୁ ଯାଉଛି। ଯେଉଁ ତାରକା ଖେଳାଳିମାନଙ୍କ ଚୁକ୍ତି ଶେଷ ହେବାକୁ ଯାଉଛି ସେମାନେ ହେଲେ ଚେଲସିର ଓଲିଭର ଗିରୋଡ, ଓ୍ବିଲିଆନ ଓ ପେଡ୍ରୋ ରୋଡ୍ରିଗୁଏଜ ଓ ଜାନ ବେରଟୋନଘେନ୍। ସଂଘର୍ଷ କରୁଥିବା ଫୁଟବଲ ଲିଗ୍ କ୍ଲବ୍ଗୁଡିକ ସବୁଠାରୁ ବେଶୀ କ୍ଷତି ସହିବେ। ଏ ଭଳି ସ୍ଥିତିରେ କ୍ଲବଗୁଡିକ କିପର ତିଷ୍ଠି ରହିବେ ସେ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ତେଣୁ ମୋଟା ମୋଟି ଉପରେ ୟୁରୋପ୍ରେ ଫୁଟବଲ ଅଧିକ କ୍ଷତିଗ୍ରସ୍ତ ହେଉଛି ଓ ଆଗକୁ ଆହୁରି କ୍ଷତି ସହିବ ବୋଲି ଆଶଙ୍କା କରାଯାଉଛି।
