ମହାପ୍ରଭୁ ଶ୍ରୀଜଗନ୍ନାଥଙ୍କ ପ୍ରତି ବିଶ୍ୱବାସୀଙ୍କ ଆସ୍ଥା ଓ ବିଶ୍ୱାସ ରହିଛି। ତାଙ୍କ ସାନ୍ନିଧ୍ୟ ପାଇବା ପାଇଁ କାହିଁ କେତେ ଦୂରରୁ ଭକ୍ତମାନେ ଛୁଟି ଆସନ୍ତି। ବିଶ୍ୱନିୟନ୍ତାଙ୍କ ସେବା କରିବାର ସାମାନ୍ୟ ସୁଯୋଗ ଯିଏ ପାଏ, ସେ ଭାବଭକ୍ତିରେ ହଜିଯାଏ। ହେଲେ କେତେଜଣ ଅଧିକାରୀ ମହାପ୍ରଭୁଙ୍କ ପ୍ରତି ଥିବା ଭକ୍ତି ଓ ବିଶ୍ୱାସକୁ ନେଇ ଖେଳ ଖେଳିଛନ୍ତି। ଏଥିପାଇଁ ଏବେ ଶ୍ରୀମନ୍ଦିରକୁ ନେଇ ସବୁଠି ଚର୍ଚ୍ଚା। ମହାପ୍ରଭୁଙ୍କ ୫୪୫ କୋଟି ଟଙ୍କାକୁ ନେଇ ଉଠୁଛି ପଡୁଛି ପଲ୍ଲୀରୁ ଦିଲ୍ଲୀ। ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ ୟେସ୍ ବ୍ୟାଙ୍କ କାରବାର ଉପରେ କଟକଣା ଜାରି କରିବା ପରେ ତାତିଉଠିଛନ୍ତି ଭକ୍ତ, ସେବାୟତ, ବୁଦ୍ଧିଜୀବୀ ଓ ଜଗନ୍ନାଥପ୍ରେମୀ। ୟେସ୍ ବ୍ୟାଙ୍କର ଆର୍ଥିକ ସ୍ଥିତି ବିଗିଡ଼ି ଯାଇଥିବା ବେଳେ ମହାପ୍ରଭୁ ଶ୍ରୀଜଗନ୍ନାଥଙ୍କ ୫୪୫ କୋଟି ଟଙ୍କା ଫେରିବ କି ନାହିଁ ତାକୁ ନେଇ ସନ୍ଦେହ ପ୍ରକାଶ ପାଇଛି। ତେବେ କାହିଁକି ଜାତୀୟକରଣ ବ୍ୟାଙ୍କରୁ ମହାପ୍ରଭୁଙ୍କ ଟଙ୍କା ଉଠାଯାଇ ଘରୋଇ ବ୍ୟାଙ୍କରେ ରଖାଗଲା ବୋଲି ଲୋକେ କ୍ଷୋଭ ପ୍ରକାଶ କରୁଛନ୍ତି। ଯେଉଁ ଅଧିକାରୀମାନେ ଚଞ୍ଚକତା କରି ଘରୋଇ ବ୍ୟାଙ୍କରେ ଏହି ଟଙ୍କା ରଖିଛନ୍ତି ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବିରେ ବିଭିନ୍ନ ବ୍ୟକ୍ତିବିଶେଷ ଏବଂ ସଙ୍ଗଠନ ପକ୍ଷରୁ ବିକ୍ଷୋଭ, ଆନ୍ଦୋଳନ ଚାଲିଛି। ଏମିତି କି ଥାନାରେ ଏତଲା ଦିଆଯାଇଛି। ଏହି ପ୍ରସଙ୍ଗକୁ ନେଇ ବିଧାନସଭାରେ ହଟ୍ଟଗୋଳ ହୋଇଛି। ବିରୋଧୀ ରାଜ୍ୟ ସରକାରଙ୍କୁ ଟାର୍ଗେଟ୍ କରିଛନ୍ତି। ସରକାର ମହାପ୍ରଭୁଙ୍କ ଟଙ୍କା ଉଠାଣ ପାଇଁ ବିଧାନସଭା ଗୃହ କମିଟି ଗଠନ କରିଛନ୍ତି। ମାତ୍ର କରୋନାର ଭୟାବହତାକୁ ନେଇ ସତର୍କତାମୂଳକ ପଦକ୍ଷେପ ସ୍ବରୂପ ଚଳିତ ବଜେଟ ଅଧିବେଶନକୁ ଆସନ୍ତା ୨୯ ତାରିଖ ଯାଏ ସ୍ଥଗିତ ରଖାଯାଇଛି। ଅନ୍ୟପକ୍ଷରେ କୌଣସି ପ୍ରକାର ସଭାସମିତି, କର୍ମଶାଳା, ସେମିନାରକୁ ବାତିଲ ଘୋଷଣା କରିଛନ୍ତି। ରାଜ୍ୟ ସରକାରଙ୍କ ଏହି ନିଷ୍ପତ୍ତି ପରେ ପୁରୀରେ ନାନା ପ୍ରକାର ଆଲୋଚନା ହେଉଛି। ଚଞ୍ଚକତା ପୂର୍ବକ ଯେଉଁମାନେ ମହାପ୍ରଭୁଙ୍କ ଟଙ୍କାକୁ ଘରୋଇ ବ୍ୟାଙ୍କ ହାତରେ ଟେକି ଦେଇଛନ୍ତି ସେମାନଙ୍କ ପାଇଁ ଏହି ଘୋଷଣା ବରଦାନ ସଦୃଶ ହୋଇଛି। କରୋନା ଭୂତାଣୁକୁ ନେଇ ଏବେ ସିନା ବିଶ୍ୱବାସୀ ଚିନ୍ତିତ ମାତ୍ର ଯେଉଁମାନେ ମହାପ୍ରଭୁଙ୍କ ଟଙ୍କାକୁ ବିପଦମୁହଁକୁ ଠେଲି ଦେଇଛନ୍ତି ସେମାନେ ଆଶ୍ୱସ୍ତ ଅନୁଭବ କରୁଥିବେ ବୋଲି ଚର୍ଚ୍ଚା ହେଉଛି।
– ହେମନ୍ତ ନାୟକ
