ନୂଆଦିଲ୍ଲୀ,୩।୩: ଚାଇନାରୁ ଆରମ୍ଭ ହୋଇଥିବା କରୋନା ସଂକ୍ରମଣ ଏବେ ପୃଥିବୀର ୬୭ ଦେଶରେ ଆତଙ୍କ ସୃଷ୍ଟି କରିଛି। ସେଥିମଧ୍ୟରୁ ୧୧ଟି ଦେଶରେ ସଂକ୍ରମିତଙ୍କ ମୃତ୍ୟୁ ମଧ୍ୟ ଘଟିଛି। ଏପରିସ୍ଥଳେ ସରକାର ଏବଂ ସ୍ବାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ଯଦି ସତର୍କତା ଅବଲମ୍ବନ ନ କରାଯାଏ ତେବେ ଭାରତରେ ବି କରୋନା ଆତଙ୍କ ଦେଖାଯିବାର ଯଥେଷ୍ଟ ସମ୍ଭାବନା ରହିଛି ବୋଲି କୁହାଯାଉଛି। ଇତିମଧ୍ୟରେ ବେସାମରିକ ବିମାନ ଚଳାଚଳ ଉପ ନିର୍ଦ୍ଦେଶକ ସୁନୀଲ କୁମାର ଦେଶର ସମସ୍ତ ବିମାନ ବନ୍ଦରରେ ବିଦେଶୀ ଯାତ୍ରୀଙ୍କ ଯାଞ୍ଚ୍ ପାଇଁ ନିର୍ଦ୍ଦେଶ ଦେଇଛନ୍ତି। ଚାଇନାର ଯାତ୍ରୀମାନଙ୍କ ସ୍ବାସ୍ଥ୍ୟ ଯାଞ୍ଚ୍ କରାଯିବ୍କୁ ନିର୍ଦ୍ଦେଶ ଜାରି ହୋଇଛି। ଦେଶର ୨୧ଟି ବିମାନ ବନ୍ଦର ଏବଂ ୧୨ଟି ବନ୍ଦରରେ ଯାତ୍ରୀଙ୍କ ସ୍ର୍କିନିଂ କରାଯାଉଛି। ବର୍ତ୍ତମାନ ସୁଦ୍ଧା ବିମାନ ବନ୍ଦରରେ ୫ ଲକ୍ଷ ୫୭ ହଜାର ଯାତ୍ରୀଙ୍କ ଯାଞ୍ଚ୍ ହୋଇଛି। ସେହିପରି ବନ୍ଦରରେ ୧୨,୪୩୧ ଯାତ୍ରୀଙ୍କ ସ୍ବାସ୍ଥ୍ୟ ଯାଞ୍ଚ୍ କରାଯାଇଛି। ଏହା ସହିତ ଇଟାଲୀ, ଇରାନ୍, ଦକ୍ଷିଣ କୋରିଆ, ଜାପାନ, ଭିଏତନାମ୍, ହଂକଂ, ନେପାଳ, ମାଲେସିଆ, ସିଙ୍ଗାପୁର, ଇଣ୍ଡୋନେସିଆ, ଥାଇଲାଣ୍ଡ୍ ଆଦି ୧୧ଟି ଦେଶର ଯାତ୍ରୀଙ୍କ ସ୍ବାସ୍ଥ୍ୟ ଯାଞ୍ଚ୍କୁ କଡ଼ାକଡ଼ି କରାଯାଇଛି। ଏସବୁ ଦେଶ ସହିତ ଯାତ୍ରା ଉପରେ କଟକଣା ଜାରି ନ କରାଗଲେ ଆଗାମୀ ଦିନରେ ଭାରତରେ ମଧ୍ୟ କରୋନା ସଂକ୍ରମଣ ହେବାର ଆଶଙ୍କା ଥିବା କୁହାଯାଉଛି। କରୋନା ସଂକ୍ରମଣକୁ ଦୃଷ୍ଟିରେ ରଖି ଭାରତ ସରକାର ଚାଇନା, ଦକ୍ଷିଣକୋରିଆ, ଇଟାଲୀ, ଇରାନ୍ ଏବଂ ସିଙ୍ଗାପୁର ଆଦି ଦେଶକୁ ଯାତ୍ରା ନ କରିବାକୁ ଲୋକଙ୍କୁ ପରାମର୍ଶ ଦେଇଛନ୍ତି।
