ଗାନ୍ଧିନଗର,୧୧।୮: ଗୁଜରାଟରେ ବନ୍ୟା ପରିସ୍ଥିତି ଭୟଙ୍କର ରୂପ ଧାରଣ କରିଥିବା ବେଳେ ପ୍ରତିଦିନ ଏଠାକାର ଉଦ୍ଧାରକାରୀ ଦଳଙ୍କର କିଛି ନା କିଛି ହୃଦୟସ୍ପର୍ଶୀ ଫଟୋ ଓ ଭିଡିଓ ଦେଖିବାକୁ ମିଳୁଛି। ଏବେ ମୋରବି ଜିଲା ଟଙ୍କରା ସହରର ଏମିତି ଏକ ଭିଡିଓ ଭାଇରାଲ ହୋଇଛି। ଯେଉଁଥିରେ ଦେଖିବାକୁ ମିଳିଛି ଗୁଜରାଟ ପୋଲିସ ବିଭାଗରେ କାମ କରୁଥିବା ଜଣେ କନଷ୍ଟେବଳ ୨ ବାଳିକାଙ୍କୁ କାନ୍ଧରେ ବସାଇ ବନ୍ୟା ପାଣି ଭିତରେ ଚାଲିଛନ୍ତି। ସେ ହେଉଛନ୍ତି ପୃଥିବରାଜ ସିଂ ଜାଡେଜା। ସୂଚନାଯୋଗ୍ୟ, କଲ୍ୟାଣପୁରର ଏକ ସ୍କୁଲରେ ପ୍ରାୟ ୪୩ ଜଣ ପିଲା ଦୀର୍ଘ ୫ ଘଣ୍ଟା ଧରି ବନ୍ୟା ପାଣିରେ ଫସି ରହି ଯାଇଥିଲେ। ଏହାପରେ ସ୍କୁଲ ପ୍ରଶାସନ ଗୁଜରାଟ ପୋଲିସର ସହଯୋଗ ଲୋଡିଥିଲା। ତେବେ ପାଣିର ସୂଅ ଏତେ ଅଧିକ ଥିଲା ଯେ ଏନ୍ଡିଆର୍ଏଫ୍ ଟିମ୍ ବୋଟ ଯୋଗେ ପିଲାଙ୍କୁ ଉଦ୍ଧାର କରିବା ସମ୍ଭବ ନ ଥିଲା। ହେଲେ ଗୁଜରାଟ ପୋଲିସ ସାହସର ସହ ଗୋଟିଏ ପରେ ଗୋଟିଏ ପିଲାଙ୍କୁ ଉଦ୍ଧାର କରିବା ଆରମ୍ଭ କରିଥିଲା। ଏତିକିବେଳେ କନଷ୍ଟେବଳ ପୃଥିବରାଜ ସିଂ ଜାଡେଜା ନିଜ କାନ୍ଧରେ ୨ଜଣ ବାଳିକାଙ୍କୁ ବସାଇ ନିଜ ଜୀବନକୁ ବାଜି ଲଗାଇ ଅଣ୍ଟାଏ ପାଣିରେ ସୁରକ୍ଷିତ ଭାବେ ପିଲାମାନଙ୍କୁ ଉଦ୍ଧାର କରିଥିଲେ। ପୃଥିବରାଜଙ୍କ ଏହି ସାହସିକତାକୁ ସବୁଠି ପ୍ରଶଂସା କରାଯାଉଛି। ଏହାପରେ ଗୁଜରାଟ ଡିଜିପି ସମଶେର ସିଂ ପୃଥିବରାଜଙ୍କ ସାହସିକତାର ପ୍ରଶଂସା କରିବା ସହ ସେହି ସମୟର ଏକ ଭିଡିଓ ଓ ଫଟୋକୁ ଟୁଇଟରରେ ଶେୟାର କରିଛନ୍ତି। ଆଉ ଲେଖିଛନ୍ତି, ‘ଆମ କାନ୍ଧ ଆପଣଙ୍କ ସୁରକ୍ଷା’।
