ନୂଆଦିଲ୍ଲୀ,୪।୫: ଦେଶରେ କରୋନା ସଂକ୍ରମଣକୁ ନେଇ ୪୦ ଦିନିଆ ଲକ୍ଡାଉନ ଅବଧି ପୂରଣ ହେବା ପରେ ଏବେ ଆରମ୍ଭ ହୋଇଛି ଲକ୍ଡାଉନ ୩.୦। ଏହା ମେ’ ୧୭ ପର୍ଯ୍ୟନ୍ତ ଲାଗୁ ହୋଇଥିବା ବେଳେ ଏବେ ସଂକ୍ରମିତ ଅଞ୍ଚଳକୁ ୩ଟି ଜୋନ୍ରେ ବିଭକ୍ତ କରାଯାଇଛି। ଗ୍ରୀନ୍, ଅରେଞ୍ଜ ଓ ରେଡ ଜୋନ୍ରେ ପୂର୍ବ ଲକ୍ଡାଉନ କଟକଣାରେ ଥିବା ନିୟମରେ କିଛିଟା କୋହଳ ମଧ୍ୟ କରାଯାଇଛି। ହେଲେ ଏବେ ଚିନ୍ତାର କାରଣ ପାଲଟିଛି ଦେଶରେ ବଢିଚାଲିଥିବା ସଂକ୍ରମିତଙ୍କ ସଂଖ୍ୟା। ମେ’ ମାସ ପୂର୍ବରୁ ଦେଶରେ କରୋନା ସଂକ୍ରମିତଙ୍କ ସଂଖ୍ୟା ୩୪ ହଜାର ଥିବା ବେଳେ ଏବେ ମେ’ ମାସ ପ୍ରଥମ ସପ୍ତାହରେ ଏହି ସଂଖ୍ୟାରେ ଦ୍ରୁତ ବୃଦ୍ଧି ଘଟିଛି। ଗତ ୩ ଦିନ ମଧ୍ୟରେ ୭,୬୮୦ ରୋଗୀ ଚିହ୍ନଟ ହୋଇଥିବା ଜଣାପଡିଛି। ସୂଚନାଯୋଗ୍ୟ, ସୋମବାର ସକାଳ ସୁଦ୍ଧା ଦେଶରେ କରୋନା ସଂକ୍ରମିତଙ୍କ ସଂଖ୍ୟା ୪୨,୫୩୩ରେ ପହଞ୍ଚିଛି। ତେବେ ଲକ୍ଡାଉନ ୩.୦ ଲାଗୁ ହେବା ପୂର୍ବରୁ ଆଉ କଟକଣାରେ ସମାନ୍ୟ କୋହଳ କରାଯିବା ଆରମ୍ଭ ନ ହେଉଣୁ ଏଭଳି ଭାବେ ସଂକ୍ରମିତଙ୍କ ସଂଖ୍ୟାରେ ବୃଦ୍ଧି ସମସ୍ତଙ୍କୁ ଚିନ୍ତାରେ ପକାଇ ଦେଇଛି।
