ଭୁବନେଶ୍ୱର, ୧୪।୬(କ୍ରୀଡ଼ା ପ୍ରତିନିଧି): ଭାରତୀୟ ଡିଫେଣ୍ଡର କମଲପ୍ରୀତ ସିଂ ଆଗାମୀ ଇଣ୍ଡିଆନ ସୁପରଲିଗ୍ (ଆଇଏସ୍ଏଲ୍) ସିଜନରେ ଓଡ଼ିଶା ଏଫସି ପକ୍ଷରୁ ଖେଳିବା ନିଶ୍ଚିତ ହୋଇ ଯାଇଛି। କାରଣ ଭୁବନେଶ୍ୱର ଭିତ୍ତିକ ଆଇଏସଏଲ କ୍ଲବ ଓଡ଼ିଶା ଏଫସି ସହିତ ୨ ବର୍ଷ ପାଇଁ ଚୁକ୍ତି କରିଛନ୍ତି କମଲପ୍ରୀତ। ୨୦୧୭-୧୮ ସିଜନରେ ମିନର୍ଭା ପଞ୍ଜାବକୁ ଆଇ-ଲିଗ୍ ଚାମ୍ପିୟନ କରାଇବାରେ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିଥିବା ଏହି ୨୨ ବର୍ଷୀୟ ଫୁଲ୍ ବ୍ୟାକ୍ କୋଲକାତାର ଇଷ୍ଟବେଙ୍ଗଲ ପକ୍ଷରୁ ୨ ବର୍ଷ ପ୍ରତିନିଧିତ୍ୱ କରିଥିଲେ। ପଞ୍ଜାବ ଜନ୍ମିତ ଏହି ଡିଫେଣ୍ଡର ଭାରତ ପକ୍ଷରୁ ବିଭିନ୍ନ ବୟସବର୍ଗର ପ୍ରତିଯୋଗିତାରେ ମଧ୍ୟ ଖେଳିଛନ୍ତି। କ୍ଲବ ସଭାପତି ରୋହନ ଶର୍ମା କମଲପ୍ରୀତଙ୍କୁ ସ୍ବାଗତ କରିଛନ୍ତି। ଗତ ସିଜନରେ ଆମେ ଡିଫେନ୍ସ ବିଭାଗ ଅଧିକ ଶକ୍ତିଶାଳୀ ହେବା ଅନୁଭବ କରିଥିଲୁ। ତେଣୁ କମଲପ୍ରୀତଙ୍କ ଉପସ୍ଥିତିରେ ନିଶ୍ଚିତ ଦଳକୁ ଫାଇଦା ମିଳିବ। ଏବେ ରାଇଟ୍ବ୍ୟାକ୍ ପାଇଁ ଓଡ଼ିଆ ଖେଳାଳି ଶୁଭମ୍ ଷଡ଼ଙ୍ଗୀଙ୍କ ସହିତ ତାଙ୍କର ସୁସ୍ଥ ପ୍ରତିଦ୍ୱନ୍ଦ୍ୱିତା ହେବ। ଏହା କ୍ଲବ ପାଇଁ ଉପାଦେୟ ହେବ“ ବୋଲି ରୋହନ କହିଛନ୍ତି। ଓଡ଼ିଶା ଏଫ୍ସି ସହିତ ଚୁକ୍ତିବଦ୍ଧ ହୋଇଥିବାରୁ ଖୁସି ଜାହିର କରିଛନ୍ତି କମଲପ୍ରୀତ। ”ଏହି ଦଳ ପାଇଁ ଟାଇଟଲ ଜିତିବା ଲକ୍ଷ୍ୟ ରହିବ। ଏହି କ୍ଲବ ଯୁବ ଖେଳାଳିଙ୍କୁ ଅଧିକ ସୁଯୋଗ ଦେଉଥିବା ଶୁଣିଛି। ତେଣୁ ପ୍ରତି ମ୍ୟାଚର ଷ୍ଟାର୍ଟିଂ ଲାଇନ୍ଅପ୍ରେ ସ୍ଥାନ ପାଇବାକୁ ମୋର ଲଢ଼େଇ ଜାରି ରହିବ“ ବୋଲି ଏହି ନିର୍ଭରଯୋଗ୍ୟ ଡିଫେଣ୍ଡର ପ୍ରକାଶ କରିଛନ୍ତି।
