ପରଜଙ୍ଗ, ୨।୮(ଡି.ଏନ.ଏ.)-ଢେଙ୍କାନାଳ ଜିଲା ପରଜଙ୍ଗସ୍ଥିତ ଅନୁଗୋଳ ସଂଯୁକ୍ତ କେନ୍ଦ୍ର ସମବାୟ ବ୍ୟାଙ୍କ (ଏୟୁସିସିବି) ଏଟିଏମ୍ ଉଦ୍ଘାଟନ ପରଠାରୁ କାମରେ ଆସୁନାହିଁ। ପରିଚାଳନାଗତ ଅବ୍ୟବସ୍ଥାରେ ଏପରି ସମସ୍ୟା ସୃଷ୍ଟି ହୋଇଥିବା ଅଭିଯୋଗ ହେଉଛି। ଏ ଦିଗରେ ବ୍ୟାଙ୍କ କର୍ତ୍ତୃପକ୍ଷ ଦୃଷ୍ଟି ଦେବାକୁ ଅଞ୍ଚଳବାସୀ ଦାବି କରିଛନ୍ତି।
ଟଙ୍କା ଉଠାଣ ସୁବିଧା ପାଇଁ ଗତ ଜୁଲାଇରେ ଉକ୍ତ ଏଟିଏମ୍ ଲୋକାର୍ପିତ କାଉଣ୍ଟର ହୋଇଥିଲା। ଉଦ୍ଘାଟନ ପରେ ଟଙ୍କା ଉଠାଣ ସ୍ବାଭାବିକ ଭାବେ ଚାଲିଥିଲା। ହେଲେ ଏହାର ଗୋଟିଏ ଦିନ ପରେ ଟଙ୍କା ଭର୍ତ୍ତି କରା ନ ଯିବାରୁ ଏହା ଏକପ୍ରକାର ଅଚଳ ହୋଇପଡ଼ିଛି। ଏ ନେଇ ଅଭିଯୋଗ ସତ୍ତ୍ୱେ ବ୍ୟାଙ୍କ କର୍ତ୍ତୃପକ୍ଷ ଶୁଣୁ ନ ଥିବା ଅଞ୍ଚଳବାସୀ ଅଭିଯୋଗ କରିଛନ୍ତି। ଏଟିଏମ୍ରେ ତାଲା ଝୁଲୁଥିବାରୁ ଏହାର ସମ୍ମୁଖରେ ବ୍ୟାଙ୍କ କର୍ମଚାରୀମାନେ ବାଇକ୍ ପାର୍କିଂ କରୁଛନ୍ତି। ଅନ୍ୟପଟେ ଦୀର୍ଘ ମାସେ ହେଲା ଉକ୍ତ ଏଟିଏମ୍ ଅଚଳ ହୋଇପଡ଼ିଥିବାବେଳେ ଏହାକୁ ମରାମତି କରାଯାଉନାହିଁ। ଏହାକୁ ନେଇ ଅସନ୍ତୋଷ ବଢ଼ିବାରେ ଲାଗିଛି। ଏହାକୁ ତୁରନ୍ତ ମରାମତି କରିବାକୁ ଦାବି ସ୍ଥାନୀୟ ବାସିନ୍ଦା ଦାବି କରିଛନ୍ତି।
ଏ ନେଇ ଏୟୁସିସିବି ଶାଖା ପରିଚାଳକ ବସନ୍ତ କୁମାର ପ୍ରଧାନ କୁହନ୍ତି, ଏଟିଏମ୍ରେ ଯାନ୍ତ୍ରିକ ତ୍ରୁଟି ଦେଖାଦେଇଛି। ଟଙ୍କା ଭର୍ତ୍ତି କଲେ କେତେବେଳେ ଉଠୁଛି, ତ ଆଉ କେତେବେଳେ ଉଠୁନାହିଁ। ଫଳରେ ବାଧ୍ୟ ହୋଇ ଏହାକୁ ବନ୍ଦ ରଖାଯାଇଥିବା ସେ ସୂଚନା ଦେଇଛନ୍ତି।
