ନୂଆଦିଲ୍ଲୀ,୨୮ା୧୧(ପି.ଟି.): ସ୍ବତନ୍ତ୍ର ସୁରକ୍ଷା ଗ୍ରୁପ୍ (ଏସ୍ପିଜି) ସଂଶୋଧନ ବିଲ୍ ଲୋକ ସଭାରେ ବୁଧବାର ଗୃହୀତ ହୋଇଯାଇଛି। ବିଲ୍କୁ ବିରୋଧ କରି କଂଗ୍ରେସ ସଦସ୍ୟମାନେ କକ୍ଷତ୍ୟାଗ କରିଥିଲେ। ପ୍ରସ୍ତାବିତ ବିଲ୍ ଅନୁଯାୟୀ କେବଳ ପ୍ରଧାନମନ୍ତୀ ଓ ତାଙ୍କ ସରକାରୀ ବାସଭବନରେ ରହୁଥିବା ପରିବାର ସଦସ୍ୟମାନଙ୍କୁ ଏସ୍ପିଜି ସୁରକ୍ଷା ମିଳିବ। ଏହା ବ୍ୟତୀତ ପୂର୍ବତନ ପ୍ରଧାନମନ୍ତ୍ରୀଙ୍କ କାର୍ଯ୍ୟକାଳ ଶେଷ ହେବାର ୫ ବର୍ଷ ପର୍ଯ୍ୟନ୍ତ ସେ ଓ ତାଙ୍କ ସହ ସରକାରୀ ବାସଭବନରେ ରହୁଥିବା ପରିବାର ସଦସ୍ୟଙ୍କୁ ଏହି ସୁରକ୍ଷା ମିଳିବ। ଅଧିକାଂଶ ବିରୋଧୀ ସଦସ୍ୟ ବିଲ୍ ଉପରେ ସଂଶୋଧନ ପ୍ରସ୍ତାବ ଆଣିଥିଲେ ହେଁ ତାହା ବାଚନିକ ଭୋଟରେ କାଟ ଖାଇଯାଇଥିଲା।
ଏସ୍ପିଜିକୁ ଅଧିକ ଦକ୍ଷ କରିବା ବିଲ୍ର ଉଦ୍ଦେଶ୍ୟ ବୋଲି ଆଲୋଚନାରେ ଭାଗନେଇ ସ୍ବରାଷ୍ଟ୍ରମନ୍ତ୍ରୀ ଅମିତ୍ ଶାହ କହିଥିଲେ। ପୂର୍ବ ସରକାର ଏହି ଆଇନକୁ କୋହଳ କରିଦେଇଥିବା ସେ ଅଭିଯୋଗ କରିଥିଲେ। ନରେନ୍ଦ୍ର ମୋଦିଙ୍କ ସରକାର ଆଣିଥିବା ସଂଶୋଧନ ଆଇନର ମୂଳ ଉଦ୍ଦେଶ୍ୟ ପୂରଣ କରିବ ବୋଲି ସେ କହିଥିଲେ। ଅଧିକାଂଶ ଦେଶରେ ଏଭଳି ସୁରକ୍ଷା ବ୍ୟବସ୍ଥା କେବଳ ରାଷ୍ଟ୍ରମୁଖ୍ୟଙ୍କ ପାଇଁ ରହିଛି। ଏହା କେବଳ ଶାରୀରିକ ସୁରକ୍ଷା ନୁହେଁ, ଏସ୍ପିଜି ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟକୁ ସୁରକ୍ଷା ଦେବା ସହ ତାଙ୍କ ସ୍ବାସ୍ଥ୍ୟ ଓ ଯୋଗାଯୋଗର ମଧ୍ୟ ସୁରକ୍ଷା କରିଥାନ୍ତି ବୋଲି ଶାହ କହିଥିଲେ।
ବୀରବଲ୍ ନାଥ କମିଟିଙ୍କ ସୁପାରିସ କ୍ରମେ ୧୯୮୫ରେ ଏସ୍ପିଜି ଗଠନ ହୋଇଥିଲା। ଏଥିପାଇଁ ୧୯୮୮ରେ ଏକ ଆଇନ କାର୍ଯ୍ୟକାରୀ କରାଯାଇଥିଲା। ତେବେ ଉକ୍ତ ଆଇନକୁ କୋହଳ କରିବା ଲାଗି ପୂର୍ବବର୍ତ୍ତୀ ସରକାରମାନେ ବିଭିନ୍ନ ସମୟରେ ଏଥିରେ ସଂଶୋଧନ କରିଛନ୍ତି। ଏକ ସଂଶୋଧନ କ୍ରମେ ପୂର୍ବତନ ପ୍ରଧାନମନ୍ତ୍ରୀ ରାଜୀବ ଗାନ୍ଧୀଙ୍କ ପରିବାର ସଦସ୍ୟ ସୋନିଆ ଗାନ୍ଧୀ, ରାହୁଲ ଓ ପ୍ରିୟଙ୍କାଙ୍କୁ ଏସ୍ପିଜି ସୁରକ୍ଷା ଯୋଗାଇଦିଆଗଲା। ବର୍ତ୍ତମାନର ସରକାର ଏସ୍ପିଜି ପରିବର୍ତ୍ତେ ଜେଡ୍ ପ୍ଲସ୍ ସୁରକ୍ଷା ପ୍ରଦାନ କରିଛି।
