କେନ୍ଦୁଝର, ୨୮ା୭ (ସ୍ବ.ପ୍ର.)- ପରିବାରର ଆର୍ଥିକ ଅନଟନ ଯୋଗୁ ନାନା ସମସ୍ୟା ମଧ୍ୟରେ ପାଠ ପଢୁଥିବା ମେଧାବୀ ତଥା ଭିନ୍ନକ୍ଷମ ଆଦିବାସୀ ଛାତ୍ର କୃଷ୍ଣଚନ୍ଦ୍ର ଦେହୁରି ପରିସ୍ଥିତି ସହ ଲଢେଇ କରି ଚାଲିଛନ୍ତି। ହଦଗଡ ସ୍ଥିତ ଜବାହର ନବୋଦୟ ବିଦ୍ୟାଳୟରୁ ଏଥର ଯୁକ୍ତ ୨ ପାସ ପରେ ସେ ତରା ରିଜିଓନାଲ ଇନଷ୍ଟିଚ୍ୟୁଟ ଅଫ ଏଜୁକେସନରେ ୪ ବର୍ଷିଆ ଇଣ୍ଟିଗ୍ରେଟେଡ ପାଠ୍ୟକ୍ରମରେ ନାମ ଲେଖାଇବାକୁ ମନୋନୀତ ହୋଇଛନ୍ତି। ନାମ ଲେଖାଇବା ସକାଶେ ଆବଶ୍ୟକ ପଡୁଛି ୨୨ ହଜାର ୩୭୫ ଟଙ୍କା । ଏହି ଅର୍ଥ ସେ କିପରି ଯୋଗାଡ କରିବେ ସେ ନେଇ ଚିନ୍ତାରେ ଅଛନ୍ତି। ଠିକ ସମୟରେ ଅର୍ଥ ଯୋଗାଡ ହୋଇ ନ ପାରିଲେ ନାମ ଲେଖା ହୋଇ ପାରିବ ନାହିଁ ା
କୃଷ୍ଣଚନ୍ଦ୍ରଙ୍କ ଘର ଘଷିପୁରା ବ୍ଲକର ପଞ୍ଚୁଗୋଛିଆ ଗ୍ରାମରେ। ସେ ମାଟ୍ରିକ ପରୀକ୍ଷାରେ ୯୫.୫ ଓ ଯୁକ୍ତ ୨ ରେ ୯୫.୪ ପ୍ରତିଶତ ମାର୍କ ରଖିଥିଲେ। ଜଣେ ମେଧାବୀ ଛାତ୍ର ହୋଇ ମଧ୍ୟ ତାଙ୍କ ଉଚ୍ଚଶିକ୍ଷାରେ ଅର୍ଥ ବାଧକ ସାଜିବା ସଚେତନ ନାଗରିକଙ୍କୁ ଆଲୋଡିତ କରିଛି। ପାଠପଢି ଶିକ୍ଷକତା କଲେ ସେ ପରିବାର ପ୍ରତିପୋଷଣ କରି ପାରିବେ ବୋଲି ଆଶା ରଖିଛନ୍ତି। କୃଷ୍ଣଚନ୍ଦ୍ର କହିଛନ୍ତି, ତାଙ୍କର ଦୃଷ୍ଟି ଶକ୍ତି କମ୍। ୬୦ ପ୍ରତିଶତ ଭିନ୍ନକ୍ଷମ ପ୍ରମାଣପତ୍ର ପାଇଛନ୍ତି। ଏହା ସତ୍ତ୍ୱେ ସେ ପାଠପଢା ପ୍ରତି କେବେ ହେଳା କରି ନାହାନ୍ତି। ୨୦୧୪ରେ ଦୁର୍ଘଟଣାରେ ତାଙ୍କ ବାପାଙ୍କ ଦେହାନ୍ତ ହୋଇଗଲା। ମା’ କିଡନୀ ରୋଗରେ ଆକ୍ରାନ୍ତ ହୋଇ ଚିକିତ୍ସିତ ହେଉଛନ୍ତି। ତାଙ୍କର ୪ ଭାଇ ା ସବୁଠାରୁ ବଡ ଭାଇଙ୍କର ଅକାଳ ବିୟୋଗ ଘଟିବାରୁ ତାଙ୍କ ପତ୍ନୀ ଓ ୩ ପିଲା ବଞ୍ଚିବା ପାଇଁ ସଂଗ୍ରାମ କରୁଛନ୍ତି । ଭାଇମାନଙ୍କ ମଧ୍ୟରେ କୃଷ୍ଣଚନ୍ଦ୍ର ତୃତୀୟ। ତାଙ୍କର ଆଉ ଜଣେ ଉପର ଭାଇ ଏବଂ ସବା ସାନ ଭାଇ ମେଧାବୀ। ବଡ ଭାଇ ଟ୍ୟୁଶନ କରି ଯୁକ୍ତ ୩ ଦ୍ୱିତୀୟ ବର୍ଷରେ ପଢୁଛନ୍ତି। ସବା ସାନ ଭାଇ ମାଟ୍ରିକ ପରୀକ୍ଷାରେ ଏଥର ଉତ୍ତୀର୍ଣ୍ଣ ହୋଇ ରେଭେନ୍ସା ମହାବିଦ୍ୟାଳୟରେ ନାମ ଲେଖାଇବାର ସୁଯୋଗ ପାଇଛନ୍ତି। ସରକାରୀ କଲେଜ ହୋଇଥିବାରୁ କମ୍ ଖର୍ଚ୍ଚରେ ସେ ନାମ ଲେଖାଇ ପାରିଛନ୍ତି। ତେବେ ବିଇଡିରେ ତାଙ୍କର ନାମ ଲେଖା ହୋଇଗଲେ ସେ ଟ୍ୟୁଶନ କରି ଅନ୍ୟ ଖର୍ଚ୍ଚ ତୁଲାଇ ପାରନ୍ତେ ବୋଲି କୃଷ୍ଣଚନ୍ଦ୍ର କହିଛନ୍ତି।
