ଇନ୍ଦୋର,୧୫।୧୧(ପି.ଟି.)- ଓପନର ମୟଙ୍କ ଅଗ୍ରଓ୍ବାଲଙ୍କ ଦ୍ୱିଶତକ ସହାୟତାରେ ଭାରତ ଏଠାରେ ଚାଲିଥିବା ବାଂଲାଦେଶ ବିପକ୍ଷ ପ୍ରଥମ ଟେଷ୍ଟ ମ୍ୟାଚ୍ର ପ୍ରଥମ ଇନିଂସରେ ବୃହତ୍ ସ୍କୋର ହାସଲ କରିବା ସହ ସ୍ଥିତି ଦୃଢ଼ କରିଛି। ବାଂଲାଦେଶର ପ୍ରଥମ ଇନିଂସ ସ୍କୋର ୧୫୦ ରନର ଜବାବରେ ଭାରତ ଦ୍ୱିତୀୟ ଦିବସ ଖେଳ ଶେଷ ସୁଦ୍ଧା ୧୧୪ ଓଭରରେ ୬ ଉଇକେଟ ହରାଇ ୪୯୩ ରନ ସଂଗ୍ରହ କରିଛି। ମ୍ୟାଚ୍ ଆଉ ୩ ଦିନ ବାକିଥିବା ବେଳେ ଭାରତ ୪ ଉଇକେଟ ହାତରେ ରଖି ୩୪୩ ରନର ବୃହତ୍ ଅଗ୍ରଣୀ ହାସଲ କରିଛି। ଷ୍ଟମ୍ପ ଅପସାରଣ ବେଳକୁ ଅଲରାଉଣ୍ଡର ରବୀନ୍ଦ୍ର ଜାଡେଜା ୬୦ ଓ ଉମେଶ ଯାଦବ ୨୫ ରନ କରି ଅପରାଜିତ ରହିଛନ୍ତି।
ପ୍ରଥମ ଦିନର ଅସମାପ୍ତ ପ୍ରଥମ ଇନିଂସ ସ୍କୋର ୮୬/୧ରୁ ଭାରତ ଖେଳ ଆରମ୍ଭ କରିଥିଲା। ଓଭରନାଇଟ ବ୍ୟାଟ୍ସ୍ୟାନ ମୟଙ୍କ ଓ ଟେଷ୍ଟ ସ୍ପେଶାଲିଷ୍ଟ କୁହାଯାଉଥିବା ଚେତେଶ୍ୱର ପୂଜାରା ଯଥାକ୍ରମେ ୩୭ ଓ ୪୩ ରନରୁ ଖେଳ ଆରମ୍ଭ କରିଥିଲେ। ପୂଜାରା ୭୨ ବଲରୁ ୯ ଚୌକା ସହ ୫୪ ରନର ଅର୍ଦ୍ଧଶତକୀୟ ପାଳି ଖେଳି ଦ୍ରୁତ ବୋଲର ଆବୁ ଜାଏଦଙ୍କ ଚତୁର୍ଥ ସ୍ଲିପ୍ରେ ବଦଳ ଖେଳାଳି ସୈଫ ହାସନଙ୍କୁ କ୍ୟାଚ୍ ଦେଇ ପ୍ୟାଭିଲିୟନ ଫେରିଥିଲେ। ମୟଙ୍କ ୩୩୦ଟି ବଲର ସମ୍ମୁଖୀନ ହୋଇ ୨୮ଚୌକା ଓ ୮ଛକା ସହ ୨୪୩ ରନର ଦ୍ୱିଶତକୀୟ ପାଳି ଖେଳି ଆଉଟ ହେବା ସହ ଅଢ଼େଇ ଶହ ରନ ହାସଲରୁ ମାତ୍ର ୭ ରନ ପାଇଁ ବଞ୍ଚିତ ହୋଇଥିଲେ। ମୟଙ୍କ ଅଫ୍ ସ୍ପିନର ମେହେଦୀ ହାସନ ମିରାଜଙ୍କ ବଲକୁ ସୁଇପ୍ କରିବାକୁ ଯାଇ ମିଡ୍ ଉଇକେଟରେ ଆବୁ ଜାଏଦଙ୍କୁ କ୍ୟାଚ୍ ଦେଇ ପ୍ୟାଭିଲିୟନ ଫେରିଥିଲେ। ମିରାଜଙ୍କ ମିଡଲ ଷ୍ଟମ୍ପ ଉପର ବଲ୍କୁ ଓ୍ବାଇଡ୍ ଲଙ୍ଗଅନ୍ ଉପରେ ଦେଇ ଏକ ଲମ୍ବା ଛକା ମାରି ମୟଙ୍କ ୨୦୦ ରନ ପୂରଣ କରିଥିଲେ। ପୂଜାରା ଓ ମୟଙ୍କ ଦ୍ୱିତୀୟ ଉଇକେଟରେ ୯୧ ରନ ସଂଗ୍ରହ କରିଥିଲେ। ମୟଙ୍କ ଏଥିସହିତ କ୍ୟାରିୟରର ତୃତୀୟ ଶତକ ଓ କ୍ୟାରିୟର ଶ୍ରେଷ୍ଠ ଦ୍ୱିତୀୟ ଦ୍ୱିଶତକ ହାସଲ କରିଛନ୍ତି। ପୂଜାରାଙ୍କ ପରେ ଭାରତୀୟ ଅଧିନାୟକ ବିରାଟ କୋହଲି ଖାତା ଖୋଲିବା ପୂର୍ବରୁ ଆବୁ ଜାଏଦଙ୍କ ବଲ୍ରେ ଏଲ୍ବିଡବ୍ଲ୍ୟୁ ହୋଇ ଚକ୍ମା ଖାଇଥିଲେ। ଏହାପରେ ବ୍ୟାଟିଂ କରିବାକୁ ଆସି ଅଜିଙ୍କ୍ୟ ରାହାନେ ଆବୁ ଜାଏଦଙ୍କ ବଲ୍ରେ ଡିପ୍ରେ ତାଇଜୁଲ ଇସ୍ଲାମଙ୍କୁ କ୍ୟାଚ୍ ଦେଇ ଆଉଟ ହେବା ପୂର୍ବରୁ ୮୬ ରନର ଅର୍ଦ୍ଧଶତକୀୟ ପାଳି ଖେଳିଥିଲେ। ଚତୁର୍ଥ ଉଇକେଟରେ ରାହାନେ ଓ ମୟଙ୍କ ୧୯୦ ରନ ସଂଗ୍ରହ କରି ପ୍ରତିପକ୍ଷ ବୋଲରଙ୍କୁ ନିରାଶ କରିବା ସହ ଭାରତର ସ୍ଥିତି ଦୃଢ଼ କରିଥିଲେ। ରାହାନେଙ୍କ ପରେ ମୟଙ୍କ ଆଉଟ ହୋଇଥିଲେ। ଏହାପରେ ଉଇକେଟକିପର ବ୍ୟାଟ୍ସମ୍ୟାନ ରିଦ୍ଧିମାନ ଶାହ ମାତ୍ର ୧୨ ରନ କରି ପ୍ୟାଭିଲିୟନ ଫେରିଥିଲେ। ଆଉଟ ହେବା ପୂର୍ବରୁ ମୟଙ୍କ ପଞ୍ଚମ ଉଇକେଟରେ ଜାଡେଜାଙ୍କ ସହ ୧୨୩ ରନ ସଂଗ୍ରହ କରିଥିଲେ। ଖେଳ ଶେଷ ଆଡକୁ ଜାଡେଜା, ଶାହା ଓ ଉମେଶ ଦ୍ରୁତ ଗତିରେ ରନ ସଂଗ୍ରହ କରିବାକୁ ପ୍ରୟାସ କରିଥିଲେ। ସପ୍ତମ ଉଇକେଟରେ ଜାଡେଜା ଓ ଉମେଶ ୧୯ ବଲରୁ ଅପରାଜିତ ୩୯ ରନ ସଂଗ୍ରହ କରିଥିଲେ। ମାତ୍ର ୧୦ଟି ବଲ୍ର ସମ୍ମୁଖୀନ ହୋଇ ୧ ଚୌକା ଓ ୩ ଛକା ସହ ଉମେଶ ୨୫ ରନ, ଜଡେଜା ୭୬ ବଲରୁ ୬ ଚୌକା ଓ ୨ ଛକା ସହ ୬୦ ରନ କରି ଅପରାଜିତ ରହିଥିଲେ। ଭାରତ ଦ୍ୱିତୀୟ ଦିବସରେ ୪.୩୨ ହାରରେ ଦ୍ରୁତ ଗତିରେ ରନ ସଂଗ୍ରହ କର ୪୦୭ ରନ ସଂଗ୍ରହ କରିଥିଲା। ବୋଲିଂରେ ବାଂଲାଦେଶ ତରଫରୁ ଅବୁ ଜାଏଦ ସର୍ବାଧିକ ୪, ଇବାତଦ ହୋସେନ ଓ ମେହିଦି ହାସନ ମିରାଜ ଗୋଟିଏ ଲେଖାଏ ଉଇକେଟ ଅକ୍ତିଆର କରିଥିଲେ।
ସଂକ୍ଷିପ୍ତ ସ୍କୋର:
ବଂଲାଦେଶ ପ୍ରଥମ ଇନିଂସ- ୫୮.୩ ଓଭରରେ ୧୫୦ ଅଲଆଉଟ୍।
ଭାରତ ପ୍ରଥମ ଇନିଂସ- ୧୧୪ ଓଭରରେ ୪୯୩/୬
(ମୟଙ୍କ- ୨୪୩, ରାହାନେ- ୮୬, ଜାଡେଜା- ୬୦*, ପୂଜାରା- ୫୪, ଆବୁ ଜାଏଦ- ୪/୧୦୮, ଇବାଦତ- ୧/୧୧୫, ମିରାଜ- ୧/୧୨୫)।
