ଲଣ୍ଡନ, ୧୬।୭- ଆଇସିସି ବିଶ୍ୱକପ୍ ଦ୍ୱାଦଶ ସଂସ୍କରଣର ରୋମାଞ୍ଚକ ଫାଇନାଲ ମୁକାବିଲାରେ ନ୍ୟୁଜିଲାଣ୍ଡକୁ ପରାସ୍ତ କରି ଆୟୋଜକ ଇଂଲଣ୍ଡ ଚାମ୍ପିୟନ ହେବାର ସୌଭାଗ୍ୟ ଲାଭ କରିଛି। ଏଥିସହ କ୍ରିକେଟ୍ ବିଶ୍ୱକପ୍ର ୪୪ ବର୍ଷର ଇତିହାସରେ ପ୍ରଥମଥର ଲାଗି କ୍ରିକେଟ୍ର ଜନକଭାବେ ପରିଚିତ ଇଂଲଣ୍ଡ ବିଶ୍ୱ ବିଜେତା ହୋଇଛି। ଏହି ବିଜୟ ସହିତ ବିଶ୍ୱର ପ୍ରଥମ ଦେଶ ଭାବେ ଇଂଲଣ୍ଡ କ୍ରିକେଟ୍ ବିଶ୍ୱକପ୍, ଫୁଟ୍ବଲ ବିଶ୍ୱକପ୍ ଓ ରଗ୍ବୀ ବିଶ୍ୱକପ୍ ଜିତିବାର ବିରଳର କୃତିତ୍ୱ ଲାଭ କରିଛି।
ଇତିହାସରେ ଇଂଲଣ୍ଡ ପ୍ରଥମଥର ଲାଗି ୧୯୬୬ରେ ମେଜର ଟାଇଟଲ ଜିତିଥିଲା। ଫିଫା ବିଶ୍ୱକପ୍ର ୮ମ ସଂସ୍କରଣ ଇଂଲଣ୍ଡରେ ୧୯୬୬ରେ ଅନୁଷ୍ଠିତ ହୋଇଥିଲା। ଫାଇନାଲରେ ଆୟୋଜକ ଇଂଲଣ୍ଡ ୪-୨ ଗୋଲ ବ୍ୟବଧାନରେ ପଶ୍ଚିମ ଜର୍ମାନୀକୁ ପରାସ୍ତ କରି ବିଶ୍ୱକପ୍ ମୁକୁଟ ପିନ୍ଧିଥିଲା। ଏହାପରେ ଇଂଲଣ୍ଡ ରଗ୍ବୀ ବିଶ୍ୱକପ୍ ଟ୍ରଫି ହାତେଇଥିଲା। ୨୦୦୩ରେ ଅଷ୍ଟ୍ରେଲିଆରେ ରଗ୍ବୀ ବିଶ୍ୱକପ୍ ଆୟୋଜିତ ହୋଇଥିଲା। ଫାଇନାଲରେ ଆୟୋଜକ ଅଷ୍ଟ୍ରେଲିଆକୁ ୧୭-୨୦ ପଏଣ୍ଟରେ ପରାସ୍ତ କରି ଇଂଲଣ୍ଡ ଚାମ୍ପିୟନ ହୋଇଥିଲା। ୧୯୬୬ (ଫିଫା ବିଶ୍ୱକପ୍) ପରେ ଇଂଲଣ୍ଡର ଏହା ୨ୟ ବିଶ୍ୱକପ୍ ଟ୍ରଫିଥିଲା। ଶେଷରେ ରବିବାର ଅନୁଷ୍ଠିତ ରୋମାଞ୍ଚକଭରା ଆଇସିସି ପୁରୁଷ ବିଶ୍ୱକପ୍ର ଫାଇନାଲ ମ୍ୟାଚ୍ ଟାଇ (ନ୍ୟୁଜିଲାଣ୍ଡ- ୨୪୧/୮, ଇଂଲଣ୍ଡ- ୨୪୧/୧୦)ରହିଥିଲା। ଏହାପରେ ସୁପର୍ ଓଭରରେ ମଧ୍ୟ ଇଂଲଣ୍ଡ ପ୍ରଥମେ ବ୍ୟାଟିଂ କରି ୧୫ ରନ କରିଥିବାବେଳେ ନ୍ୟୁଜିଲାଣ୍ଡ ସମାନ ସଂଖ୍ୟକ ରନ୍ କରିବାରୁ ମ୍ୟାଚ୍ ପୁଣି ଟାଇରେ ସମାପ୍ତ ହୋଇଥିଲା। ଫଳରେ ମ୍ୟାଚ୍ରେ ଅଧିକ ବାଉଣ୍ଡରୀ ମାରିଥିବାରୁ ଇଂଲଣ୍ଡକୁ ଚାମ୍ପିୟନ ଘୋଷିତ କରାଯାଇଥିଲା।
ମଧ୍ୟ ଆଇସିସି ମହିଳା ବିଶ୍ୱକପ୍ (୫୦ ଓଭର) ଟାଇଟଲ ହାସଲ କରିବାରେ ସଫଳ ହୋଇଛି। ୨୦୧୭ ଆଇସିସି ମହିଳା ବିଶ୍ୱକପ୍ ଫାଇନାଲରେ ହେଥର୍ ନାଇଟ୍ଙ୍କ ନେତୃତ୍ୱରେ ଇଂଲଣ୍ଡ ୯ ରନରେ ଭାରତକୁ ପରାସ୍ତ କରି ଚାମ୍ପିୟନ ହୋଇଥିଲା। ଇଂଲଣ୍ଡ ପ୍ରଥମେ ବ୍ୟାଟିଂ କରି ୫୦ ଓଭରରେ ୭ ଉଇକେଟ୍ ହରାଇ ୨୨୮ ରନ କରିଥିବାବେଳେ ଭାରତ ୪୮.୪ ଓଭରରେ ୨୧୯ ରନ କରି ଅଲ୍ଆଉଟ୍ ହୋଇଯାଇଥିଲା।
