ଲଣ୍ଡନ, ୧୨ା୨ (ଏଏଫ୍ପି)- ଶ୍ରୀଲଙ୍କା ଟୁର୍ ପାଇଁ ଇଂଲଣ୍ଡ ଟେଷ୍ଟ ଦଳକୁ ଏକ ବର୍ଷ ବ୍ୟବଧାନରେ ପ୍ରତ୍ୟାବର୍ତ୍ତନ କରିଛନ୍ତି ବେନ୍ ଫୋକ୍ସ ଏବଂ କିଟନ ଜେନିଙ୍ଗ୍ସ। ୧୨ ମାସ ପୂର୍ବେ ଓ୍ବେଷ୍ଟଇଣ୍ଡିଜ ଟୁର୍ ପରେ ଲାଙ୍କାଶାୟାର ଓପନର ଜେନିଙ୍ଗ୍ସ ଏବଂ ସରେ ଉଇକେଟକିପର ବ୍ୟାଟ୍ସମ୍ୟାନ ଫୋକ୍ସ ଦଳର ବାଦ୍ ପଡ଼ିଥିଲେ। ଇଂଲଣ୍ଡ ତରଫରୁ ୧୭ ଥର ପ୍ରତିନିଧିତ୍ୱ କରିସାରିଥିବା ଜେନିଙ୍ଗ୍ସ ତାଙ୍କର ଉଭୟ ଟେଷ୍ଟ ଶତକ ଉପମହାଦେଶରେ ହାସଲ କରିଛନ୍ତି। ଅନ୍ୟପରେ ୨୦୧୮ରେ ଶ୍ରୀଲଙ୍କା ବିପକ୍ଷରେ ଇଂଲଣ୍ଡର କ୍ଲିନ ସୁଇପ୍ ବିଜୟରେ ଫୋକ୍ସ ପ୍ଲେୟର ଅଫ୍ ଦି ସିରିଜ ହୋଇଥିଲେ। ଫୋକ୍ସ ୫ ଟେଷ୍ଟ ମ୍ୟାଚରେ ବିଜୟ ହାସଲ କରିଛନ୍ତି। ୨୦୧୮ ନଭେମ୍ବରରେ ଗାଲେଠାରେ ତାଙ୍କ ପ୍ରଥମ ଟେଷ୍ଟ ବିଜୟର ସଫଳତା ହାସଲ କରିଥିଲେ। ଏହି ମ୍ୟାଚରେ ସେ ଏକ ଚମତ୍କାର ଶତକ ହାସଲ କରିଥିଲେ। ଇଂଲଣ୍ଡର ରେକର୍ଡ ଉଇକେଟ ହାସଲକାରୀ ବୋଲର ଜେମ୍ସ ଆଣ୍ଡରସନ ଏପର୍ଯ୍ୟନ୍ତ ଆଘାତଜନିତ ସମସ୍ୟାରୁ ମୁକୁଳି ନ ଥିବାରୁ ଟୁର୍ରେ ସାମିଲ ହୋଇ ପାରିବେ ନାହିଁ। ଗତବର୍ଷ ବିଶ୍ୱକପ୍ ପରଠାରୁ ଫର୍ମ ଫେରିପାଇବା ଲାଗି ସଂଘର୍ଷ ଚଳାଇଥିବା ଜୋସ୍ ବଟଲରଙ୍କୁ ଚୟନକର୍ତ୍ତାମାନେ ଆଉ ଏକ ସୁଯୋଗ ଦେଇଛନ୍ତି। ହେଲେ ଦୁଇ ମ୍ୟାଚ ବିଶିଷ୍ଟ ଟେଷ୍ଟ ସିରିଜରେ ଚୂଡ଼ାନ୍ତ ଦଳରେ ସ୍ଥାନ ପାଇଁ ତାଙ୍କୁ ଫୋକ୍ସଙ୍କ ସହିତ ପ୍ରତିଯୋଗିତାରେ ଅବତୀର୍ଣ୍ଣ ହେବାକୁ ପଡ଼ିବ।
