ନୂଆଦିଲ୍ଲୀ,୨୦ା୪(ପି.ଟି.): ଇ-କମର୍ସ ପ୍ଲାଟ୍ଫର୍ମ ଜରିଆରେ ମୋବାଇଲ୍ ଫୋନ୍, ରେଫ୍ରିଜରେଟର, ରେଡିମେଡ୍ ପୋଷାକ ଆଦି ଅଣଅତ୍ୟାବଶ୍ୟକ ସାମଗ୍ରୀ ବିକ୍ରି ଲାଗି ସରକାର ଅନୁମତି ଦେବାର ୪ ଦିନ ପରେ ନିଷ୍ପତ୍ତି ବଦଳାଇଛନ୍ତି। ଇ-କମର୍ସ କମ୍ପାନୀଗୁଡ଼ିକ ଏହିସବୁ ସାମଗ୍ରୀ ବିକ୍ରି କରିପାରିବେ ନାହିଁ ବୋଲି ସ୍ବରାଷ୍ଟ୍ର ମନ୍ତ୍ରଣାଳୟ ପକ୍ଷରୁ ରବିବାର ଜାରି ହୋଇଥିବା ନିର୍ଦ୍ଦେଶନାମାରେ କୁହାଯାଇଛି। କ’ଣ ପାଇଁ ସରକାର ତାଙ୍କର ପୂର୍ବ ନିଷ୍ପତ୍ତି ବଦଳାଇଲେ ବୋଲି ପ୍ରଶ୍ନ ହେବାରୁ ସ୍ବରାଷ୍ଟ୍ର ମନ୍ତ୍ରଣାଳୟର ଯୁଗ୍ମ ସଚିବ ପୁଣ୍ୟସଲିଳା ଶ୍ରୀବାସ୍ତବ କହିଛନ୍ତି, ଦେଶରେ କୋଭିଡ୍-୧୯ ସ୍ଥିତି ଗତିଶୀଳ ଥିବାରୁ ସରକାରଙ୍କୁ ଦିନକୁ ଦିନ ନୂଆ ନିଷ୍ପତ୍ତି ନେବାକୁ ପଡ଼ୁଛି। ଇ-କମର୍ସ ପ୍ଲାଟଫର୍ମ ମାଧ୍ୟମରେ ଅଣଅତ୍ୟାବଶ୍ୟକ ସାମଗ୍ରୀ ବିକ୍ରି ପାଇଁ ଅନୁମତି ଦେଲେ ଏହା ଲକ୍ଡାଉନ୍ର ଉପଯୁକ୍ତ କାର୍ଯ୍ୟକାରିତାକୁ ପ୍ରଭାବିତ କରିପାରେ ବୋଲି ଅନୁଭବ କରିବା ପରେ ସରକାର ନିଷ୍ପତ୍ତି ବଦଳାଇଥିବା ସେ କହିଛନ୍ତି।
ସୂଚନାଯୋଗ୍ୟ, ଏପ୍ରିଲ ୨୦ରୁ ଇ-କମର୍ସ ପ୍ଲାଟଫର୍ମରେ ଉପରୋକ୍ତ ସାମଗ୍ରୀ ବିକ୍ରି ଲାଗି ଗତ ୧୫ ତାରିଖରେ ପ୍ରକାଶିତ ସରକାରୀ ନିର୍ଦ୍ଦେଶନାମାରେ କୁହାଯାଇଥିଲା। ସରକାର କ’ଣ ପାଇଁ ନିଷ୍ପତ୍ତି ବଦଳାଇଲେ ତାହା ସ୍ପଷ୍ଟ ହୋଇନାହିଁ। ତେବେ ଇ-କମର୍ସ କମ୍ପାନୀ ଭଳି ସ୍ଥାନୀୟ ବ୍ୟବସାୟୀମାନଙ୍କୁ ଅଣଅତ୍ୟାବଶ୍ୟକ ସାମଗ୍ରୀ ବିକ୍ରି ଲାଗି ଅନୁମତି ଦେବାକୁ ଖୁଚୁରା ବ୍ୟବସାୟୀମାନେ ସରକାରଙ୍କ ଉପରେ ଚାପ ପକାଇଥିବା ଚର୍ଚ୍ଚା ହେଉଛି। ନୂଆ ଗାଇଡଲାଇନରେ ସ୍ଥାନୀୟ ବ୍ୟବସାୟୀଙ୍କୁ ଅନୁମତି ନ ଦେଇ ଇ-କମର୍ସ କମ୍ପାନୀଗୁଡ଼ିକୁ ଅଣଅତ୍ୟାବଶ୍ୟକ ସାମଗ୍ରୀ ବିକ୍ରି ଅନୁମତି ଦେବା ପକ୍ଷପାତିତା ବୋଲି ଖୁଚୁରା ବ୍ୟବସାୟୀମାନେ ଅଭିଯୋଗ କରିଥିଲେ। ବିରୋଧୀ ଦଳ କଂଗ୍ରେସ ମଧ୍ୟ ସରକାରଙ୍କ ଏଭଳି ନିଷ୍ପତ୍ତିକୁ ସମାଲୋଚନା କରିଥିଲା। ସ୍ବରାଷ୍ଟ୍ର ମନ୍ତ୍ରଣାଳୟ ଏ ସମ୍ପର୍କରେ ନିର୍ଦ୍ଦେଶନାମା ସ୍ପଷ୍ଟ କରୁ ବୋଲି କଂଗ୍ରେସ କହିଥିଲା। ତେବେ ଇ-କମର୍ସ କମ୍ପାନୀଗୁଡ଼ିକ ପୂର୍ବଭଳି ଖାଦ୍ୟ ସାମଗ୍ରୀ, ଔଷଧ ଇତ୍ୟାଦି ଅତ୍ୟାବଶ୍ୟକ ସାମଗ୍ରୀ ବିକ୍ରି କରିପାରିବେ। ୨୦ ତାରିଖରୁ ମୋବାଇଲ୍ ଫୋନ୍, ଟାବଲେଟ୍, ଟିଭି ଆଦି ଯୋଗାଇବା ପାଇଁ ଇତିମଧ୍ୟରେ କେତେକ କମ୍ପାନୀ ଅର୍ଡର ରଖିଦେଇଛନ୍ତି। ସରକାରଙ୍କ ନୂଆ ନିର୍ଦ୍ଦେଶନାମା ପରେ ଏବେ ସେମାନଙ୍କୁ ଅର୍ଡର ଫେରାଇବାକୁ ହେବ।
