ନୟାଗଡ଼ ଅଫିସ,୨୮।୬- ଗ୍ରୀଷ୍ମଛୁଟି ଅବକାଶରେ ୨ ମାସରୁ ଅଧିକ ଦିନ ବିଦ୍ୟାଳୟ ବନ୍ଦ ହେବା ପରେ ଗତ ଶୁକ୍ରବାର ଠାରୁ ଖୋଲିଛି। ତେବେ ଜିଲାର ଅଧିକାଂଶ ବିଦ୍ୟାଳୟରେ ରୋଷେଇ ଘର ବ୍ୟବସ୍ଥା ନ ଥିବାରୁ ପୂର୍ବରୁ ଯେଉଁଭଳି ଦୟନୀୟ ଭାବେ ରୋଷେଇ କାର୍ଯ୍ୟ ଚାଲୁଥିଲା ସେହିଭଳି କରାଯାଉଛି। ରୋଷେୟାମାନେ କେଉଁଠି ସ୍କୁଲ କାନ୍ଥକୁ ଟିଣ ଆଉଜାଇ ତ ଆଉ କେଉଁଠି ଝାଟିମାଟି କୁଡ଼ିଆ ଭିତରେ ରୋଷେଇ କରୁଛନ୍ତି। ପୁଣି କେଉଁଠି ସ୍କୁଲ ବାରଣ୍ଡାରେ ପ୍ରସ୍ତୁତ କରୁଛନ୍ତି ମଧ୍ୟାହ୍ନଭୋଜନ। ବର୍ଷର ଅନ୍ୟ ସମୟରେ ବାହାରେ ଯେନତେନ ପ୍ରକାରେ ରୋଷେଇ କାର୍ଯ୍ୟ ହେଉଥିବା ବେଳେ ବର୍ଷା ୪ ମାସ ହଇରାଣ ହେବାକୁ ପଡ଼ିଥାଏ। ବର୍ତ୍ତମାନ ବର୍ଷାଋତୁ ଆସିଥିବାରୁ କିପରି ମଧ୍ୟାହ୍ନଭୋଜନ ପ୍ରସ୍ତୁତ ହେବ, ତାହା ରୋଷେୟାଙ୍କ ଚିନ୍ତାର କାରଣ ହୋଇଛି। ପ୍ରବଳ ବର୍ଷା ହେଲେ ଚୁଲିରେ ପାଣି ପଶି ରୋଷେଇ ବନ୍ଦ ଯୋଗୁ ଛାତ୍ରୀଛାତ୍ରମାନଙ୍କୁ ମଧ୍ୟାହ୍ନଭୋଜନରେ ବିସ୍କୁଟ ଖାଇବାକୁ ଦେଇ ଚଳାଇଦେବା ଘଟଣା ପୂର୍ବରୁ ଅନେକଥର ଦେଖାଯାଇଛି। ଫଳରେ ଜିଲାରେ ମଧ୍ୟାହ୍ନଭୋଜନ ବ୍ୟବସ୍ଥା ବାଟ ହୁଡିଥିବା ନେଇ ଆଲୋଚନା ହେଉଛି। ଏହା ଦ୍ୱାରା ଛାତ୍ରୀଛାତ୍ରମାନେ ସରକାରୀ ବିଦ୍ୟାଳୟ ପ୍ରତି ମୁହଁ ମୋଡ଼ିଦେଇ ଘରୋଇ ବିଦ୍ୟାଳୟମୁହଁା ହେଉଥିବା ନେଇ ମଧ୍ୟ ଅଭିଯୋଗ ହେଉଛି।
ଶିକ୍ଷା କାର୍ଯ୍ୟାଳୟରୁ ମିଳିଥିବା ରିପୋର୍ଟ ଅନୁସାରେ, ପ୍ରଥମରୁ ଅଷ୍ଟମ ଶ୍ରେଣୀ ଛାତ୍ରୀଛାତ୍ରଙ୍କ ପାଇଁ ଜିଲାର ୮ଟି ବ୍ଲକରେ ୧୨୦୬ଟି ପ୍ରାଥମିକ ଓ ଉଚ୍ଚ ପ୍ରାଥମିକ ବିଦ୍ୟାଳୟରେ ୯୦୯୬୯ ଛାତ୍ରୀଛାତ୍ର ପଢୁଛନ୍ତି। ୧୨୦୬ ବିଦ୍ୟାଳୟ ମଧ୍ୟରୁ ୫୫୮ରେ ରୋଷେଇ ଘର ଥିଲାବେଳେ ୬୪୮ଟିରେ ଏହା ନାହିଁ। ରଣପୁର ବ୍ଲକରେ ସର୍ବାଧିକ ୨୩୨ଟି ସ୍କୁଲରୁ ମାତ୍ର ୬୦ଟିରେ ରୋଷେଇ ଘର ଥିଲାବେଳେ ଗଣିଆ ବ୍ଲକରେ ୬୦ଟି ବିଦ୍ୟାଳୟରୁ ୪୨ଟି, ଦଶପଲ୍ଲାରେ ୧୫୨ଟି ବିଦ୍ୟାଳୟରୁ ୯୦ଟି, ଖଣ୍ଡପଡ଼ାରେ ୧୩୨ ବିଦ୍ୟାଳୟରୁ ୫୭ଟି, ଭାପୁରରେ ୧୧୮ଟି ବିଦ୍ୟାଳୟରୁ ୪୨ଟି, ଓଡ଼ଗାଁରେ ୧୮୭ଟି ବିଦ୍ୟାଳୟରୁ ୧୨୧ଟି, ନୂଆଗାଁରେ ୧୫୨ଟି ବିଦ୍ୟାଳୟରୁ ୮୩ ଓ ନୟାଗଡ଼ରେ ୧୭୩ରୁ ୬୩ ବିଦ୍ୟାଳୟରେ ରୋଷେଇ ଘର ବ୍ୟବସ୍ଥା ଅଛି। ଗଣିଆ ବ୍ଳକରେ ୧ଟି, ରଣପୁର ବ୍ଲକରେ ୨୭, ଓଡ଼ଗାଁ ବ୍ଳକରେ ୩, ନୂଆଗାଁ ବ୍ଲକରେ ୪ ଓ ନୟାଗଡ଼ ବ୍ଲକରେ ୫ ଏହିପରି ୪୦ ବିଦ୍ୟାଳୟର ରୋଷେଇ ଘର କାର୍ଯ୍ୟ ସରିଥିବାବେଳେ ତାହା କାର୍ଯ୍ୟକ୍ଷମ ହୋଇପାରିନାହିଁ। ଗୁରୁତ୍ୱପୂର୍ଣ୍ଣ କଥା ହେଉଛି, ୫୫୮ ରୋଷେଇ ଘର ମଧ୍ୟରୁ ୪୫ ରୋଷେଇ ଘର ନଷ୍ଟ ହୋଇଯାଇଥିବା ବେଳେ ସେଥିରେ ଯେନତେନ ପ୍ରକାରେ ରୋଷେଇ କରାଯାଉଛି। ସେହିଭଳି ୫୧ଟି ରୋଷେଇ ଘରର କାର୍ଯ୍ୟ ବର୍ତ୍ତମାନ ଚାଲୁରହିଛି। ସୂଚନାଯୋଗ୍ୟ, ପୂର୍ବରୁ ରୋଷେଇ ଘର ପାଇଁ ପ୍ରତ୍ୟେକ ବିଦ୍ୟାଳୟକୁ ୬୦ ହଜାର ଟଙ୍କା ଆସୁଥିବାରୁ ସେତେବେଳେ ବିଦ୍ୟାଳୟର ପ୍ରଧାନ ଶିକ୍ଷୟିତ୍ରୀଶିକ୍ଷକମାନେ ଏ ଦିଗ ପ୍ରତି ଧ୍ୟାନ ନ ଦେବାରୁ ଅଧିକାଂଶ ବିଦ୍ୟାଳୟରେ ରୋଷେଇ ଘର ପାଇଁ ଆସିଥିବା ଟଙ୍କା ଫେରିଯାଇଥିବା ଜଣାପଡ଼ିଛି। ଫଳରେ ଏଭଳି ଅବ୍ୟବସ୍ଥା ଦେଖାଦେଇଛି। ବିଦ୍ୟାଳୟରେ ରୋଷେଇ ଗୃହ ନ ଥିବା ନେଇ ବିଭାଗକୁ ପ୍ରତିବର୍ଷ ରିପୋର୍ଟ ଦିଆଯାଉଛି। ପରେ ଅର୍ଥ ମଞ୍ଜୁର ହେଲାପରେ ପର୍ଯ୍ୟାୟକ୍ରମେ ରୋଷେଇ ଘର ତିଆରି ହେଉଥିବା ଜିଲା ଶିକ୍ଷା କାର୍ଯ୍ୟାଳୟ ପକ୍ଷରୁ ସୂଚନା ମିଳିଛି।
