କାମାକ୍ଷାନଗର, ୭।୬(ଡି.ଏନ.ଏ) – ‘ଅମ୍ଫାନ୍’ ପ୍ରଭାବରେ ଭଲ ବର୍ଷିଛି। ଆଉ ଏବେ ବଙ୍ଗୋପସାଗରରେ ସୃଷ୍ଟି ହେବାକୁଥିବା ଲଘୁଚାପ ମୌସୁମୀକୁ ସକ୍ରିୟ କରିବ ବୋଲି ପୂର୍ବାନୁମାନ କରିଛି ପାଣିପାଗ ବିଭାଗ। ହେଲେ ଅକ୍ଷୟ ତୃତୀୟାଠାରୁ ଅଖିମୁଠି ଅନୁକୂଳ କରି ଜମିରେ ଲଙ୍ଗଲ କଷିବାକୁ ଅପେକ୍ଷା କରିଥିବା ଚାଷୀ କିନ୍ତୁ ଖୁସି ହୋଇପାରୁନି। କାରଣ ତା’ ପାଖରେ ବିହନ ନାହିଁ। କରୋନା ସଙ୍କଟ ସମୟରେ ଚାଷକୁ ଆଶ୍ରା କରି ବର୍ଷକ ପାଇଁ ଯୋଜନା କରିଥିବା ଚାଷୀ ସରକାରୀ ବିହନକୁ ଅନାଇଛି। ବିହନ ପହଞ୍ଚତ୍ବାରେ ବିଳମ୍ବ ହେଲେ ଏହାର ପ୍ରତିକୂଳ ପ୍ରଭାବ ଚାଷ ଉପରେ ପଡ଼ିବ ବୋଲି ଆଶଙ୍କା ବ୍ୟକ୍ତ କରିଛନ୍ତି କାମାକ୍ଷାନଗର କୃଷି ଜିଲାର ଚାଷୀ।
କୃଷି ବିଭାଗ ପକ୍ଷରୁ ମିଳିଥିବା ସୂଚନା ଅନୁଯାୟୀ, କାମାକ୍ଷାନଗର, ପରଜଙ୍ଗ, ଭୁବନ ଏବଂ କଙ୍କଡ଼ାହାଡ଼ ବ୍ଲକକୁ ନେଇ ଗଠିତ କାମାକ୍ଷାନଗର କୃଷି ଜିଲାରେ ଚଳିତ ବର୍ଷ ୭୮,୭୨୦ ହେକ୍ଟର ଜମିରେ ଖରିଫ୍ ଚାଷ କରାଯିବାକୁ ଲକ୍ଷ୍ୟ ଧାର୍ଯ୍ୟ ହୋଇଛି। ସେଥିରୁ ୩୬,୬୫୦ ହେକ୍ଟରରେ ଧାନ, ୧,୬୭୦ ହେକ୍ଟରରେ ମକା, ୧,୧୮୦୫ ହେକ୍ଟରରେ ଡାଲି, ୮,୨୩୫ ହେକ୍ଟରରେ ତୈଳବୀଜ, ୧୭,୨୧୦ ହେକ୍ଟରରେ ପରିବା, ୨,୮୪୫ ହେକ୍ଟରରେ ମସଲା, ୧୭୨ ହେକ୍ଟରରେ ଆଖୁ ସମେତ କପା, ବାଜରା ଚାଷ କରିବାକୁ ଯୋଜନା କରାଯାଇଛି। କରୋନା ସଙ୍କଟ ସମୟରେ ଆର୍ଥିକ ସ୍ଥିତି ସୁଧାରିବାକୁ ଚାଷ ହିଁ ଏକମାତ୍ର ବିକଳ୍ପ ରହିଛି। ପାଗ ବି ଅନୁକୂଳ ଅଛି। ହେଲେ ଧାନ ବିହନ ଅଭାବ ଏବେ ଚାଷୀଙ୍କ ଚିନ୍ତା ବଢ଼ାଇଛି।
ଚଳିତ ବର୍ଷ କାମାକ୍ଷାନଗରରେ ୯,୮୫୪, ଭୁବନରେ ୯,୦୯୦, ପରଜଙ୍ଗରେ ୧୦,୪୬୪, କଙ୍କଡାହାଡରେ ୭,୨୪୨ ହେକ୍ଟର ଜମିରେ ଧାନଚାଷ କରାଯିବାକୁ ଲକ୍ଷ୍ୟଧାର୍ଯ୍ୟ ହୋଇଛି। ଅଞ୍ଚଳର ଚାଷୀମାନେ ମୁଖ୍ୟତଃ ପୂଜା, ନବୀନ, ସ୍ବର୍ଣ୍ଣ, ୧୦୦୯, କଳାଚମ୍ପା, ସାରଳା ଆଦି କିସମର ବିହନ ଉପରେ ନିର୍ଭର କରିଥାନ୍ତି। ଏଥିଲାଗି ୩,୯୩୫ କୁଇଣ୍ଟାଲ ବିହନ ଆବଶ୍ୟକ। ଅଦ୍ୟାବଧି ୧,୩୨୧ କୁଇଣ୍ଟାଲ ବିହନ ଯୋଗାଣ ହୋଇଛି। କାମାକ୍ଷାନଗରକୁ ୩୩୫, ଭୁବନକୁ ୩୮୨, ପରଜଙ୍ଗକୁ ୨୨୭, କଙ୍କଡାହାଡକୁ ୩୭୭ କୁଇଣ୍ଟାଲ ବିହନ ଆସିଛି। ଘରୋଇ ଏବଂ ବଜାରରେ ମିଳୁଥିବା ବିହନ ଉପରେ ଚାଷୀମାନେ ଭରସା କରିପାରୁ ନ ଥିବାବେଳେ ଚାଷ ଆଗକୁ କିପରି ବଢ଼ିବ ତାହା ଏବେ ପ୍ରଶ୍ନବାଚୀ ସୃଷ୍ଟି କରିଛି। ଅନ୍ୟପଟେ କାମାକ୍ଷାନଗର କୃଷିଜିଲାରେ ଦୀର୍ଘଦିନ ହେବ କୃଷି ଅଧିକାରୀ ପଦବୀ ଖାଲି ପଡ଼ିଛି। ଦାୟିତ୍ୱରେ ଥିବା ଭାରପ୍ରାପ୍ତ ଅଧିକାରୀ ଅବସର ନେଇଯିବା ପରେ ଜିଲା ବାହାରର ଜଣେ ଅଧିକାରୀ ଏହି ଦାୟିତ୍ୱ ନିର୍ବାହ କରୁଛନ୍ତି। କର୍ମଚାରୀ ଅଭାବରୁ ଚାଷୀଙ୍କୁ ଉତ୍ତମ ମାର୍ଗଦର୍ଶନ ମିଳିପାରୁନାହିଁ, ଯାହା ବୋଝ ଉପରେ ନଳିତା ବିଡ଼ା ହୋଇଛି। ଜିଲା କୃଷି ବିଭାଗ ଏଥିରେ ହସ୍ତକ୍ଷେପ କରି ଆବଶ୍ୟକ ବିହନ ଯୋଗାଣ କରିବାକୁ ଦାବି ହେଉଛି। ଏ ନେଇ କୃଷି ଜିଲା ଅଧିକାରୀ ରାଜକିଶୋର ନାୟକ କୁହନ୍ତି, ରାଜ୍ୟ ବିହନ ନିଗମ ପକ୍ଷରୁ ଉପଖଣ୍ଡକୁ ବିହନ ଯୋଗାଣ ହୋଇଥାଏ। ବିଭାଗର ଦାବି ମୁତାବକ ବିହନ ଆସିନାହିଁ। ୧୪ ତାରିଖ ପୂର୍ବରୁ ଆବଶ୍ୟକ ବିହନ ଆସି ପହଞ୍ଚତ୍ବ ବୋଲି ଆଶା କରାଯାଉଛି।
