ବାରିପଦା ଅଫିସ,୨୮ା୫- କୋଭିଡ୍-୧୯ ପାଇଁ ସ୍ବତନ୍ତ୍ର ଭାବେ ନିଯୁକ୍ତି ପାଇଥିବା ମଲ୍ଟି ପ୍ରପୋଜ ହେଲଥ୍ ୱାର୍କର ( ସ୍ବାସ୍ଥ୍ୟ କର୍ମୀ) ନିଯୁକ୍ତିରେ ଅନିୟମିତତା ହୋଇଥିବା ଅଭିଯୋଗ କରି ବୁଧବାର ଆଶାୟୀ ପ୍ରାର୍ଥୀନୀମାନେ ମୟୂରଭଞ୍ଜ ଜିଲା ମୁଖ୍ୟ ଚିକିତ୍ସା ଅଧିକାରୀଙ୍କ କାର୍ଯ୍ୟାଳୟ ଆଗରେ ଆମରଣ ଅନଶନରେ ବସିଥିଲେ। ଅପରାହ୍ନ ୨ଟା ୩୦ ସମୟରେ ସିଡିଏମ୍ଓ ଡା. ରୂପଭାନୁ ମିଶ୍ର ଧାରଣାସ୍ଥଳକୁ ଆସି ସମସ୍ୟା ସମାଧାନ କରାଯିବ ବୋଲି ପ୍ରତିଶ୍ରୁତି ଦେବା ପରେ ଅନଶନ ପ୍ରତ୍ୟାହୃତ ହୋଇଥିଲା।
ଅଭିଯୋଗ ଅନୁଯାୟୀ, କରୋନା ମହାମାରୀ ପରିଚାଳନା ପାଇଁ ଜିଲାରେ ସ୍ବାସ୍ଥ୍ୟକର୍ମୀ (ମହିଳା) ୧୬୫ଟି ପୋଷ୍ଟ ନିମନ୍ତେ ବିଜ୍ଞାପନ ବାହାରିଥିଲା। ଅନ୍ୟ ଜିଲାଗୁଡ଼ିକରେ ନିଯୁକ୍ତି ଦିଆଯିବାର ବହୁ ବିଳମ୍ବରେ ମୟୂରଭଞ୍ଜ ଜିଲାରେ ନିଯୁକ୍ତି ଦିଆଯାଇଥିଲା। ୧୬୫ଟି ପୋଷ୍ଟ ମଧ୍ୟରୁ ୧୦୭ଟି ପଦବୀରେ ନିଯୁକ୍ତି ପ୍ରଦାନ କରାଯାଇଥିଲା। ସେହିଭଳି କେଉଁ ନିୟମରେ ସେମାନଙ୍କୁ ନିଯୁକ୍ତି ଦିଆଗଲା ସେ ନେଇ ମଧ୍ୟ ଜିଲା ୱେବସାଇଟରେ କୌଣସି ତଥ୍ୟ ପ୍ରକାଶ ପାଇଲା ନାହିଁ। ଅନ୍ୟ ଜିଲାର ୱେବସାଇଟରେ ସମସ୍ତ ତଥ୍ୟ ପ୍ରକାଶ କରାଯାଉଥିବା ବେଳେ କାହିଁକି ମୟୂରଭଞ୍ଜ ଜିଲା ୱେବସାଇଟରେ ଏ ନେଇ ତଥ୍ୟ ରଖାଗଲା ନାହିଁ ସେ ନେଇ ଆଶାୟୀମାନେ ପ୍ରଶ୍ନ କରିଛନ୍ତି। ଖାଲି ପଡ଼ିଥିବା ୫୯ଟି ପଦବୀ ପାଇଁ ଦ୍ୱିତୀୟ ପ୍ରର୍ଯ୍ୟାୟ ଚୟନ ପ୍ରକ୍ରିୟା ଲାଗି ଆଶାୟୀ ପ୍ରାର୍ଥୀନୀମାନେ ଜିଲା ମୁଖ୍ୟ ଚିକିତ୍ସା ଅଧିକାରୀ (ସିଡ଼ିଏମ୍ଓ)ଙ୍କ କାର୍ଯ୍ୟାଳୟରେ ଜଣାଇଥିଲେ ମଧ୍ୟ ଏ ଦିଗରେ କୌଣସି ପଦକ୍ଷେପ ଗ୍ରହଣ କରାଯାଇ ନାହିଁ । ପରେ ଆଶାୟୀମାନେ ଜିଲାପାଳଙ୍କ ନିକଟକୁ ଅଭିଯୋଗ କରିବାକୁ ଯାଇଥିଲେ ମଧ୍ୟ ଜିଲାପାଳଙ୍କୁ ଦେଖା କରି ପାରି ନ ଥିଲେ। ଗତ ୨୫ ତାରିଖରେ ଜିଲାପାଳଙ୍କୁ ଟ୍ରେଣ୍ଡ୍ ଅନଏମ୍ପ୍ଲୋଇଏଡ଼ ୟୂଥ୍ ୱେଲଫେୟାର ଟ୍ରଷ୍ଟ ମିଳିତ ମହାସଂଘ ପକ୍ଷରୁ ଏହାର ସମାଧାନ କରିବା ପାଇଁ ଦାବିପତ୍ର ଦିଆଯାଇଥିଲା। ଏହାର କୌଣସି ସମାଧାନ ନ ହେବାରୁ ବୁଧବାର ଟ୍ରେଣ୍ଡ୍ ଅନଏମ୍ପ୍ଲୋଇଏଡ଼ ୟୂଥ୍ ୱେଲଫେୟାର ଟ୍ରଷ୍ଟ ମିଳିତ ମହାସଂଘର ସଭାପତି ପ୍ରାର୍ଥସାରଥୀ ଜେନାଙ୍କ ନେତୃତ୍ୱରେ ୩୦ ଜଣ ଆଶାୟୀ ପ୍ରାର୍ଥତ୍ନୀ ପୂର୍ବାହ୍ନ ୧୦ଟାରୁ ଆମରଣ ଅନଶନରେ ବସିଥିଲେ। ସିଡିଏମ୍ଓ ଡା.ମିଶ୍ର ଏହାର ଯଥାଶୀଘ୍ର ସମାଧାନ କରାଯିବ ବୋଲି କହିଛନ୍ତି।
