ଭୁବନେଶ୍ୱର,୨୭ା୨(ବ୍ୟୁରୋ): ବ୍ୟାଙ୍କ ଆକାଉଣ୍ଟରେ ଆଧାର ଲିଙ୍କ୍ କରାଇ ଦେବାକୁ କହି ବରିଷ୍ଠ ନାଗରିକଙ୍କ ଆକାଉଣ୍ଟରୁ ୩ ଲକ୍ଷ ୫୪ ହଜାର ଟଙ୍କା ହଡପ କରାଯାଇଛି। ଏ ନେଇ ଖଣ୍ଡଗିରି ଥାନାରେ ଅଭିଯୋଗ କରାଯିବା ପରେ ଅଭିଯୁକ୍ତ ଦମ୍ପତିଙ୍କୁ ପୋଲିସ ଗିରଫ କରିଛି। ଗିରଫ ଦମ୍ପତି ହେଲେ କେନ୍ଦ୍ରାପଡା ଜିଲା ରାଜକନିକା ଥାନା ମଝିସାହିର ସ୍ବାମୀ ବିଭୂ ପ୍ରସାଦ ନାୟକ(୨୬) ଓ ସ୍ତ୍ରୀ ରେଖାରାଣୀ ନାୟକ(୨୪)। ଦୁହେଁ ଖଣ୍ଡଗିରି ଥାନା ଅନ୍ତର୍ଗତ ଭରତପୁର ଅଞ୍ଚଳରେ ରୁହନ୍ତି। ପୋଲିସ ବୁଧବାର ସେମାନେ କରିଥିବା ନୟନ କମ୍ୟୁନିକେଶନ କେନ୍ଦ୍ର କମ୍ପ୍ୟୁଟର ଓ ୮ ହଜାର ଟଙ୍କା ଜବତ କରି ଘଟଣାର ତଦନ୍ତ ଚଳାଇଛି। ଦମ୍ପତିଙ୍କୁ ଗିରଫ କରାଯିବା ପରେ କୋର୍ଟ ଚାଲାଣ କରାଯାଇଥିଲା। ସେମାନଙ୍କ ଜାମିନ ନାମଞ୍ଜୁର ହେବାରୁ ଅଭୀଯୁକ୍ତ ଦ୍ୱୟଙ୍କୁ ଝାରପଡା ଜେଲ୍ ହାଜତକୁ ପଠାଇ ଦିଆଯାଇଛି।
ପୋଲିସ ସୂଚନା ମୁତାବକ, ଖଣ୍ଡଗିରି ଥାନା ଭରତପୁର ଜିଏ କଲୋନୀ ପ୍ଲଟ ନଂ. ୫୮ରେ ରୁହନ୍ତି ରାଜକନିକା ଥାନା ମଝିସାହିର ସ୍ବାମୀ ବିଭୁପ୍ରସାଦ ଓ ସ୍ତ୍ରୀ ରେଖାରାଣୀ। ଗୋଟିଏ ଘରକୁ ଭଡାରେ ନେଇ ବିଭୂପ୍ରସାଦ ଓ ତାଙ୍କ ସ୍ତ୍ରୀ ରେଖାରାଣୀ ନୟନ କମ୍ୟୁନିକେଶନ ନାଁରେ ସାଇବର ପଏଣ୍ଟ ଚଳାଇଥିଲେ। ବିଭିନ୍ନ ବ୍ୟାଙ୍କ ପାସ୍ବୁକ୍ଧାରୀମାନଙ୍କ ଆକାଉଣ୍ଟରେ ସେ ଆଧାର ଲିଙ୍କ୍ ସହ ଅନ୍ୟାନ୍ୟ କାମ କରୁଥିଲେ। ଗତ ମାସରେ ଚନ୍ଦକା ଦାସପୁର ଗ୍ରାମର ମାଲ୍ୟବନ୍ତ ସ୍ବାଇଁ(୭୦)ବ୍ୟାଙ୍କରେ ଆଧାର ଲିଙ୍କ୍ କରିବା ପାଇଁ ବିଭୂପ୍ରସାଦଙ୍କ ପାଖକୁ ଆସିଥିଲେ। ପରେ ବିଭୂପ୍ରସାଦ ତାଙ୍କ ବ୍ୟାଙ୍କ ଆକାଉଣ୍ଟ ନମ୍ବର ଆଣି ଆଧାର ଲିଙ୍କ କରିବା ବେଳେ ଏକ ଓଟିପି ଆସିଥିଲା। ଗୁପ୍ତ ଓଟିପି ନମ୍ବରକୁ ମାଲ୍ୟବନ୍ତ ବିଭୂପ୍ରସାଦଙ୍କୁ ଜଣାଇ ଦେଇଥିଲେ। ତା’ର କିଛି ସମୟ ପରେ ବିଭୂପ୍ରସାଦ ଉକ୍ତ ଓଟିପିଙ୍କୁ ବ୍ୟବହାର କରି ମାଲ୍ୟବନ୍ତଙ୍କ ଆକାଉଣ୍ଟରୁ ୩ ଲକ୍ଷ ୫୪ ହଜାର ଟଙ୍କା ତାଙ୍କ ସ୍ତ୍ରୀଙ୍କ ଆକାଉଣ୍ଟକୁ ଟ୍ରାନ୍ସଫର କରି ନେଇଥିଲେ। ମାଲ୍ୟବନ୍ତଙ୍କ ମୋବାଇଲକୁ ଟଙ୍କା କଟିବା ମେସେଜ ଆସିବା ପରେ ସେ ବିଭୂପ୍ରସାଦଙ୍କୁ କହିଥିଲେ। ହେଲେ ସେ କହିଥିଲେ, ମୁଁ କିଛି କରିପାରିବି ନାହିଁ। ଏ ନେଇ ଥାନାରେ ଅଭିଯୋଗ କରିବା ପରେ ପୋଲିସ ନଂ.୧୪୪/୨୦ରେ ମାମଲା ରୁଜୁ କରି ତଦନ୍ତ ଚଳାଇଥିଲା। ଠକେଇରେ ସମ୍ପୃକ୍ତ ଦମ୍ପତିଙ୍କ ବିଷୟରେ ଜଣାପଡିବା ପରେ ସେମାନଙ୍କୁ ଗିରଫ କରିଥିଲା।
