ପାରାଦୀପ,୧୩।୮(ସ୍ବ.ପ୍ର.): ଜଗତ୍ସିଂହପୁର ଜିଲା ପାରାଦୀପର ଜୀବନରେଖା କୁହାଯାଉଥିବା ତାଳଦଣ୍ଡା କେନାଲ ଏବେ ବିଭିନ୍ନ କାରଣରୁ ସଙ୍କୁଚିତ ଓ ପ୍ରଦୂଷିତ ହେବାରେ ଲାଗିଛି। ଏଥିପାଇଁ କେନାଲର ଜଳଧାରଣ କ୍ଷମତା ୧୧ କ୍ୟୁସେକରୁ ହ୍ରାସପାଇ ୩ କ୍ୟୁସେକରେ ପହଞ୍ଚତ୍ଲାଣି। ଏବେ କେନାଲର ଏକାଧିକ ସ୍ଥାନରେ ଆଡିବନ୍ଧ ନିର୍ମାଣ କରାଯାଇ ଜଳ ପ୍ରବାହ ବନ୍ଦ କରାଯାଇଥିବା ଦେଖିବାକୁ ମିଳୁଛି। ୧୬ ନଂ. ଜୋନ୍ ଭୂତମୁଣ୍ଡାଇ ପାଖରେ ଏପରି ଏକ ଆଡ଼ିବନ୍ଧ ରହିଛି। ଏକ ଠିକାସଂସ୍ଥାର ନିର୍ମାଣ କାମ କେନାଲର ମହାନଦୀ ପାର୍ଶ୍ୱରେ ଚାଲିଥିବାରୁ ସେହି ସଂସ୍ଥା ଆଡିବନ୍ଧ କରି ସେଥିରେ ଗାଡ଼ି ଚଳାଚଳ କରୁଛି। ପାଣି ଯିବା ପାଇଁ ଆଡିବନ୍ଧ ମଝିରେ ଏକ ସିମେଣ୍ଟ ପାଇପ ବସାଯାଇଛି। ୮୦କିମି କେନାଲର ଏକାଧିକ ସ୍ଥାନରେ ଏଭଳି ଆଡିବନ୍ଧ ରହିଥିବା ଦେଖିବାକୁ ମିଳୁଛି। ଯେଉଁ ସ୍ଥାନରେ ଆଡିବନ୍ଧ ହେଉଛି କାମ ପରେ ତାହାକୁ ତଡ଼ା ନ ଯାଇ କେନାଲ ମଧ୍ୟରେ ମାଟିବାଲି ଖେଳାଇ ଦିଆଯାଉଛି। ଫଳରେ କେନାଲଟି ପୋତି ହୋଇଯାଉଛି। ଆଡିବନ୍ଧ ଯୋଗୁ ପାଣିରେ ଦଳ ଜମିରହି ପଚି ଦୁର୍ଗନ୍ଧ ହେଉଛି। ଏହାବାଦ କେନାଲ ପାର୍ଶ୍ୱବର୍ତ୍ତୀ ଗ୍ରାମରେ ବୁଲା ପଶୁ ଓ ଗୃହପାଳିତ ପ୍ରାଣୀଙ୍କ ମୃତ୍ୟୁ ଘଟିଲେ ଲୋକେ କେନାଲରେ ଆଣି ପକାଇ ଦେଉଛନ୍ତି। ତେଣୁ ତାଳଦଣ୍ଡା କେନାଲ ପାଣି ଗାଧୋଇବା ଓ ପିଇବା ଅନୁପଯୋଗୀ ହୋଇଗଲାଣି ବୋଲି ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ ପକ୍ଷରୁ ଏକାଧିକଥର ପରୀକ୍ଷା ପରେ ଘୋଷଣା କରାଯାଇଛି। ଆଡିବନ୍ଧ ପ୍ରସଙ୍ଗରେ ତାଳଦଣ୍ଡା କେନାଲ ଦାୟିତ୍ୱରେ ଥିବା କନିଷ୍ଠ ଯନ୍ତ୍ରୀ ଦେବାଶିଷ ମହାନ୍ତିଙ୍କୁ ପଚାରିବାରେ ସେ କହିଲେ ଯେ ଯେଉଁ ସ୍ଥାନରେ ଆଡିବନ୍ଧ କରାଯାଇଛି ତାହା ସାମୟିକ। ଠିକାସଂସ୍ଥା କାମ ସରିବା ପରେ ତାହା ଭଙ୍ଗାଯିବ। ସେହିପରି ପ୍ରଦୂଷଣ ସମ୍ପର୍କରେ ସେ କହିଛନ୍ତି ଯେ, ଲୋକାମାନେ ହିଁ ଏଭଳି ପ୍ରଦୂଷଣ କରୁଛନ୍ତି। ଏହାର ଯାଞ୍ଚ କରିବାକୁ ଆମ ପାଖରେ କର୍ମଚାରୀ ନାହାନ୍ତି।
