କରାଚି,୨୪।୪ (ପି.ଟି.): କୋଭିଡ୍-୧୯ ମହାମାରୀ କାରଣରୁ ସ୍ଥଗିତ ରହିଥିବା ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ଆୟୋଜନ ପାଇଁ ଏସିଆ କପ୍ କାର୍ଯ୍ୟସୂଚୀରେ ପରିବର୍ତ୍ତନକୁ ଗ୍ରହଣ କରିବୁ ନାହିଁ ବୋଲି ପାକିସ୍ତାନ କ୍ରିକେଟ ବୋର୍ଡ (ପିସିବି) ତରଫରୁ କୁହାଯାଇଛି। ଏ ନେଇ ପିସିବି ମୁଖ୍ୟ କାର୍ଯ୍ୟ ନିର୍ବାହୀ ଅଧିକାରୀ ଓ୍ବାସିମ ଖାନ୍ କହିଛନ୍ତି। ପୂର୍ବ ନିର୍ଦ୍ଧାରିତ କାର୍ଯ୍ୟସୂଚୀ ଅନୁଯାୟୀ ଆସନ୍ତା ସେପ୍ଟେମ୍ବରରେ ଏସିଆ କପ୍ ଟି୨୦ ଟୁର୍ନାମେଣ୍ଟ ୟୁନାଇଟେଡ ଆରବ ଏମିରେଟ୍ସ (ୟୁଏଇ)ରେ ଆୟୋଜନ କରିବାକୁ ପିସିବି ଆଶବାଦୀ ଅଛି। ତେବେ କରୋନ ଭାଇରସ ସଂକ୍ରମଣ ନେଇ ସ୍ଥିତି ସ୍ବାଭାବିକ ହେବା ଜରୁରି ବୋଲି ସେ କହିଛନ୍ତି। ସ୍ବାସ୍ଥ୍ୟ ନିରାପତ୍ତାକୁ ଆମେ ପ୍ରଥମିକତା ଦେବୁ। କିନ୍ତୁ ଆଇପିଏଲ ଆୟୋଜନ ପାଇଁ ଆମେ ଏସିଆକପ୍ କାଯ୍ୟସୂଚୀରେ ପରିବର୍ତ୍ତନ କରିବୁ ନାହିଁ ବୋଲି ଖାନ୍ ଜିଟିଭ ନୁଉଜ୍ ଚ୍ୟାନେଲକୁ ସାକ୍ଷାତକାର ଦେବା ଅବସରରେ କହିଛନ୍ତି।
ଏସିଆ କପ୍କୁ ନଭେମ୍ବର- ଡିସେମ୍ବରରେ ଆୟୋଜନ କରିବା ନେଇ ଚର୍ଚ୍ଚା ହେଉଥିବା ଶୁଣିବାକୁ ପାଉଛୁ। କିନ୍ତୁ ଆମ ପାଇଁ ଏହା ଅଦୌ ସମ୍ଭବ ନୁହଁ। ଭାରତର ପାକିସ୍ତାନ ଘରୋଇ ପରିବେଶରେ ଜିମ୍ବାଓ୍ବେ ବିପକ୍ଷରେ ସିରିଜ ଖେଳିବ। ଏହାପରେ ନଭେମ୍ବର- ଡିସେମ୍ବରରେ ନ୍ୟୁଜିଲାଣ୍ଡ ଗସ୍ତ କରିବ। ତେଣୁ ଏହି ସମୟରେ ଏସିଆ କପ୍ ଆୟୋଜନ କରାଗଲେ ପିସିବି ଏହାକୁ ସମର୍ଥନ କରିବ ନାହିଁ ବୋଲି ସେ ସ୍ପଷ୍ଟ କରିଛନ୍ତି।
ଉଲ୍ଲେଖଥାଉ କି, କୋଭିଡ୍- ୧୯ ସଂକ୍ରମଣ କାରଣରୁ ଆଇପିଏଲ୍କୁ ଅନିର୍ଦ୍ଧିଷ୍ଟ କାଳ ପାଇଁ ସ୍ଥଗିତ ରଖାଯାଇଛି। ଯଦି ସ୍ଥିତି ସ୍ବାଭାବିକ ହୁଏ, ତେବେ ଆଇପିଏଲ୍ ଚଳିତ ବର୍ଷ ଶେଷ ଆଡକୁ ଆୟୋଜନ ହେବ ବୋଲି ଆକଳନ କରାଯାଉଛି। ଗୁରୁବାର ଅନୁଷ୍ଠିତ ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି) ମୁଖ୍ୟ କାର୍ଯ୍ୟନିର୍ବାହୀଙ୍କ ବୈଠକରେ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ପ୍ରତିନିଧିମାନେ ଆଇପିଏଲ୍ ଓ୍ବିଣ୍ଡୋ ନେଇ କୌଣସି କଥା ଉଠାଇ ନ ଥିଲେ ଖାନ୍ କହିଛନ୍ତି। ପୁଣି ଅଷ୍ଟ୍ରେଲିଆରେ ଆୟୋଜନ ହେବାକୁ ଥିବା ଟି୨୦ ବିଶ୍ୱକପ୍ ନେଇ ମଧ୍ୟ ଅନିଶ୍ଚିତତା ଜାରି ରହିଛି। ଏବେଠାରୁ କିଛି କହିବା ସମ୍ଭବ ନୁହଁ। ଖେଳାଳି ଓ ପ୍ରଶଂସକଙ୍କ ସ୍ବାସ୍ଥ୍ୟ ଓ ନିରାପତ୍ତାକୁ ସବୁଠାରୁ ଗୁରୁତ୍ୱପୂର୍ଣ୍ଣ ବୋଲି ଖାନ୍ କହିଛନ୍ତି।
