ବାରଙ୍ଗ,୭।୭(ଡି.ଏନ୍.ଏ.):ପ୍ରାଣୀ ଉଦ୍ୟାନ ନନ୍ଦନକାନନରେ ଶନିବାର ତୃଣଭୋଜି ସଫାରିରେ ଥିବା ହରିଣଜାତୀୟ ପ୍ରାଣୀମାନେ ଅର୍ଦ୍ଧାହାରରେ ରହିଥିବାର ଜଣାପଡିଛି। ଆବଶ୍ୟକତାଠାରୁ କମ୍ ପରିମାଣର ଦାନା ଷ୍ଟୋରରେ ଥିବା ଯୋଗୁ ଏଭଳି ପରିସ୍ଥିତି ଉପୁଜିଥିଲା। ଫଳରେ ଏନ୍କ୍ଲୋଜରରେ ଥିବା ହରିଣଜାତୀୟ ପ୍ରାଣୀମାନେ ଦାନା ପାଇଥିବାବେଳେ ତୃଣଭୋଜି ସଫାରିରେ ଥିବା ଆଠଶହରୁ ଊର୍ଦ୍ଧ୍ୱ ହରିଣଜାତୀୟ ପ୍ରାଣୀଙ୍କୁ ଖାଦ୍ୟ ମିଳିପାରି ନ ଥିଲା।
ହରିଣଜାତୀୟ ପ୍ରାଣୀମାନଙ୍କ ପାଇଁ ପ୍ରତିଦିନ ପୂର୍ବାହ୍ନ ୧୧ଟାରୁ ୧୨ଟା ମଧ୍ୟରେ ଦାନା ଓ ଅପରାହ୍ନ ୩ଟାରୁ ୪ଟାରେ ବିଭିନ୍ନ ପ୍ରଜାତିର ଘାସ ସମେତ ବର, ଓସ୍ତ ଗଛ ପତ୍ର ଖାଇବାକୁ ଦିଆଯାଇଥାଏ। ଓମ୍ଫେଡ ପକ୍ଷରୁ ଚୋକଡ, କୁଣ୍ଡା, ପିଡିଆ, ଭିଟାମିନ, ମାଣ୍ଡିଆ ଆଦି ସାମଗ୍ରୀକୁ ନେଇ ହରିଣଦାନା ପ୍ରସ୍ତୁତ କରାଯାଇ ନନ୍ଦନକାନନକୁ ଆସିଥାଏ। ଏହାକୁ ଷ୍ଟୋର ବିଭାଗର ରେଞ୍ଜ ଅଫିସର ପରିଚାଳନା କରିଥାନ୍ତି। ଶନିବାର ଜନ୍ତୁ ବିଭାଗର କର୍ମଚାରୀମାନେ ହରିଣଦାନା ଆଣିବାକୁ ଯାଇଥିବାବେଳେ ଆବଶ୍ୟକତାଠାରୁ କମ୍ ପରିମାଣର ଦାନା ଥିବା ଦେଖିଥିଲେ। ସେ ସମ୍ପର୍କରେ ସେମାନେ ଷ୍ଟୋର ଓ ଜନ୍ତୁବିଭାଗ ରେଞ୍ଜ ଅଫିସରଙ୍କ ଦୃଷ୍ଟି ଆକର୍ଷଣ କରିବା ସହ ଉପଲବ୍ଧ ଥିବା ଦାନାକୁ ଏନକ୍ଲୋଜରରେ ଥିବା ହରିଣଜାତୀୟ ପ୍ରାଣୀମାନଙ୍କୁ ବାଣ୍ଟିି ଦେଇଥିଲେ। ହେଲେ ସଫାରିରେ ଥିବା ଚିତ୍ରାହରିଣ, ସମ୍ବର, କୁଟ୍ରା, ଚଉଶିଙ୍ଗାକୁ ମିଶାଇ ପ୍ରାୟ ଆଠଶହରୁ ଊର୍ଦ୍ଧ୍ୱ ପ୍ରାଣୀମାନଙ୍କୁ ହରିଣଦାନା ମିଳିପାରି ନ ଥିଲା। ଏ ସମ୍ପର୍କରେ ଜନ୍ତୁ ବିଭାଗ ରେଞ୍ଜ ଅଫିସର ଦାୟିତ୍ୱରେ ଥିବା ଏସିଏଫ ଅଶୋକ କୁମାର ଦାସ କୁହନ୍ତି, ଶନିବାର ଆବଶ୍ୟକତା ଥିବା ୧୯ବସ୍ତା ବଦଳରେ ୯ ବସ୍ତା ଦାନା ହରିଣଜାତୀୟ ପ୍ରାଣୀମାନଙ୍କୁ ଦିଆଯାଇଛି। ହରିଣଦାନା ନେଇ ଆସୁଥିବା ଗାଡି ବାଟରେ ଖରାପ ହେବାରୁ ଏହି ସମସ୍ୟା ଦେଖାଦେଇଥିଲା। ତେଣୁ ତୃଣଭୋଜି ସଫାରିରେ ଥିବା ଚିତ୍ରାହରିଣ, ସମ୍ବର, କୁଟ୍ରା, ଚଉଶିଙ୍ଗାମାନଙ୍କୁ ଘାସ ଖାଇବାକୁ ଦିଆଯାଇଥିଲା ବୋଲି ସେ କହିଥିଲେ।
