ଖଣ୍ଡପଡା,୧୮।୮(ସ୍ବ.ପ୍ର.)-କଣ୍ଟିଲୋ ନୀଳମାଧବ ମହାବିଦ୍ୟାଳୟ ପରିସରରେ ବିଭିନ୍ନ ସମୟରେ ସ୍ଥାନୀୟ ଅଞ୍ଚଳର କେତେକ ଅଣଛାତ୍ର ପ୍ରବେଶ କରି ନାନା ବିଶୃଙ୍ଖଳା ସୃଷ୍ଟି କରିଥାନ୍ତି । ଫଳରେ ମହାବିଦ୍ୟାଳୟର ଶୈକ୍ଷିକ ବାତାବରଣରେ ବାଧା ସୃଷ୍ଟି ହେଉଛି। ବିଶୃଙ୍ଖଳିତ ଅଣଛାତ୍ରଙ୍କୁ ଚିହ୍ନଟ ସହିତ ସେମାନଙ୍କ ବିରୁଦ୍ଧରେ ଆଇନଗତ ପଦକ୍ଷେପ ଗ୍ରହଣ କରିବା ଲକ୍ଷ୍ୟରେ କଲେଜ ମୁଖ୍ୟ ଫାଟକ ସମ୍ମୁଖରେ ସିସି କ୍ୟାମେରା ଲଗାଯିବା ପାଇଁ ଶୁକ୍ରବାର ଆୟୋଜିତ କଲେଜ ପରିଚାଳନା କମିଟି ବୈଠକରେ ନିଷ୍ପତ୍ତି ଗ୍ରହଣ କରାଯାଇଛି। କଲେଜ ସଭାଗୃହରେ ପରିଚାଳନା କମିଟି ସଭାପତି ତଥା ପୂର୍ବତନ ବିଧାୟକ ଅନୁଭବ ପଟ୍ଟନାୟକଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ କଲେଜର ଶିକ୍ଷାଦାନ ବ୍ୟବସ୍ଥାକୁ ଶୃଙ୍ଖଳିତ କରାଯିବା ସହ ବିଭିନ୍ନ ସମସ୍ୟା ସମ୍ପର୍କରେ ଆଲୋଚନା କରାଯାଇଥିଲା । ବିଶେଷ କରି କଲେଜ ପରିସରରେ ସାଇକେଲ ଷ୍ଟାଣ୍ଡ ନିର୍ମାଣ ଓ ହତାବାଡ ନିର୍ମାଣରେ ଅଭିଯୋଗ ହୋଇଥିବା ଦୁର୍ନୀତି ସମ୍ପର୍କରେ ସବ୍ କମିଟି ଉପସ୍ଥାପିତ କରିଥିବା ରିପୋର୍ଟକୁ ସଭ୍ୟମାନେ ଉପସ୍ଥାପନ କରିଥିଲେ। ପରବର୍ତ୍ତୀ ପର୍ଯ୍ୟାୟରେ ଚାର୍ଟାର୍ଡ ଆକାଉଣ୍ଟାଣ୍ଟଙ୍କ ରିପୋର୍ଟ ଅନୁସାରେ ନୀତି ନିୟମ ଅନୁଯାୟୀ ପଦକ୍ଷେପ ନେବାକୁ କଲେଜ ଅଧ୍ୟକ୍ଷ ସୁକାନ୍ତ କୁମାର ନାୟକଙ୍କୁ ପରାମର୍ଶ ଦିଆଯାଇଥିଲା । ଆବଶ୍ୟକୀୟ ଷ୍ଟାଫ୍ ନିଯୁକ୍ତି ପାଇଁ ହୋଇଥିବା ସାକ୍ଷାତ୍କାର ରିପୋର୍ଟକୁ ଗ୍ରହଣ କରାଯାଇ ଯୋଗ୍ୟ ବିବେଚିତ ଆବେଦନକାରୀଙ୍କୁ ନିଯୁକ୍ତି ଦିଆଯିବା ପାଇଁ ସ୍ଥିର କରାଯାଇଥିଲା । ଏହାବ୍ୟତୀତ ଚଳିତ ବର୍ଷ ପାଇଁ +୨ ଓ ଡିଗ୍ରୀ ଶ୍ରେଣୀ ପାଇଁ ଆୟବ୍ୟୟ ଅଟକଳ ଗୃହୀତ କରାଯାଇଥିଲା ।
ଊର୍ଦ୍ଧ୍ୱ ଛାତ୍ରୀଛାତ୍ର ଅଧ୍ୟୟନ କରୁଥିବା କଣ୍ଟିଲୋ ମହାବିଦ୍ୟାଳୟରେ କେତେଜଣ ଅଧ୍ୟାପକ ନିୟମିତ ଭାବେ କଲେଜକୁ ବିଳମ୍ବରେ ଆସୁଥିବା ବେଳେ ଶିକ୍ଷାଦାନରେ ଅବହେଳା ପ୍ରଦର୍ଶନ କରୁଥିବା ନେଇ ଆଲୋଚନା କରାଯାଇ ବିହିତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ବୈଠକରେ ଆଲୋଚନା ହୋଇଥିଲା। ଏହା ବ୍ୟତୀତ ଚଳିତ ବର୍ଷ ପାଇଁ +୨ ଓ ଡିଗ୍ରୀ ଶ୍ରେଣୀ ପାଇଁ ଆୟବ୍ୟୟ ଅଟକଳ ଗୃହୀତ କରାଯାଇଥିଲା ା କଲେଜ ଅଧ୍ୟକ୍ଷ ନାୟକ ଉକ୍ତ ବୈଠକକୁ ସଂଯୋଜନା କରିଥିବା ବେଳେ ଉପାଧ୍ୟକ୍ଷ ଈଶ୍ୱର ଚନ୍ଦ୍ର ଦାଶ ଧନ୍ୟବାଦ ଦେଇଥିଲେ । ଆଲୋଚନାରେ ଅନ୍ୟତମ ସଭ୍ୟ ଅଖିଳ କୁମାର ମହାରଣା, ଈଶ୍ୱର ଚନ୍ଦ୍ର ମିଶ୍ର,ଉଜ୍ଜ୍ୱଳ ମହାରଣା, ଭିକାରୀ ମହମ୍ମଦ, ପ୍ରଦୀପ କୁମାର କର, ପ୍ରଭାକର ଶିରୋମଣି ପ୍ରମୁଖ ଅଂଶ ଗ୍ରହଣ କରିଥିଲେ ।
